她是我的青梅竹馬…(已實體上市): 第二十一章

「喂！去參加話劇社咯！」我在午膳時向同桌的晉傑兆健和世昌提出。
 
「哇！今日天氣好好喎！」世昌向著窗外的滂沱大雨說。
 
拜託，要轉移話題都找個好點的方法吧。
 
「嗯，今日天氣的確唔錯。」晉傑和應。
 
媽的，你就別要繼續亂扯下去好嗎。
 




「唔錯唔錯。」兆健附和。
 
幹，當我沒說過。
 
「做咩無啦啦話要參加話劇社？」晉傑問。
 
算你有點人性。
 
但我當然不能說是因為詩雨。
 




「學姐靚囉！」我說。
 
「車！」他們三個不約而同地「車」我一下。
 
「一早知嗰度多靚女學姐啦！但你都溝唔到架啦！」晉傑說。
 
「咁你呢！溝唔溝到心渝呀又！」我故意揶揄他一下。
 
「呃……呃……」晉傑語塞。
 




「下？乜阿傑鐘意心渝咩？」世昌問。
 
「係呀，你唔係唔知呀？」我反問。
 
「哎呀，我都鍾意佢喎！」世昌說。
 
這我真的想不到，雖想不到，但不驚訝。
 
黃心渝同學就是有著這樣的魅力。
 
「你行開啦！唔好同我爭！」晉傑有點激動地說。
 
「你溝到先算啦！」世昌說。
 
「我會盡我最大嘅努力。」晉傑一面認真。




 
其後，晉傑真的付出了他一生人最大的努力去嘗試取得心渝的芳心，只是有些事，不是努力，就能成功。
 
「咪講你嗰啲住先啦，入唔入話劇社呀咁？」我重提。
 
「哇，今日天氣真係好！」一句說話，三把不同的聲音。
 
當我沒說過。
 
原本我還想把三個一起拉進話劇社，讓我可以待在詩雨身邊。
 
但現在計劃落空。
 
為什麼不自己一個人去參加？
 




如果成功把那三個都拉進去，當詩雨問起的時候，我都能找個藉口說是要陪他們來。
 
但自己一個人去的話，就沒藉口可以用了。
 
最後我放棄了加入話劇社。
 
亦因此，詩雨去了一個我觸手不能及的地方。
 
 
 
 
「今日，一齊返屋企？」我在放學時問詩雨。
 
「唔得呀，我要去排戲呀……你自己走先啦……」
 




「今日，一齊返屋企？」我在第二天放學時問詩雨。
 
「唔得呀，我要去排戲呀……你自己走先啦……」
 
「今日，一齊返屋企？」我在第三天放學時問詩雨。
 
「唔得呀，我要去排戲呀……你自己走先啦……」
 
「今日，一齊返屋企？」我在第四天放學時問詩雨。
 
「唔得呀，我呢個月都要去排戲呀……就嚟要公演喇……下次先一齊返屋企吖！」詩雨搔著頭對我抱歉。
 
「無呀我之後都約左晉傑佢地放學去打機，諗住呢幾日同你一齊走陪下你之嘛，點知你咁忙！」
 
「sorry呀！下次一定一齊走！」




 
「下次先算啦……」
 
「係呢，我地話劇社下個月十五號喺葵青公演，你嚟唔嚟睇呀？」詩雨問我。
 
「仲有成個月，有排啦，到時得閒先算！」
 
「哦……咁好啦……」她的樣子有點失落。
 
直至下個月的十四號，她都沒再邀請我去看她公演。
 
詩雨其中一個最大的優點，就是不會要求……

同時也是她最大的缺點。
 
但你好歹也請多我一次呀……
 
十五號當天，是星期六。
 
我早上九時多便起床梳洗好，一直待在家的門口附近，細聽外面走廊的動靜。
 
等到十時半左右，我聽到隔壁的開門聲。
 
我連忙拿起鎖匙銀包，開門。
 
「嗨！乜咁啱呀！」如我所料，我看見詩雨出門。
 
「咦！你咁早起身嘅？」詩雨問我。
 
「我……我早咗瞓之嘛！係呢，你今日公演喎！」
 
「係呀，依家返學校排多幾次，就同埋啲社員一齊去喇。」她說。
 
「係呢，幾點開始演出呀？」
 
「你想嚟？」詩雨碌大眼晴熱切地看著我。
 
「無呀，咁啱得閒無嘢做嘛，咪諗住嚟睇下你做成點囉！」
 
「好呀好呀，我又咁啱有張飛喺手呀！今晚九點，葵青劇場，約實你架喇！」她興高采烈地說。
 
「你唔好食螺絲喎！」我接過入場票後轉身準備回家。
 
「咦？你唔係要出門口咩？做咩又返入去嘅？」
 
幹！我太大意了。
 
「我……我……我漏左銀包無帶之嘛！」
 
「咁你隻手拎住咩嘢？」詩雨指向我手中的錢包。
 
「咦！原來喺到呀？」我在內心直呼自己白痴，連想個好一點的謊話都不會。
 
「一齊行嚕？」詩雨按著電梯的開門製。
 
「好……好呀……」我到底走去哪好呢……
 
「係呢，你要去邊？」去到大廈大堂後，詩雨問我。
 
「去老麥買早餐之嘛，你走啦！」
 
「咁今晚見架喇！你一定要嚟呀！拜拜……」她有點依依不捨的樣子。
 
「知喇知喇，拜拜。」
 
晚上九時，我來到葵青劇場。