米米蓮妖怪作品 -《旅行‧如此‧難以忘‧記 》(百集長篇): 第123集 ~ 麗︰不如…都俾我講D嘢丫…(呢集有D長)
第123集 ~ 麗︰不如…都俾我講D嘢丫…
「鬼王」死唔死，「東歪」會唔會殺我哋，「佛地魔」係點樣？
呢D一切一切我都唔在乎，我在乎嘅只有我細妹，同埋「佢」…
上一次細妹俾「東歪」佢打中咗個肚，痛到暈咗，我當然擔心啦…
但係見到阿輝佢好緊張咁即刻就救返細妹，講真，我都對呢個男仔改觀咗。
細妹佢暈咗，呢集就唯有等我嚟頂上啦。
我雖然男仔頭，但係始終係女仔嚟家嘛，講D打打鬥鬥嘅嘢…
始終唔會有男仔嗰種激昂，所以…
我寧願用呢一集嘅時間講吓我同「佢」。「佢」係邊個？
「佢」咪就係我嘅「第一次」囉，啱啱先嘗試想認識嘅一個男仔，「袋袋」。
我哋嘅相識，就由第一次我追打「佢」開始…
唔知大家仲記唔記得呢？嗰次係因為…
「袋袋」為咗幫阿輝佢製造同細妹單獨雙處嘅時間…
「佢」攞咗我最心愛嘅頭箍，引我去追住「佢」…
「佢」成功咗，亦成功引到我出咗手打「佢」…
我仲打到「佢」遍體鱗傷添，但係…
其實我係第一次打到男仔咁傷嫁咋，所以…
我有曾經回過頭望過「佢」，我有內疚嫁…
(當你看著我 ~ 我沒有開口 ~ 已被你猜透 ~)
「佢」大男人一個，如果真係還手，我都唔知俾「佢」打咗去邊嚧，好在…
「佢」冇咁做，亦係「佢」留俾我嘅第一個好印象…
(還是沒把握 ~ 還是沒有符合 ~ 你的要求 ~)
之後，我好快咁就衝返去房，亦只係鬧咗阿輝一句︰—
「即刻出去！出去執返你朋友啊！」
其實當時，我係想阿輝盡快去幫我睇吓「佢」就真。
嗰一晚好奇怪，我咁大個女都未試過，因為…
我一訓著就諗起「佢」…
(是我自己想得太多 ~ 還是你也在閃躲 ~)
成個夜晚就係咁，輾轉反側，一直咁諗…
(如果真的選擇是我 ~ 我鼓起勇氣去接受 ~)
半夜見細妹唔喺房，我竟然好自然咁去咗「佢」嗰層…
(不知不覺讓視線開始 ~)
我喺細妹開門嘅罅蓬之中見到「佢」…
(閃爍 ~~~~)
當時心諗…
「唔知佢傷成點呢？」
………
第二日，陳老師約埋我哋同大家一齊行…
我一打開衣櫃，第一時間就見到緊身衫同熱褲…
喺嗰一刻，唔知點解，真係好想著佢哋俾「佢」睇…
呢D唔知係叫「女為悅己者容」，定係真係難聽D咁講，係「發姣」呢？
點知我著成咁落到去，第一句聽到嘅唔係「佢」讚我，而係…
「嘩！你著成咁…」
佢咁講，攪到我有D嬲爆爆添，都唔知人哋係為佢而著嘅。
不過，我見到佢D傷好似好返D，個心都安樂D…
之後，大家一齊去咗一個可以行街街嘅地方，我咪同「佢」…
同細妹﹑阿輝﹑阿明五個人一齊行囉…
點知突然遇到D日本飛仔嚟撩我，其中一個肥飛仔仲想非禮我添…
而「佢」…就即刻衝埋嚟救我，但係…
佢隻手掌竟然揸咗埋我心口度喎，我驚起嚟，自然反應咪…
「你條死鹹蟲！揸我個胸！？」
一巴就打咗落「佢」塊面度…
當時我真係後悔到想喊…
但係「佢」唔單止冇嬲我，仲…
「放開佢！唔係我X都切咗你哋！」
個「X」字雖然係粗口，但係喺嗰一刻，我真係覺得「佢」好有型啊！
我咁大個女都未試過俾個咁威猛嘅男仔保護嫁。
佢一個箭步踏前就連環快打，三兩吓手腳就將飛仔打走晒…
我當時其實面都紅晒，好似仲有少少…發姣添…
所以咪即刻同細妹去洗手間洗個面囉。
直到出返廁所，冷靜落嚟，我先敢同佢第一次講︰—
「…多謝噃！」
細妹佢哋好識做，之後都行開晒，俾我同「佢」有D空間…
「Eee…我…可以叫你阿麗嗎？」「佢」咁同我講。
「Mmm…叫我麗麗啦。」
死喇，死喇，好似發姣發到太出面添。
「好啊，麗麗，你有冇嘢想要買啊？如果冇，不如…我哋去河邊行吓丫。」
「好。」
之後，我哋就兩個人慢慢行去河邊…
行行吓…
「麗麗，不如…我哋坐喺石壆吹吓風，傾吓計囉…」
「好。」我依然扮晒矜持咁。
我哋之後好靜咁坐低咗，我望住流動嘅河水，感受吓柔和嘅清風…
「麗麗…」
「佢」叫我，我咪另返轉頭望佢囉，點知…
「佢」突然好認真咁望住我…
(不知不覺讓視線開始 ~ 閃爍 ~)
俾男仔咁望法，我都係第一次咋，個心…原來會噗噗噗噗咁跳嫁…
「咩事啊？」
「我…我…我想你做我女朋友啊！」
(喔 ~ 第一次我 ~ 說愛你的時候 ~)
我當時呆咗！
(呼吸難過 ~ 心不停地顫抖 ~)
邊有人尋晚先俾人打完，今日就話鍾意人嫁啫，實在嚟得太突然…
(喔 ~ 第一次我 ~ 牽起你的雙手 ~)
我嘅感覺，就好自然咁懷疑佢想報復一樣，所以…
「你…你唔會係想向我報復呱？最多我同你講對唔住丫。」
「嘻嘻…」
佢呢吓笑聲，令我個人感覺好沈重，我好驚佢真係講笑，唔係認真，但係…
「唔會，唔會，一定唔會，其實…我係想講…你好似我家姐啊。」
正常女仔聽到咁講，應該會係嬲嘅，但係…我當時就覺得…
只要唔係話叫我做佢女朋友嗰吓係假就得喇。
但係唔知係咪我個樣俾佢睇到好似有少少怪呢，佢耍住手咁講…
「我唔係話你老啊，更加唔係有戀母情意結，我只係想講…你好似我最鍾意嘅家姐咁樣咋，所以…我…」
「佢」再搲搲頭…
「我…我真係好想有機會同你交往啊。」
呢一刻，我真係好開心，但係人哋女仔嚟家嘛，點都要有返D矜持嘅，唯有…
「我諗吓先啦，不過…你唔係應該講多D你D嘢俾我聽先咩？」
「你想知咩丫？」
「而家係你追我噃，你仲問返我？咁我唔啋你喇。」
呢次係我第一次向「佢」撒嬌…
「係嘅，我有阿爸，阿媽，阿哥同家姐…」
「嘻嘻，邊有人咁樣介紹自己嫁？」
「哈哈，我都未試過向女仔介紹自己，俾D時間我丫。」
「好啦，你再講丫。」
「阿媽同阿哥喺我未懂性已經喺鄉下賣咗鹹鴨蛋嚧，之後阿爸帶住我同家姐去香港，去到香港就投靠咗我阿爸嘅一個鄉親，不過冇幾耐，我記得好似係六歲，阿爸就病死咗嚧…」
我聽到呢度，覺得感覺太悲喇，所以咁講︰—
「乜你咁慘架？」
「唔係好慘啫…之後，就得返我同家姐相依為命，家姐幫我試過搵過好多間學校，但係都唔肯收我，唯有一間私校肯收我，可惜學費真係好貴，家姐佢唯有辛辛苦苦打幾份清潔工嚟供我讀書囉，所以小學時期好認真咁去讀書嫁，終於俾我考到而家呢間名校…」
「但係你唔係讀書好麻麻地嫁咋咩？」
「你點知嫁？」
「聽講咋。」
「我當時讀書真係唔錯嫁，好可惜，直至嗰次意外…」
「佢」突然間好似好沈重咁，所以我咁問︰—
「咩事啊？可唔可以講俾我聽嫁？」
「我初中嗰時，家姐佢…交通意外死咗。」
當時我就係咁，望住咗「佢」含住眼淚嘅樣…
呢個亦係我第一次見到男仔喊…
喺呢一刻，我好自然咁企咗起身，用我雙手…
攬實佢…
(喔 ~ 第一次你 ~ 躺在我的胸口 ~)
(二十四小時沒有分開過 ~)
(那是第一次知道 ~ 天長地久 ~)
喺呢一刻，我已經認定咗我自己愛上咗「佢」。
…
我攬咗佢一陣之後，見到河邊有朵花…
「咦，你睇吓，嗰邊有朵花好靚啊。」
原本我係想「袋袋」佢忘記唔開心嘢先咁講，點知佢…
「邊度啊？咦，等我落去摘俾你丫。」
佢一講完就斜斜地身行咗落去摘…
「小心啊。」
佢聽到我咁叫，即刻就另返轉身向住我，仲已經摘好咗朵花喺佢右手上面添…
點知…我見到…
「小心啊，袋袋！」
一個好醜樣嘅男仔突然喺條河度升上嚟，就好似妖怪一樣…
佢手上面嘅一條毒蛇仲突然衝去咬住咗「袋袋」添…
「哇丫~！」
咬完「袋袋」之後，醜樣男同毒蛇就好快消失咗…
而大家亦因為聽到「袋袋」大叫而走到嚟搵我哋…
「楊鉅祥，由而家起，你要一直跟住我行，我去邊你去邊，知唔知啊？」陳老師咁講。
「袋袋呀，唔緊要啦，一陣我同你一齊跟陳老師行咪得囉。」
之後我哋兩個就一直一齊行喇。
直到…
喺「迷霧森林」度，我先知原來「袋袋」佢仲俾邪靈上咗身。
上天點解要咁節磨佢噃？
我將所有唔開心都發洩咗喺「毒藤女妖」度…
打完之後，見到「袋袋」佢仲要打咁多壞人，梗係即刻幫手啦…
點知仲俾細妹佢哋笑我添…
喺嗰度，我覺得總算同「袋袋」佢經歷過患難…
我哋之後仲順利離開咗「迷霧森林」，返到去酒店…
我回味咗嗰日嘅片段好耐。
見細妹沖完涼，寫緊日記，咪問吓佢囉…
「細妹，你覺得袋袋佢點啊？」
「幾好丫，佢係輝輝朋友，應該唔會太差嘅。家姐，你真係想同佢拍拖啊？」
「我係想拍吓拖，但係又…唔知呢，我見佢其實都幾好咁丫，又出過手救過我，頭先我打隻「毒藤女妖」嗰陣呢，其實整傷咗自己嫁…」
「你整親邊度啊？冇事丫嘛？」
「手背啫，但係阿袋佢頭先見到我受傷，即刻就用咗張紙巾幫我抹，仲慢慢攤開到正晒先幫我抹，佢又幾細心丫。」
「死喇死喇死喇，家姐，你十月芥菜喇！」
「咦，人哋又冇話要同佢一齊，只係覺得呢個男仔可以交往吓喳嘛。」
我講完之後，就真係好「十月芥菜」咁攬住咗個枕頭，眼光光咁典咗成晚…
唔經唔覺就訓著咗…
點知之後阿輝半夜嚟通知我同細妹，話佢哋班同學俾人捉咗…
當時我真係好擔心「袋袋」都俾人捉埋…
好在，佢冇事，佢哋仲懷疑係黃老師嘅所為，所以去咗黃老師個房度睇…
點知…讀者們都知道晒啦，嗰度其實係陷阱…
不過我想講…
當時「袋袋」佢其實我緊張咁捉實咗我隻手，好似想保護我咁…
好在大家冇發現咋。
再之後，就係球場嗰度喇…
我見到「袋袋」去到之後，成個人都唔同咗，不過我當時真係唔知點…
唯有默默支持佢啦。
直到…
「袋袋」佢幫大家追成三比二嘅嗰一球之後…
「袋袋」佢一返到後場，個樣就變得好痛苦咁…
我當時…真係…喊到已經缺堤一樣，仲激動到衝咗出場…
…
之後，我就一直陪住被抬起嘅「袋袋」出場，直到去到醫療室…
「小姐，你哋唔入得嚟嫁！」牛頭姑娘講。
「點解啊？我係佢…朋友噃！」
「女朋友呀？即使係，都唔得啊，會阻礙傷者被治療嫁！」馬面姑娘講。
我唯有等，同埋祈禱…
(祈求天地放過一雙戀人 ~ 怕發生的永遠別發生 ~)
(從來未 ~ 順利遇上好景降臨 ~ 如何能重拾信心 ~)
(祈求天父做十分鐘好人 ~ 賜我他的吻 ~ 如憐憫罪人 ~)
(我愛主 ~ 同時亦愛一位世人 ~ 祈求 ~ 沿途未變心 ~)
(請給佢護蔭 ~)
可惜，途中我只係一直聽到「袋袋」佢嘅慘叫聲…
之後仲突然…
「佢…佢俾「鬼王」捉咗…」
嗰一刻，我真係傷心到暈低咗…
…
直到我醒返…
我見到有隻妖怪已經同細妹同「解籤先生」打緊…
我知道要見返「袋袋」就一定要打敗眼前呢隻妖怪，所以…
我用盡一切方法去對付隻妖怪，包括「縮小光線」同「拋窒佢」…
結果，協助「解籤先生」打贏咗隻妖怪…
再經過大家嘅努力，我終於嚟到而家呢度…
仲喺呢度見返「佢」，見返「袋袋」佢…
雖然佢俾人半天吊住，但係一切都唔重要喇，我淨係想見返佢咋…
「袋袋！」
佢哋就算打成點，都唔關我事，我一心只係想救返「袋袋」…
所以我無時無刻都係望住「袋袋」嘅位置，想擒上去救返佢…
直到「東歪」殺死「鬼王」呢一吓…
我見到大家都靜落嚟，所以即刻就衝上去救「袋袋」…
點知…
(餐 ~~~~ 餐躝 ~ 餐躝 ~)
「袋袋」佢飄浮喺空中…
慢慢自己用雙手除去鐵錬…
再慢慢飄到我面前…
當時我真係好開心佢冇事啊！
但係…
「你想救我啊？」佢問。
我呆咗咁及咗一吓頭…
「好可惜，我已經唔係佢，我係…佛，地，魔。」
(待續)
下集預告︰
劏雞還神…
註腳︰
(1) 前面首歌係光良嘅《第一次》，佢個MV真係好正，女主角亦都好正，可惜…
(2) 飛仔 — 壞男仔。
(3) 後面首歌係楊千嬅嘅《少女的祈禱》。