米米蓮妖怪作品 -《旅行‧如此‧難以忘‧記 》(百集長篇): 第106集 ~ 輝︰「達叔」同「光管陳」我都冇眼睇，自己打好過…
第106集 ~ 輝︰「達叔」同「光管陳」我都冇眼睇，自己打好過…
我嘅「慧眼」終於俾我發現咗，佢仲幫我手打緊D石像怪。
至於「達叔」同「光管陳」就分別變成「達摩」同「火鳳仙人」。
「達摩」只係因為我見佢光頭又有D霸氣先咁叫，實際佢係咩，我真係唔知。
「火鳳仙人」並唔係咩真係「仙人」，我估只係佢哋死去嘅師父或者師祖之類…
不過霸氣就真係十足，力量都非常之勁。
幾吓手就打到「余二十」由粉腸變成油炸鬼咁，口腫面腫…
而家佢仲訓咗喺地。
「估唔到你哋都幾勁，睇嚟一招「魔雨斜照」唔夠同你哋打…」「余二十」講。
之後佢企返起身，做起手印，有D似「光管陳」平時做嗰D…
「石膚退去，大銅武神！」
佢身後面嗰個巨型神明突然郁起嚟，石層嘅表面變成碎石跌晒落嚟…
裡面嘅古銅色皮膚就顯現出嚟，仲要佢D皮膚真係銅嚟…
呢個叫「大銅武神」嘅巨像，英明神武…
雙手按住一把巨劍，巨劍向下插喺地上面…
「石兵增援，將軍出征！」「余二十」再嗌…
之後就突然唔知喺邊度又嚟咗一大咋石兵增援，仲好似有D係高階D咁…
一個狀似將軍嘅石兵企得較高，再「哈」一聲大叫…
之後班石兵就排成一個圓型嘅陣…
至於佢自己本人就…
「九曲追魂，邪劍歸位！」
一講完啫，就有九把帶住骷髏頭同充滿妖氣嘅劍飛到佢身後…
好似蓄勢待發咁…
「阿初，大銅武神等我嚟，你打余二十。」達叔咁講。
「好！」光管陳回應。
「自古英雄難過美人關！」達叔指住「大銅武神」講。
「唔係同講我丫嘛？」「悉英雄」咁問。
「慳D啦你！」我講。
之後「達叔」就變得同「大銅武神」一樣巨大，再變成…
我由下至上咁望佢，一對高踭鞋，橙色短裙，水手服，唔通係…
「美少女戰士﹒愛野美奈子？！」我再向上望…
「唔係，我係—愛野戰美奈子！」達叔咁講。
仲要一幅扮晒可愛嘅樣，但係…
我見到佢個頭仲係「達摩」咁，我真係想自殺死咗去…
「好Q…醜樣啊！你老味！」「大銅武神」都忍唔住嗌起嚟。
佢仲雙手提起巨劍就兜頭劈落「達叔」度…
真係唔好話我手指拗出唔拗入，我真係表示十分支持「大銅武神」斬死佢。
(攀 ~！)
「哎吔！」「達叔」個頭當堂起咗個瘤。
「YEAH！」全場一片掌聲。
「女人都打？」「達叔」問。
「師兄，你變少咗個頭啊。」「光管陳」尷尬咁講。
「係噃，再變！」「達叔」大嗌。
佢企返起身，再次變身，呢一變就唔同喇…
真係變出閃閃長髮，眼大鼻高嘴細細，好可愛嘅美奈子啊！
而我同一堆石像都忍唔住向佢裙底一(目及)…
結果隔夜奶都嘔埋出嚟，佢下面凸起嚟嫁！
呢一刻石像兵被石化咗，「居居」反咗肚，「悉英雄」去咗洗佢唯一嘅眼…
而我就繼續嘔我嘅奶。
至於兩位高人，「光管陳」同「余二十」就一於好少理，佢哋亦都開咗拖…
「九曲追魂劍！」
嗰九把邪劍就飛向「光管陳」…
「玉麟金劍，擘天式！」
「我閃！」
「余二十」果然唔係等閒之輩，佢係我見過唯一一個可以避開呢招嘅人！
「我避！」
「光管陳」亦都不甘示弱，避開咗「九曲追魂劍」嘅攻擊…
但係叫得「追魂劍」，嗰九把嘢真係好似追數咁追，死追佢唔放…
「睇嚟要出「鳳凰七重天」喇！」「光管陳」咁講。
佢講到好似呢個絕技，可以用嚟打敗「余二十」咁。
「鳳凰七重天﹒飛鳳炎鱗！」佢一連飛出幾十支火焰鏢。
一邊擋住「追魂劍」嘅來勢，一邊反攻返「余二十」…
「我再閃！」
「我再避！」
佢哋兩個就係咁，一直你打我打你，你閃我又避咁…
原來高手過招真係會咁，閒閒地幾百個回合，但係個個回合都差唔多…
睇得耐真係有D悶，都係轉去睇其他嘢好…
「鳳凰擺架！」原來達叔都識呢招。
本來一招扭動PATPAT嘅招式，配上天使面貌嘅女性去做，堪稱一絕…
但係由一個有J嘅女性去做，就變成堪稱死絕，觀眾們死絕…
所以，我都係決定放棄呢邊視角，睇返自己先。
唔講唔覺，一講就覺，點解D石兵一直都唔攻擊我嘅？唔通佢哋都睇緊戲？
但係唔係噃，佢哋原來一直啤住我，咁點解唔出手呢？
「哈哈，我呢個圓型陣勢，堪稱宇宙第一防守陣，睇你點攻破！」石兵將軍講。
噢，唔怪得知佢唔攻啦，原來仲守緊。
我本來想繼續唔同佢打，再去睇多陣戲，但係我發覺…
我真係唔啱睇文藝片同四級重口味，所以我決定自己出手打陣好過…
「英雄！洗完眼未啊？居居，唔好玩扮死喇！」
講完佢哋好快就返埋我度…
「頭先真係差D盲啊！」「悉英雄」講。
「汪 ~！ 汪 ~！」
石兵佢哋講到個守陣咁勁，我當然冇咁蠢，就咁同佢哋打啦…
「你哋咁多人都唔攻我，反而死守，你哋知唔知醜嫁？」
我想激吓佢哋，點知佢哋竟然一齊另頭，成班都真係唔知醜，好在…
「三角攻擊陣！」佢哋個石將軍知醜就夠喇！
「好！就等我趙子龍上身，百萬軍中救阿斗！」我大嗌。
「屙咩豆話？」「英雄」嘅廢話我當然冇理。
我手執三尖兩刃銀槍，騎乘「居居」呢隻白獅，再…
被「英雄」呢隻「慧眼」所騎乘，直衝入去石兵群中，目的只有一個…
當然唔係懶有型，而係「擒賊先擒王」，我要一擊即斃佢哋個將軍！
(待續)
下集預告︰
「心靈封鎖！」…「阿狗，靠，晒，你，喇！」
註解︰
(1) 有J嘅女性 — 個「J」字講緊男人性器官。
(2) 文藝片 — 呢度你形容緊好悶嘅戲。
(3) 四級重口味 — 「四級」應該係香港獨有。十八禁色情暴力片，之所以四級，主要係因為冇格仔。「重口味」意思係老人家先啱嘅口味。