米米蓮妖怪作品 -《旅行‧如此‧難以忘‧記 》(百集長篇): 第108集 ~ 欣︰「先生」好勁呀！家姐都好勁呀！
第108集 ~ 欣︰「先生」好勁啊！家姐都好勁啊！
乜阿明佢咁好運嫁，咁跌法都死唔去？
(你好想我死咩？)
Eee…關我咩事噃，我睇返「先生」打「南轅」好過…
免得大家太亂，我先講講我呢邊嘅上次打成點先…
「南轅」個大蕃薯令「大惡鬼」重生…
「大惡鬼」仲分咗身做一堆飄浮嘅人頭同四個身體出嚟…
「鱷魚」﹑「巨蟲」﹑「癲狗」﹑「蛇女」美杜莎…
但係都俾「先生」﹑「荷瑪」同我一一打敗咗…
其他輝輝D同學同老師就陪家姐喺後面呆住咗。
而家，到「大蕃薯」喇。
「估唔到「南龍」嘅後人都唔錯噃，竟然連「青龍劍」都未出就打贏我嘅手下。」
「先生」回應佢話自己硬頸，所以死都唔用「青龍劍」…
不過就話會用嚟斬死「大蕃薯」。
「大蕃薯」亦都相應做返個強勢出嚟應對「先生」…
佢講完一段廢話就開始變身，壞人變身總係咁核突嘅…
一個個血泡喺佢塊面度爆開爆開再爆開…
一舊舊賤肉喺血泡度爆出爆出再爆出…
重複又重複之後，佢而家變成一隻有幾米高嘅血色人頭馬身嘅怪物…
頭上面仲有兩隻長角，就好似惡魔一樣，身上一把骷髏骨弓…
雙手就揸住一把染血嘅長鐮刀，就好似準備收割人頭一樣…
「哈哈哈，割頭鬼鐮刀！」
佢一堆鬼影分身，迅間就嚟到「先生」面前…
但係「先生」佢…
「係到你出場嘅時候喇，白氏家傳之寶，「青龍劍」出鞘！」
「百寶盒」中發出青翠閃色，仲有一條劍氣飛出…
係上次「先生」佢俾我哋睇過嘅「青龍劍」啊！
劍氣逼到…eee…而家叫「大蕃薯」，好似唔係咁啱，不如叫住佢做…
「血面刀魔」啦，好似形容得貼切D。
「青龍劍」嘅劍氣逼到「血面刀魔」收起「鬼鐮刀」，退縮一邊…
「青龍劍」隨即飛到「先生」手上…
「開頭仲諗住嚟打吓鬼頭啫，點知要打D哽嘢！」「先生」咁講。
「哈哈哈，哽啊呢？」「血面刀魔」回應。
「不過越哽越好，身為一個學道之士，學有所用，仲可以挑戰強敵，實在人生一大樂事，我以為一世人都冇機會用到「青龍劍」嫁喇，而家我血脈沸騰，嚟啦，邪魔外道，接我神劍啦！」
「割頭鬼鐮刀！」
「紫青合一﹒青龍神劍！」
「鬼鐮刀」比之前嗰吓仲要勁，如果唔擋，我肯定呢度所有嘢都俾佢一掃而光…
但係好在有「青龍神劍」，劍光形成青光巨柱擋住咗「鬼鐮刀」嘅攻擊…
「哼，呢吓我睇你點擋！」
「血面刀魔」一個閃身，退後幾步，就喺身上抆出「骷髏骨弓」…
「惡靈萬箭穿心！」
迅間有好多好多支箭，帶住骷髏妖氣，射向「先生」…
「皇龍真金甲！」
「先生」別無他法，只好強行抵擋…
但係「血面刀魔」根本冇俾空間「先生」休息，一直就步步進逼…
「惡靈百步穿揚！」
呢吓直情係想射穿「先生」嘅「金甲」…
「白龍飛天！」
「想避？惡靈穿雲箭！」
一支強大力量嘅箭由上而下直插「先生」頭頂…
「奧義﹒天龍羽翼，飛！」
「先生」再次閃躲，但係…
「割頭鬼鐮刀！」
「血面刀魔」迅間轉返用「鬼鐮刀」以高速幻影斬向「先生」！
「哇~！」
「先生！」我大嗌
「先生」佢真係正中呢一招，而家…
「先生」佢跌咗喺地下度，似乎身受重傷咁。
一陣陣嘅絕望感亦從此而生…
我…我仲可以點啊？
「荷瑪，變身啦！」係家姐啊！佢起咗身大嗌啊！
「荷瑪」即刻飛返去家姐度…
(圓圈加一點~ 圓圈加一點~)
(下面畫枝波板糖~)
(再畫個呼拉圈~ 再畫個呼拉圈~)
「機械貓﹒叮噹(即係多啦A夢)！」
家姐變成「叮噹」，再喺肚皮個袋度攞出D嘢…
「縮小光線！」
仲以「林保全」先生嘅聲音發出，我哋嘅希望亦從此而生喇！
「吓~！咩事啊？」
「血面刀魔」俾「縮小光線」射中，而家縮到越嚟越細…
「不如我哋用「隨意門」走啦！」我突然諗到就問。
「唔得，「隨意門」救得你救得我，但係救唔到後面班人同阿輝佢哋。」
「叮噹」回應完我，轉個頭就同「血面刀魔」講︰—
「哈，魔鬼(家姐對「血面刀魔」嘅叫法)，而家睇你點惡。」
「叮噹」行咗埋去縮細咗嘅「血面刀魔」度，仲想一腳踩落去…
「妹妹！」「先生」突然大嗌…
「你過一過嚟。」
「叮噹」變返做家姐，停咗腳，冇踩到落去…
我八卦起嚟都行咗埋去…
「先生」好細聲咁講俾我哋兩姊妹聽…
「呢隻嘢嘅妖氣冇變，我諗你只係將佢體形變咗，佢力量依然喺度，而家，我估佢自己都未知，所以你哋就拖一拖佢時間先，我會有辦法嫁喇。」
家姐及個頭，好似知道點做，就另返轉頭…
「魔鬼你好彩，解籤先生幫你求情，我就蹺你不死，不過你而家自轉十萬次先啦。」
「多謝女俠蹺命。」
佢之後真係傻到喺度自轉…
「你哋去睇吓D男仔有冇事先，我自己運氣療傷就好。」「先生」咁講。
我哋去咗望望D男仔，發覺佢哋仲係傻傻戇戇咁，根本冇嘢要理…
………
時間過咗一陣…
「咦！」
呢個「咦」唔係普通嘅「咦」，似係「血面刀魔」發現咗D嘢…
仲好可能會對我哋生命有所威脅…
「我發現我力量根本冇少到，只係體形變細咗，你哋呃我？」
「血面刀魔」說話嘅語氣好凶狠。
「得鬼閒呃你啊？咁你係咪想試吓俾我踩死丫？」
家姐不但止冇驚，仲以高傲嘅語氣，自信滿滿咁回應佢。
「Eee…對唔住啊，女俠，我自轉，仲有九萬八千次。」
「血面刀魔」再次俾家姐呃咗，不過睇嚟都呃得唔耐喇…
我望一望「先生」，佢好似好返好多喇。
希望佢趕得切回復力量去打「血面刀魔」啦。
(餐 ~！)
一條石柱突然斷裂…
(嘭 ~！趴勒勒 ~！) 仲跌咗喺地，裂成石碎…
「原來你哋真係呃我，好在我聰明，攞條石柱嚟試吓我嘅力量啫。」
「血面刀魔」似乎已經確認到佢自己嘅力量根本冇少到。
「真係把幾火，係要話我呃你呀？自轉又唔做足，我而家就過嚟踩死你！」
家姐…家姐竟然仲要拋浪頭，但係…
「Sorry，Sorry，仲有九萬七千次五百次。」
我真係睇唔起呢隻「血面刀魔」囉，竟然俾家姐拋一拋…
就又再驚死，唔敢發惡。
………
「90000，89999，89998，89997…」
「夠喇，南轅！」「先生」嗌。
「89996，89995，89994，89993…」
但係「血面刀魔」仲自轉緊…
「解籤先生，你有信心打敗佢嗱？」家姐細聲問。
「係啊，頭先佢步步進逼，我冇時間運勁啫，唔係一早就打得死佢。」
「好，魔鬼，你唔使自轉喇！」家姐同「血面刀魔」講。
「真架？」
「你而家公轉啦，圍住呢個城轉…五萬次算啦！」
「哈哈哈，唔使喇，南轅，出手啦，我哋係呃你咋！」「先生」講。
「血面刀魔」開頭呆咗一陣…
「吓，呃我！？…丫！」
再而揮動「鬼鐮刀」衝向「先生」…
「九龍伏魔訣奧義﹒紫青雙神合一﹒日，月，神，劍！」
(嘭嘭嘭嘭嘭嘭嘭嘭嘭嘭 ~)
(待續)
下集預告︰
「鳳凰火炎當年已經唔見咗，我都唔知佢去咗邊。」
註解︰
(1) 叮噹 — 即係而家嘅動漫《多啦A夢》。
(2) 縮小光線﹑隨意門 — 叮噹嘅法寶。
(3) 林保全 — 叮噹御用配音員。佢個名嘅出現，我係想向佢致敬啫，佢把聲真係陪住我呢代長大嘅。
(4) 拋浪頭 — 虛張聲勢。