米米蓮妖怪作品 -《旅行‧如此‧難以忘‧記 》(百集長篇): 第113集 ~ 明︰等我啊！我會攞住「九陽草薙」嚟救大家嫁！
第113集 ~ 明︰等我啊！我會攞住「九陽草薙」嚟救大家嫁！
唔知「光管陳」佢點呢？我都睇到唔捨得行開添…
(專心練好功，飛返上去咪知囉，使乜睇電視啫。)
係噃，咁快D攪掂埋呢邊先。
「盲俠展昭」上次用竹打落我D經絡度，話係幫我打通佢哋，但係…
我而家D手腳淨係得個紅腫，連郁都痛，佢仲要我同隻…
叫「細細粒」，實質係九樓咁高嘅巨型熊貓人打…
我心諗，你直接殺死我算啦！但係…
「細路仔，唔使驚，我會用我拳頭嚟鍚住你。」熊貓人咁講。
佢仲一拳打埋嚟，我自然反應下避開咗…
佢再一拳打埋嚟，我又好自然咁避開咗…
似乎就連我身體都話俾我聽，我係唔可以死嘅，仲有人等緊我，所以…
我決定死都要打爆佢先，但係…
佢一身賤肉橫生，肉騰騰，毛茸茸咁，根本冇位可以入佢…
究竟我可以點做呢？
「係咪覺得冇位入佢呢？面對高手，一般都會有咁嘅錯覺，其實一定唔係咁，破綻永遠都會係破綻，再高嘅高手都一定有破綻…」
「唔好淨係用肉眼睇人哋嘅破綻…」
「你肯定諗緊唔用肉眼睇，可以用乜眼睇，答案係—心眼！」
我都係唔明…
「試吓合埋眼睇。」
呢一刻，我真係戇居到跟住做，仲…
真係睇到D嘢啊！
「係咪睇到D以前未睇過嘅嘢呢？」
「係啊！黑抆抆！」
「仲有呢？」
「光雲！熊貓人身形嘅光雲…我睇到佢破綻喇！」
我立即運勁，將所有力量集中喺我右手，再全力打出去…
「隔勒底，接我爆烈神拳啦！」
(服 ~) 我打出嘅呢一拳…
正中咗佢隔勒底，但係…
「哈哈哈哈~」
佢竟然冇事，仲訓咗喺地下度傻笑，喺度恥笑我…
「細細粒係十神獸之一，仲要喺成熟期，冇咁易俾你搵到破綻嫁，再嚟啦！」
「盲俠」咁講，我再次合埋雙眼，試吓再睇「熊貓人」嘅破綻…
但係我未搵到，佢就笑完起返身，仲對我拳拳進逼，我根本冇機會睇到…
只可以一直閃避…
「哈哈哈~」呢次係「盲俠」嘅笑聲…
「盲俠前輩，有乜好笑啊？係咪我又有咩做錯咗啊？」我問。
「當然唔係，你自己冇留意咩？」
「留意得D咩丫，我只可以留意到熊貓人D出拳嚟避咋。」
「避你係避，不過你冇開眼啊。」
咦，係噃，原來我而家一直都係合埋眼嚟避開「熊貓人」嘅攻擊，但係…
「咁同開眼有咩分別啫？如果係避到，我開眼都一樣避到。」
「分別就大喇，你未睇到佢破綻，係因為你未熟練心眼嘅用法，但係你合埋眼都避到佢攻擊，即係你開始熟練，你再試吓用多D心機去睇。」
其實我已經一直好用心機去睇，因為我真係好心急想返上去幫大家…
但係我點睇，「熊貓人」都係得個「隔勒底」有個唔同嘅「光雲」…
究竟我可以點做呢？
「我知你心急，但係越急就會越亂，首先係要冷靜，要心如止水，你而家唔係打機，而係真正嘅對決，係唔會有機會俾你打第二ROUND嘅。輸咗嘅話，可能就連條命都會冇埋，所以你要贏，一定要贏，所以一定要冷靜，試吓由下至上，由左到右，望佢前望佢後咁望，高手話明係高手，當然會知道自己破綻，再保護好自己嘅破綻，你要做嘅，除咗係搵破綻，仲要引出破綻，甚至令對手忘記保護破綻或者打穿佢個保護。仲有，你一定要信自己，連自己都唔信嘅話，邊個會信你啊？俾D信心，打敗佢啦。」
「盲俠」果然係高手中嘅高手，一段訓話，令我明白咗好多嘢…
「隔勒底」，無錯，破綻就係隔勒底，只係佢頭先保護咗，同埋…
我連自己都忘記咗去信自己啫。
我襯住「熊貓人」再次由上而下嘅一個重拳…(嘭 ~)
我一個閃身迅間飛到佢身後，集中意志，運用內勁…
再攻擊「破綻」喇！
我冇選擇去令佢忘記保護破綻，而係…
選擇去打穿佢個保護…
「天馬流星爆烈拳！」
我用盡力量用最快時間打出最多嘅「爆烈神拳」，務求打穿佢…
…
「哎呀！」
呢吓嗌聲話俾我聽…
我終於成功咗喇！
「熊貓人」痛到縮返細，變咗做普通熊貓一隻，仲匿埋喺「盲俠」後面。
「唔錯，唔錯，小朋友，你領悟力幾好。」
「多謝前輩，係你教得好啫。我…咁樣係咪可以打贏鬼王喇？」
「傻豬嚟嘅，冇可能。」
「吓，咁頭先唗咁多時間喺度做乜啊？」
「我只可以保證你冇喺度唗過時間。」
「但係…」
「你唔使講嘢喇，等我一陣…」
佢講完呢句就…
(蕉 ~) 一吓好似穿雲箭咁飛咗上天，飛到就連一點都見唔到…
我就一直望住佢飛咗上去嘅位置，心諗唔係咁樣走咗就算呀？
十三秒之後，答案嚟喇…
前輩佢冇走到，仲攞住D嘢，成支火箭咁衝返落嚟…
(龐~！) 佢就係我面前降落，仲插穿埋地下，直入地裡面…
「前輩，你冇事丫嘛？」
「冇事，唔記得收制啫！」
之後，一隻手揸住一把劍，喺地下個窿度隊出嚟…
「呢把劍送俾你。」
我揸住咗，好開心，覺得係把神劍，可以幫我救大家…
仲想即刻就開嚟睇吓，點知…
(咔~ 咔~ 咔~)
「前輩，乜劍嚟嫁？開唔到嘅？」
前輩喺地下躝返出嚟…
「乜你都開唔到咩？不過我都開唔到。」
「吓？前輩，你都開唔到嘅劍，你俾我有乜用啊？」
「我以為你開到，咪俾你試吓囉。」
「咁…」
「你係咪唔想要丫？唔要俾返我。」
「唔制…eee…唔係，不過…都係算啦！」
「其實呢把劍叫九陽草薙。」
「九陽草薙！？」
「係啊，神劍之一，但係神劍就係要神人先用得。」
「你都唔夠神？」我再問。
「我係高人啫，神人係要有「神體」，即係神指派嘅人。」
「咁邊個有啊？」
「你問個天丫！」
「咁邊個有啊啊啊啊啊~」我向天大嗌。
個天當然冇回應，我亦只好準備返上去，但係都要搵返「洋腸」同小倩家嘛…
「洋腸」佢只係喺附近溝緊隻白兔仔，所以好快就搵返…
至於小倩，我同前輩﹑熊貓﹑洋腸一齊行去一個雪地度搵佢…
呢度真係好奇怪，行冇幾耐就變成一個雪地…
(命運是對手 ~ 永不低頭 ~)
唔知做乜現場有首咁嘅歌…
(從來沒抱怨半句 ~ 不去問理由 ~)
我見到…我見到小倩佢…
(仍踏著前路走 ~ 青春走到白頭 ~)
一頭白雪，痛苦咁喺雪地爬行…
(成功只有靠堅守信心奮鬥 ~)
佢望到我…
即刻就衝埋嚟…
「家明！」佢攬住咗我喺度喊。
「老婆，你攪咩啊？」「盲俠」問阿信。
「訓練佢囉。」
「咁訓練完未丫？」
「其實完咗好耐，但係見你哋未到，咪逼佢再練吓先囉。」
「咁成效點丫？」
「十分好！」
「多謝你啊，阿信前輩。」小倩突然另轉頭咁講。
我第一時間係覺得佢俾阿信虐待到傻咗…
或者而家走得，所以講返D廢話應酬個癲婆，但係…
喺之後嘅日子，我先發現阿信嘅所教，小倩嘅所學係好勁嫁！
(待續)
下集預告︰
隱形斗篷…
註腳︰
首歌係《阿信的故事》。