米米蓮妖怪作品 -《旅行‧如此‧難以忘‧記 》(百集長篇): 第103集 ~ 輝︰終於俾我搵到「慧眼」喇！
第103集 ~ 輝︰終於俾我搵到「慧眼」喇！
估唔到欣欣嗰邊要對上「南轅」個死人「大蕃薯」，而我呢邊…
冇錯，就係要對「西斜」呢條「粉腸」，佢一身灰色長袍，手腳面都白璽璽咁…
再加上佢長而瘦嘅身體，話佢係「粉腸」真係實在太貼切喇。
佢喺黑暗之中講嘢…
「唔使望喇，呢度係個丫字型石殿，由四個石殿組成，三個小石殿可以通向中間嘅大石殿，而我，就係你哋呢度嘅對手。」
「超，扮乜差嘢大龍鳳啫，出嚟就出嚟啦！」
我唔知係咪受到呢度黑暗嘅環境影響，我講嘢都粗鄙咗。
「達叔」同「光管陳」都呆咗咁望住我，就連「居居」都炒起佢D前蔭望埋嚟…
「咩啫，有你哋兩個高人喺度，我放肆吓都得呱。」
「你又講得冇錯。」
「光管陳」講完呢句就另返轉頭望住條「粉腸」，佢再講︰—
「粉腸…丫，唔好意思，不過真係太似喇，講返正經先，你唔好彩喇，有我哋兩師兄弟喺度，你贏嘅機會只會係零。」
「光管陳」唔知係咪都受環境影響呢？佢變得咁佻皮嘅？
「阿初，你幾十歲人喇，仲扮乜鬼嘢可愛啊？」
「哈哈，見返師兄你，就好似返去細個嗰陣咁，記唔記得我哋一齊學打野豬啊？」
「哈哈，記得，當年你俾野豬追到喊丫嘛！」
「喂！！！你哋有冇當過我存在嫁？」余二十大嗌。
「哈哈，係啊，係啊，當年隻野豬成隻人咁大啊，點會唔驚啊？」
「真係好懷念啊。」達叔搲搲個頭。
「我頂你哋個肺丫，真係當我冇到！靚仔！」余二十突然向我大嗌。
「想點啊，粉腸？」我問。
「丫！太好喇，終於有人理吓我喇，好！我就饒你不死。」
「咁SO？」
「就係咁SO，不過…我饒你，我D徙弟未必饒你噃，嘻嘻嘻…」
「咁你即係想點啫？」我一線眼啤住佢。
「兩旁D石像，閒閒地都有千幾二千個，佢哋都係我D徙弟。」
「咩你咁奇怪，鍾意收石頭做徙弟嘅？」
「石頭！？哈哈哈，石頭只係佢哋表面…」
「表面！？」
「佢哋裡面都係活生生嘅內臟，我幫佢哋換晒做石頭外殼咋，哈哈哈。」
佢講到咁，我忍唔住望一望D石像，又真係好似有生命咁，突然有D心寒添…
「喂，野狼嗰次呢，你記唔記得啊？」
「記得，咬甩你條褲嗰次丫嘛，哈哈哈哈…」
佢哋兩條友竟然仲講緊陳年舊事，可唔可以專重吓呢個咁嚴肅嘅戰場啊。
「喂！到我頂你兩個唔順喇！尊重吓人哋得唔得啊？人哋雖然係粉腸啫！但係都有阿媽生嫁！」
「你肯定？！」佢哋兩個突然超齊咁另個頭過嚟問我。
「你哋啱，我唔肯定。」我淆底，所以咁講。
「好啦！我哋兩師兄弟打余二十，你就同你隻狗仔打佢徒弟啦！」
「你哋就二打一，我就二打一千？」
「咁你係咪想同余二十打丫？」
「我…我意思係你哋咁「高手」，係咪一個打余二十，一個打徒弟好D啊？」
「咁你仲有乜嘢用啊？」佢哋齊聲。
身為一個男人，俾人咁串法，我冇辦法唔發脾四潑出去，一個人去一抽一千…
「放心啦！你有「慧眼」，一定夠打嘅，就當練習吓啦！」
又係一番唔負責任嘅說話，唉…
「石兵啟動，幫我處理咗呢個小朋友佢！」余二十大嗌。
我見到兩旁嘅石像郁起嚟，仲向我衝埋嚟…
「三尖兩刃槍！居居！變身！」
我喺個袋抆返「龍也」俾我嗰條「芝士腸」嚟用…
再叫埋「居居」變身白色巨獅…
(呯呯 ~ 叭叭 ~ 呯呯 ~ 叭叭 ~)
我哋一隻一隻咁打開佢哋，但係佢哋唔似之前見過嘅石像鬼怪咁廢，有D仲…
「我頂！識得出妖術火球嚟遠攻我嘅，有D又用水術，整到個地濕Q晒…」
我唯有盡力去避…
「嘩，唔係啊？D水仲要喺下身出…會唔會有D嘔心啊？丫！」
我唔小心跣低埋，佢哋仲即刻幾個火球掟埋我度…
「居居」已經幫我擋咗幾個，但係無奈真係太多…
我只好訓咗喺地下，合埋雙眼，諗住要硬食其中一個火球…
(蕉 ~！)
………
兩秒之後，我擘大返對眼…
「點解頭先個火球冇打中我嫁？」
「汪~！汪~！」
「居居」話我聽我頭頂有D嘢，係佢救咗我…
我見痕痕地，所以就隊隻手上去搲，點知…
我喺頭頂度捉咗「鬼太郎」個老豆落嚟啊！
「你…你係？」我呆咗咁問佢。
「我叫悉英雄，「慧眼」悉英雄！」
呢一吓，我唔知好嬲定好笑，但係，我決定咁做…
「英雄，靠晒你喇！」我一手就將佢掟咗去最多石像遠攻兵嗰度…
(蕉~~~~~！) 一條黃光射線攪掂咗一大堆石像怪。
「點睇啊，主人？我係咪好勁先？」佢叉住條腰懶醒咁問我。
「勁就勁，但係可唔可以唔好咁X-MEN啊？」
「好！唯命是從！呢招肯定冇正派用過，最少冇我咁恐怖…」
「無，限，眼，分，身！」
「我頂！」真係好Q恐怖啊，佢D眼球仲多過海水，將D石像沖晒去冇底深淵…
「夠喇！」
眼球海好快就聽我指令消失晒，場內亦只淨返唔夠十分一嘅石像怪…
而家可以慢慢打，順便可以睇吓「達叔」同「光管陳」佢哋打成點…
但係估唔到…
佢哋兩個竟然處於下風！？
我見到余二十就企喺度奸笑，而佢哋就單腳跪低咗，口邊仲有D血絲…
「點啊？我嘅「魔雨斜照」勁唔勁啊？避到咁多你哋都算唔錯嫁喇！」
余二十一副不可一世嘅衰樣，但係究竟佢點樣傷「達叔」同「光管陳」嘅呢？
「嘻，頭先我哋淨係避，當然咁啦，而家到我哋出招喇！」「光管陳」講。
「鍾馗應該唔夠打喇，一出就出D硬嘢啦！火鳳仙人！」
(縫~~~！)
「嘩！」呢吓我嗌嘅。
火光紅紅，霸氣十足，「光管陳」「縫」一聲變咗隻火雞…
丫，唔係，係鳳凰，D頭飾﹑身上裝飾同佢件飲衫，完全唔知邊度嚟…
唔知係咪請神送嘅呢？但係真係…真係太有型喇！
紅衣金線，怒髮沖冠，雙手配上唔襯佢嘅大舊肌肉…
再加上佢擺起側身另側頭嘅甫士，真係…
另一邊，又係咁樣，「達叔」已經唔係「達叔」，而家變咗做「達摩」…
人變身佢變身，變出一個光頭，最攞命就係佢光頭得嚟，都仲咁有型…
「你哋想點啊？」余二十問。
「純粹擺返個靚甫士，吸引D女粉絲！」佢哋齊聲。
「咁打得未啊？」我大嗌！
之後，「達叔」首先出手…
「達摩神掌！」一吓打埋去余二十度…
「魔雨斜照！」
原來呢招會令佢身體斜成影狀，對手打唔到佢之餘，仲可以迅間移位。
「哼，你以為達摩神掌就係咁簡單咩？混元結氣！」
「達叔」將手掌轉一轉，四周圍能量聚結，佢再一吓…
「神掌破曉！」一吓直掌震返埋去余二十度…
「哇丫~！」仲將佢打到飛起…
「到我喇！」「光管陳」大嗌。
「直刺式！」
「橫削式！」
「斜斬式！」
「旋風式！」
「順劈式！」
「拖劍式！」
「推刃式！」
「狗仔式！」
「你識我唔識！」
「我問你啊！你，識，唔，識，啊！」
佢一吓二吓打到余二十由粉腸變咗做腸粉，再變成油炸鬼咁…
(待續)
下集預告︰
你竟然將沙婆婆變成咁？
註解︰
(1) SO — Jetso，即係著數。
(2) 發脾四 — 發脾氣，發嬲。
(3) 潑出去 — 豁出去。
(4)「鬼太郎」個老豆 — 《鬼太郎》係日本漫畫，講打妖怪嘅，主角個名叫鬼太郎，係一個成日著住傳統日本木屐嘅男仔，至於佢老豆就係一隻眼球連住個細身體咁，成日匿喺「鬼太郎」D頭髮裡面嘅。
(5) X-MEN — 外國英雄漫畫。喺呢個故裡面其實係講緊呢套漫畫裡面嘅其中一隻角色，叫做鐳射眼，光線由雙眼射出，用嚟殺敵嘅。
(6) 硬嘢 — 較強勁的東西。
(7) 達摩 — 佛教中國禪宗第一代祖師。