米米蓮妖怪作品 -《旅行‧如此‧難以忘‧記 》(百集長篇): 第077集 ~ 明︰大袋又俾蛇咬咗啖，阿輝又有道召鬼符。
第077集 ~ 明︰大袋又俾蛇咬咗啖，阿輝又有道召鬼符。
「米米蓮」到手之後，我突然聽到內街個市雜好嘈，咪行埋去睇吓囉。
點知離遠見到有條友脅持住阿張，「光管陳」同「鐵拳」就同條友談判緊。
我第一時間即刻就諗到阿輝佢哋班死仔，想搵佢哋幫手。
所以我就四圍搵佢哋，好快就喺河邊搵到阿輝同阿欣。
「大袋」同阿欣家姐唔知去咗邊，「喪狗」就喺我哋跑返去內街途中遇到。
我哋返到埋去，即刻搵個好位走上前…
我見到個癲佬真係純粹得個癲字，完全唔知乜嘢原因脅持阿張，咪住先，唔通佢知阿張老豆有錢？
不過好快，我嘅疑問就被解答，原來係因為件有邪氣嘅銅器，簡單嚟講，條癲佬俾隻「癲雞」上身。
「!@$%^！!@^@$$@#^！」隻「癲雞」噏咗一輪嘢。
「喪狗」喺我耳邊講我聽，原來隻「癲雞」話阿張點過佢，佢要同阿張成親，仲話要見阿張父母。
我心諗，點吓啫，唔係會生BB呀！？仲要見人哋父母，佢真係癲得勻循。
之後「鐵拳」叫我哋退後，我哋就慢慢退後。
「!@^$#%@^！!@^!$!@^！」隻「癲雞」又發癲唔知噏乜。
「喪狗」冇解釋呢句，但係佢突然「噴飯」。
「條「鐵拳」白痴架，認自己係阿張老豆…」佢細細聲同我講。
「扮住先啫，有咩問題呀？」我問。
「佢仲話「光管陳」係阿張阿媽呀！」
呢一吓，我真係呆咗，仲覺得好灰，一直教我哋嘅「鐵拳」原來係條低能仔。
「咪住先，呢句有道理噃。」「喪狗」突然咁講。
「點樣呀？點樣呀？」
「佢叫個癲佬如果唔信，就望吓「光管陳」對腳。」
呢句真係，不能認同更多，原來佢唔低能得晒。
淨係睇對腳，話「光管陳」係女人，肯定有說服力，隻「癲雞」好似仲信晒添。
之後隻「癲雞」仲越笑越奸，慢慢成個雞頭變晒出嚟，仲嚇到周圍D市民雞飛狗走。
丫，唔好意思，我冇意思話D市民係狗。
「哼！個癲佬變成妖怪仲好！我更加易攪掂佢！」「光管陳」竟然咁有信心！？
不過如果佢都冇，我哋真係死得，何況隻嘢咁「雞」，又真係點睇都唔似勁得過之前隻「骷髏武士」嘅。
「死喇！」「喪狗」突然咁講。
「咩事呀？又咩事呀？」
「癲佬身上隻邪靈就信晒「光管陳」係阿張阿媽，但係個癲佬本身原來好清醒，佢仲提醒隻邪靈話「光管陳」有鬚根，唔係女人呀！」
我頂！佢做乜鬼嘢唔剃乾淨D鬚根呀！？
點知我諗都未諗完，隻「癲雞」突然一刀劈落去，我估應該係個癲佬嘅意識想獨佔「癲雞」，所以想殺死阿張。
「鐵拳」第一時間衝咗前去…
淨係負責阻住大家。而校長…
原來比佢更快衝咗埋去，佢背脊就咁硬食咗呢一刀，我真係…成個人呆咗。
「蝦，直刺式！拖劍式！推刃式！旋風式！玉麟金劍！擎，天，式！」
我就係咁，呆住咁睇「光管陳」表演，直至「擎天式」嗰一吓「插~」一聲，我先可以回復返過嚟。
「癲雞」再唔識發癲，淨係訓咗喺度，變返癲佬樣，佢之後俾到場嘅警察捉咗，D老師就一D去咗協助調查，一D去咗陪校長入醫院。
之後「光管陳」講咗一段關於校長嘅說話我先知，原來校長一直都唔係孌童癖，佢只係錫阿張，就好似自己親生仔一樣。
「耳聽三分假，眼看未為真」原來就係咁，呢一刻，我覺得父親真係好偉大，背脊硬頂一刀真係唔係小嘢。
………
正當我哋都想走嗰陣…
「呢個校章係邊個架！？」「光管陳」佢突然執起個校章咁講。
阿輝舉手表示係佢嘅，「光管陳」就遞俾佢睇，個校章…
裡面有張召鬼符！？
「哇丫~！」離遠有人大叫，似係個死仔「大袋」把聲噃。
我哋暫時冇理張召鬼符，立即就走去搵「大袋」。
行過兩條細街，近河邊位置，見到「大袋」暈咗，欣家姐就扶住佢。
我哋見到佢咁，即刻就走埋去佢度…
「家姐，袋袋佢做咩呀？」
「欣家姐，大袋佢做咩事呀？」
「欣家姐，大袋佢冇咩事丫嘛？」
「靚女，條大春袋未死得丫嘛？」
「佢…佢…佢頭先俾個醜樣男仔條大蛇咬親呀。」阿欣家姐喊晒口講。
「咩男仔嚟架？」
「係咪剝晒衫架？」
「咩話！？又俾佢咬咗啖？」
「男仔條大蛇！？該煨囉！」
「咪住先，上次條蛇咬佢，痛咗一吓就唔痛喇喎。」「喪狗」一線眼，表示懷疑咁講。
我見到「大袋」隻眼開隻眼閉咁同我哋打晒眼色，我諗大家都明佢想點啦，畫公仔唔使畫出腸嘅…
佢條友俟埋阿欣家姐心口，梗係好舒服頂啦。
「楊鉅祥(「大袋」全朵)，由而家起，你要一直跟住我行，我去邊你去邊，知唔知呀？」
「光管陳」睇嚟都知「大袋」係想索油，睇完佢膊頭個傷口，又係冇傷口，就咁講。
「好痛呀…好痛呀…唔跟得唔得架？」頂！個死人「大袋」仲扮嘢。
「阿袋，唔怪得你頭先唔講全名我知啦…不過唔緊要啦，一陣我同你一齊跟住陳老師行咪得囉。」阿欣家姐咁講，睇嚟佢哋發展唔錯噃。
但係，點解隻「鬼王」要放蛇咬「大袋」呢？仲要係兩次。仲要兩次都痛一吓就算。
我哋…我諗即使係「光管陳」佢，都應該諗唔明。
「大家似乎都見過晒，知道晒日本呢度好多妖怪啦，大家唔使驚，有事記得做好我教你哋護身咒就好。酒店係最安全嘅，因為嗰度有好多高人可以保護你哋，冇咩事就唔好離開酒店太耐。」
「邊個高人呀？有咩事起嚟，我哋去搵佢都好丫嘛。」
「酒店老闆達叔，櫃檯女職員阿妮，六樓有個黑人警衛，二樓有個大食肥婆，三樓六樓有一大堆外地傳教士，全部都保到你哋。不過佢哋有D係妖怪嚟，你哋唔使驚佢哋，佢哋係好妖。」
「光管陳」講呢堆人同妖，我淨係未見過黑人警衛。
「咁好，我諗大家都肚餓架喇，我哋而家去食嘢，食完嘢之後Kenny你帶隊返酒店，記得唔好四圍走喇。」
………
之後，我哋成班人一齊求其搵咗間快餐店食少少嘢就算，班死仔個個當咗「光管陳」係神咁，係咁問佢D法術嘢。
但係奇怪嘅係，佢哋點要求都好，「光管陳」都係唔肯教佢哋嘢，即使係「九字護身法」都冇。
成班友仔出去買嘢食，「光管陳」就留低我同阿輝…
「我哋團人似乎有人想害你。」佢同阿輝講。
「會唔會係同之前點錯我相嘅對手自殺死者有關呢？」
「係喎，之前學校裡面都傳得幾行架喎。但係…一隻小鬼唔會識咁多嘢。」
「「北轍」呀！我記得欣欣講過話喺廁所有隻「紙妖」同佢講，話佢混入咗我哋度。」
「估唔到你哋連「南轅北轍」呢D邪術士都識，但係…冇理由。「北轍」年紀應該唔細，唔會係學生，而D老師…」
「「黃仔」呀！佢…我記得佢尋日喺鬼廟同其他同學好唔同，佢好似乜嘢都運籌帷幄咁架！」
「黃Sir！？訓導主任係「北轍」？」
(待續)
下集預告︰
我都想跟埋去睇吓隻「千年石妖」呀。