米米蓮妖怪作品 -《旅行‧如此‧難以忘‧記 》(百集長篇): 第086集 ~ 明︰佢係邊個啊？佢係…井底之龜！？
第086集 ~ 明︰佢係邊個啊？佢係…井底之龜！？
你哋就好啦，咁人齊咁開心，我都想小倩而家喺我身邊…
呸呸呸，我喺佢身邊好D，唔係咪一齊喺井底等死。
「井底啤」你好喇吓，無端端喺水裡面隊對眼出嚟啤住我…
「我嚇大嫁！夠膽你就出嚟！」
(濮~~~~~~~~~！)
井水一直向下流，「井底啤」個頭露咗出嚟之後，條頸一直伸長…
我睇到擘大個口得個窿，心諗，使唔使咁長啊？
「尼，斯，湖，水，怪，啊！」
佢啤住我一陣…
我唔啤返佢又驚俾佢一啖食咗都冇反應，但係又唔敢直視佢咁…
「人類！？」佢開口講嘢。
我唔應佢又唔係咁，應佢又好似挑佢機咁，還死掂死，答佢啦！
「係啊！吹咩！？」
「哇，好似好耐冇見過人類喇！仲要咁串嘴！」
佢嘅笑容就好似好耐冇食過人類咁，我唯有試吓我唯一識嘅嘢啦…唉…
「隱身咒。」佢咁大隻，「九字護身咒」都冇用啦。
「哈哈哈哈哈，而家D人類咁攪笑嘅，唔係以為咁樣篤一篤就可以隱身呀！？笑死我喇！哈哈哈哈哈！」
唔通…佢唔係妖怪！？但係…佢擺明就係妖怪！佢咁笑我，攪到我火火地添…
「有乜好笑啫，信唔信我打爆你個龜頭丫嗱！？」
「你果然唔係普通人，連我係龜你都知，冇錯，我就係「井底之龜」！」
「咩話！？「井底之龜」！？」
佢及咗吓頭，我咪再講囉…
「唔好話我聽你同「井底之蛙」有關繫啊？仲有，乜龜有咁長條頸嫁咩？」
「我叫「十里洋腸」，外國進口日本，當興奮嘅時候，條頸就會變長變硬。至於名震井底嘅「井底之蛙」，你果然唔係等閒之輩，好話喇，「井底之蛙」就係我師父。」
我真係完全唔明白點解佢仲可以講到自己咁威咁，但係佢冇食我…
似乎我仲有生存空間，唯有敷衍吓佢…
「冇錯！我就係你師父「井底之蛙」嘅朋友，住喺井上面嘅「井上雄彥」！」
「原來你就係「井上雄彥」先生？我仰慕咗你好耐喇！你套「男兒當入樽」我真係返睇再返睇，請問幾時有結局呢？」
咦，係時候打蛇隨棍上喇噃！
「我其實已經寫緊，但係奈何我而家喺呢度，又點寫呢？」
「你講俾我聽咪得囉！」
「你係咪睇漫畫嫁？咁嘅嘢你都講得出嘅？你簡直侮辱咗漫畫，快D帶我離開呢度！」
「離開呢度！？井上先生，唔好意思，我自己都做唔到啊！不過…」
「不過咩啊？」
「我有紙筆墨硯，不如你喺度畫丫！」
我第一時間有D無奈，再而有D火滾，再而…
咦，有紙筆墨硯！？雖然離開唔到井底，但係…唔通佢可以帶我去另一個空間？
「咁就快D攞出嚟啦！」
「喺我個胃度！」
「我真係…」
好想小佢媽媽個那星，不過都係算啦，怪物個媽媽都唔係好嘢…
「我淨係想離開呢度，慢慢畫我嘅漫畫咋…」我真係當咗自己係「井上雄彥」添。
「離開到呢度嘅…淨係得我師父「井底之蛙」咋，不過…丫！佢有將佢畢身絕學寫咗喺井底。」
「井底！？」
「你跟我去丫！跳入我個口度丫！」
點解咁似「警訊」D騙案嘅！？
不過講真，如果佢係要食我，我一早都俾佢食咗啦，姑且信佢啦！
所以我就先同小倩同阿公佢哋講聲…
「小倩，阿公，我跟隻…朋友去搵方法離開呢度，唔知幾耐先返，你哋要等我呀！」
「咩話？聽唔清楚你講咩啊！」
「你去死啦！」
「我咪死咗囉！我問你頭先講咩啊？」
我完全唔想再理「阿公」佢，所以即刻就揚手…
叫「十里洋腸」個頭落嚟，等我走入去佢個口度先…
…
入到去…又唔係好恐佈噃，但係…我見到佢身體裡面D嘢，真係…
想喊出嚟，唔係講笑嫁，係因為佢身體裡面好多損傷…
都係由呢度雜物做成，而且…
明顯呢D雜物都係井上面嘅人揼落嚟，可想而知…
佢就係靠食呢D垃圾為生，所以…
「我…「井上雄彥」向天發誓，如果我可以離開到呢個井，我一定會報答「十里洋腸」！最少，帶佢食返餐好嘅！」
(洪~~~~~~~~~！)
「乜事啊？」
「死喇！井上先生，你講嘢太感動喇，我唔小心吞咗啖水啊！」
「吓！哇丫！」
………
我一擘大返眼就喺…呢度邊度嚟嫁？似乎過咗一段時間，而我旁邊…
「十里洋腸！？」
「係啊！井上先生！你醒返就好喇！」
「點解…你咁細隻嘅？」
「多謝你啊！頭先你感動咗我，我一喊，整到我塞咗幾十年嘅便便都屙晒出嚟啊，而家身材都靚返晒喇！」
佢咁講，我淨係諗到…佢連我都屙埋出嚟，我真係…想收返之前所發嘅誓。
佢而家係一隻同我身型差唔多大嘅烏龜，咦，好似形容得有D蠢添。
至於呢度…井水喺上面浮吓浮吓咁，竟然冇跌落嚟…
呢度空間唔算太大，但係夠晒開PARTY…
上面嘅井水清澈發亮，呢度真係靚得有D過份…
我心諗，呢度邊個整出嚟嫁呢？
仲有，「井底之蛙」其實會唔會都係人呢？
「離開井底嘅方法就喺呢度！」「洋腸」突然咁講。
「呢度！？」
我衝去「洋腸」旁邊一睇…
「洋腸，你又玩我喇！日文嚟嘅？」
「井上先生唔係日本人咩？」
我差D就穿煲…
「其實…我係唔識字嫁，唔係使乜畫公仔丫，不如，你解釋我聽丫！」
「井上先生，我同你實在太夾喇，我就係因為唔識字，所以咁多年嚟都學唔識，離開唔到呢度…」
呢一刻，我嘅夢想又幻滅喇，究竟…我可以點樣先離開到呢？
定係…我要喺度死呢？
「其實…呢度有D圖畫嘅，但係我參唔透。」「洋腸」行咗去另一邊再講。
我再行上前一睇…
我終於確定「井底之蛙」真係青蛙，邊有人仲咁得閒玩呢樣嘢丫！？
「呢D係…青蛙青蛙跳！？」
十幾個圖案都係兩隻手對戰咁，趴喺度舉起一隻手指…
………
之後，我喺度搵勻晒都冇再搵到其他嘢，而「洋腸」佢又一直喺度話「井底之蛙」就係用呢D嘢，之後跳跳跳跳跳咁就跳咗出井。
「係呢，洋腸，你話佢係你師父，點解佢唔帶你走啊？」
「其實…其實…其實我都唔知點解，我真係好仰慕佢，佢又真係好厲害嫁，但係…我用我之前嘅身體，將佢送到最高點，佢再用呢幾招跳上去，之後…我就再冇見過佢喇，我有懷疑過…佢究竟係咪呃我，但係…」
喺呢一刻，我覺得佢好似之前嘅我，所以我拍一拍佢個龜頭…
「你要信佢啊！你同佢一齊經歷過嘅所有嘢唔會係假，只要你信，力量就會嚟嫁喇。你亦都要相信，我哋係可以離開呢度嘅，知道嗎？」
「知道！」
………
我哋暫時冇再諗到其他辦法，所以就試吓跟住D圖案做…
我兩隻手，兩隻腳，甚至全身，再同「洋腸」佢一齊對住做…
做做吓，我仲試吓同佢玩吓「青蛙青蛙跳」…
好奇怪，以前淨係會用手玩，或者最多都係用身體玩，但係原來全身一齊玩…
即係例如同時舉起右手﹑無名指同第四隻腳趾…
成個身體會變得好熱咁，我同「洋腸」就係咁，一直一齊玩…
玩到攰，坐咗喺地度傻笑…
「哈哈哈哈哈！」總算係苦中作樂丫。
之後，我雙手噤地起身，突然…
(啪~！)(噗~！)「哎吔！」
我一推個地下，就成個人飛起咗，仲撞咗上頂，跌返落地…
攪到我幾鬼死痛啊！但係…
咦，點解…我個人咁輕嘅？
我望望自己雙手，再望望自己雙腳，再試吓一吓跳起…
(啪~！)(噗~！)「哎吔！」
咦，得噃！我好似成個輕到識飛咁。
「喂，洋腸你起身都試吓丫！」
「試吓好似你咁，躂到攤攤腰呀？」
「唔係啊，試吓係咪成個人輕晒？」
之後，我同佢都証明咗呢招係得嫁，似乎呢招可以幫我哋離開呢度啊！
(待續)
下集預告︰
「天，馬，行，空！」