米米蓮妖怪作品 -《旅行‧如此‧難以忘‧記 》(百集長篇): 第125集 ~ 明︰妖！做乜又有隻彊屍王要打嫁？
第125集 ~ 明︰妖！做乜又有隻彊屍王要打嫁？
咦，「洋腸」呢？做乜今集唔幫我講啊？
吓，「洋腸」你…竟然同「彩雲」佢…
光天化日做呢D嘢？而家大家危在旦夕噃…
係咪應該遲D先做啊？
(揼骨喳嘛，乜你講到好似咩咁嫁。你自己講住先啦，「洋腸」要幫我啊。)
(其實…我唔係淨係想揼骨囉。)
唉，佢哋呢對痴男怨女，我都係唔理佢哋喇，求人不如求己…
我自己講返好過…
「東歪」殺死咗「鬼王」之後…
「佛地魔」就重生喇，仲要用「大袋」個身嚟重生…
所以而家大家都叫佢「大袋魔」。
我哋唔能夠用妖魔鬼怪嘅層次去睇佢，因為…
佢根本就已經係一隻「半神」…
嗰度氣牆，完全掩蓋晒我哋嘅力量…
最明顯嘅解釋就係我哋明明聽到佢講，香港俾佢毀滅咗…
比著係正常情況，應該係會好嬲，但係一來我哋唔知係咪真…
二來，「大袋魔」嘅力量大到呢，我哋都明顯感受到…
我哋其實只能夠肉隨砧板上，苟延殘喘咁。
你諗吓，佢勁到可以指吓人就已經令人瀨尿，你話佢幾勁呢？
所以而家我哋唯有用佢俾嘅時間去諗其他方法…
而而家，唯一有機會贏嘅方法就係請神上身幫拖…
「咁請邊個啊？」
「冇得錯嫁喇，有單眼仔呢隻「慧眼」，又有三尖兩刃嘅「鳳凰火炎」，仲有隻哮天傻狗，係你喇，二郎神！你哋頂住先，我試吓召喚「二郎神」。」
「哦。但係…我哋可以點頂啊？」
「哈哈哈哈，頂我？算啦，見你哋有D誠意挑戰我，你哋就唔使打我住啦，打咗我最後兩隻手下先…」「大袋魔」咁講。
「仲有兩隻？」
「妖刀村正係一隻，另外一隻…出嚟啦，陳年彊屍王…」
「個名會唔會有D核突？」我問。
「唔係核突，係好似食物。」阿輝講。
喺呢個時候，又係地下，又喺地下度慢慢升咗副棺材出嚟…
棺材蓋彈開，走咗條…
「當年五絕大戰嗰隻彊屍王啊！」「南龍」先生咁講。
「你專心D召喚二郎神先啦。」
「係，咦咦哦哦咦咦哦哦…」
佢有佢召喚，而我哋就…
「保護好「南龍」先生同阿輝，呢兩隻嘢就等我哋攪掂啦！」我講。
「師兄你執迷不悟，就等我嚟對付你啦，明仔，彊屍王就交俾你喇。」
「嘩，你都幾識揀噃。」
「咁你係咪想一個打兩個啊？」
「唉，算喇，嚟啦，彊屍王！」
我講完呢句之後，我發現「彊屍王」係啞嘅，所以…
唯有講返兩句「東東大戰」嗰邊先啦，即係東歪VS東虫…
「師兄，既然你執迷不悟，咁你唔好怪我對你唔客氣喇，靈力我已經用得七七八八，唯有借助師祖之力，雷神震子，求你借我力量去驅除妖魔。」
佢一講完，一條閃電劈落佢度，我幾驚佢係講錯嘢，俾電劈死埋啊。
好在，佢冇事，雙眼仲變得炯炯有神咁…
「雷電交加！」
「大師」一借到神力，立即就一個電球掟埋去「司徒不正」度…
「風牆！」
司徒不正亦製造咗一道牆出嚟擋咗大師嘅電球…
「雨電風雷四式係星老嘢教我哋嘅，你識電同雷，咁我就用雨同風嚟同你打啦！」
「漫天飛雨刀！」
呢招令到刀如雨下，好多刀光劍影向大師飛去…
「電光霹靂！」
呢招有震盪嘅力量，阻擋咗刀雨嘅來勢…
「疾風快刀！」
「司徒不正」突然迅間衝向「大師」，再連環快刀…
「大師」只可以閃避，好在佢件衫比較鬆身，造成一D虛位…
「司徒不正」亦只係斬爛晒大師件衫…
「大師冇武器啊，快D幫佢啦！」
「接武器！」係阿張啊！佢將「南龍」先生嘅「青龍劍」掟咗俾大師…
點知…
「擘」一聲就俾「司徒不正」斬爛咗…
「P你個K丫，青龍劍都爛埋添…」
「唔好咁大聲啊，南龍先生仲咦咦哦哦緊，佢未知嫁。」我咁講。
「我自己有武器，雷神釘鎚，我震！」「大師」講。
「大師」唔知喺邊度嚟咗雙件神器，一釘一鎚…
一敲，雷電就飛向「司徒不正」…
睇嚟佢哋都要大戰三百個回合喇。
「呀小朋友，你可唔可以俾D面理吓我呢？」
一把第一次聽到嘅聲音，原來係「彊屍王」出聲…
「唔好意思，我仲以為你係啞嫁添。」
「唔緊要，咁我哋可以開打未丫？」
我吊，我用心望一望佢個口，佢個口冇郁不特止，仲要有曱甴走出嚟嫁…
我驚起嚟咪一吓抆出「九陽草薙」囉，點知…
「嚓」一聲，「彊屍王」就俾我斬開咗兩邊…
我以為佢會好似「鬼王」咁重生啦，點知佢就咁訓咗喺地冇再郁過。
唔知係咪我D無情力太勁呢？我真係斬死咗佢…
「喂，有冇人解釋吓我聽，點解隻「彊屍王」咁豆腐嫁？佢真係死咗噃。」
「國產貨係咁嫁喇，將就吓啦。」「細寶」講。
「有冇保養啊？」「大寶」講。
「有冇買保險啊？」瀨咗尿嘅「細鬼」講。
「保險唔保啦。」阿倫講。
「又話當年五絕好辛苦先打贏佢嘅？」我再問。
「呢隻擺明係膺品啦，「彊屍王」點會識講嘢嫁啫。」「洋腸」都出晒口。
「喂，佛地魔，你造假嘢呃消費者呀？」我問。
「我鬼知咩，我都係買返嚟嫁喳嘛，我都係受害者啊！」「大袋魔」竟然回應。
「咁下次買嘢小心D喇，知唔知啊？」
「哦！」
咦，睇嚟大家嘅「廢話戰術」又拖延咗一D時間喇喎…
仲攪到佢好似唔記得咗我殺咗佢愛將添。
「咦咦哦哦咦咦哦哦咦咦哦哦,…」「南龍」先生繼續召喚「二郎神」。
(嘟嘟 ~)
咦，南龍先生個「哀風」好似收到訊息噃…
咩話？…「二郎神手提電話號碼，46709394。」
「喂，先生，你個「哀風」叫你唔好咦咦哦哦喇，打俾二郎神啦。」
「吓，咩話，乜而家上面都咁先進喇？」
「南龍」先生攞起「哀風」，即係就打，點知…
(嘟，嘟，嘟，嘟…)(電話唔通嘅聲音)
「唔通嘅？你個「哀風」係咪廢嫁？」
「哀風廢就梗嫁啦，由「哀風生」出到而家叫做「哀風食屎」你就知啦，但係電話應該冇錯嫁喎。」
「我知喇，你部電話有冇漫遊啊？呢度係日本，應該最少要打+86或者+852啊。」
「係噃，試吓先。」
(嘟嘟 ~)
「喂，邊位搵二郎神大人？」
「啱咗喇！但係…CALL台呀？我哋想搵「二郎神」幫手斬妖除魔啊。」
「有冇預約？」
「冇啊，但係…我哋好趕嫁，可以點樣搵到佢呢請問？」
「唔知，佢冇交低，點解你要搵佢啊？其他神唔得咩？」
「咁我哋嘅人有慧眼，有隻狗，又有把三尖兩刃刀，好似搵佢最適合丫嘛。」
「車，用張飛啦。」
「張飛？」
「對眼生成白鴿眼，帶隻喪家犬，加把三尖兩刃槍…」
「我哋係刀，唔係槍噃。」
「唔早D講？唉，二郎神大人返嚟喇。」
「唔該晒啊，CALL台大哥。」
「CALL咩台大哥啫？我係哮天犬啊。」
「搵我咩事？」似係「二郎神」把聲啊！
(…)(二郎神把聲究竟係點嘅呢？)
「麻煩大人上我朋友身去對付邪魔丫。」「南龍」先生回應。
「你都幾精甩尾噃，電話就你打，妖怪就你朋友打，十分鐘啦，等我沖埋個涼先。」
「搵食啫，搵食啫，咁等你嚟喇，唔該晒。」
「南龍」先生收咗線就同「大袋魔」講。
「佛地魔，二郎神話同你打呀，不過要等佢十分鐘。」
「大袋魔」及咗吓頭，好似應承咁，而我就望向「東東大戰」嗰邊…
「肥龍大師，仲頂唔頂得住啊？」我問。
「雷神﹒絕殺﹒黑龍波！」
「司徒不正」避開咗，但係…
「黑龍波」就繼續直飛埋去「大袋魔」度…
「嘭」一聲，灰塵飛起，大家都合拾希望呢一吓誤打誤撞打死咗佢，好可惜…
「你老味丫，整爛晒我D衫褲，而家連條J同個啷啷都露埋出嚟。」
「哇丫！」D女仔咁叫。
「哇吓。」D男仔咁叫。
「唔怪得之佢叫「大袋」啦，真係聞名不如見面。」
但係而家「大袋魔」好似想發脾氣殺人咁款…
佢一個閃身就飛咗埋去笑得最大聲嘅「洋腸」度，仲想…
「笑丫嗱，去死啦！」
「咪住！」
「燈燈櫈櫈櫈~ 櫈櫈燈櫈~ 櫈櫈燈櫈~ 燈燈櫈櫈燈~ 櫈櫈燈燈~ 櫈櫈櫈櫈~」(如來神掌音樂)
「咩話？二郎神？」
(待續)
下集預告︰
吓，用妖刀村正嘅竟然係佢？
註解︰
(1) 哀風生﹑哀風食屎 — 「哀風」咁多集都冇解釋添，嗰個全球人仕都用緊嘅智能電話，「生」即係「3」，「食屎」即係「6」。
(2) +86或者+852 — 電話區號，「+86」係大陸，「+852」係香港。
(3) 精甩尾 — 聰明。
(4) 條J同個啷啷 — 「J」for Jer，啷啷即係有兩粒嘢係個殼裡面嘅嘢，搖吓搖會響嘅，咦，好似解錯嘢添。算，兩樣都係男性性器官。