米米蓮妖怪作品 -《旅行‧如此‧難以忘‧記 》(百集長篇): 第070集 ~ 輝︰原來班死仔都知道…仲俾我發現咗個真相！？
第070集 ~ 輝︰原來班死仔都知道…仲俾我發現咗個真相！？
阿明﹑欣欣同「光管陳」佢哋都喺晒13樓！？
當然啦，我當時點會知丫！
淨係知道自己啱啱離開咗阿狗同「大袋」個房，諗住返自己房訓，但係…
又唔知點解，我行行吓，諗諗吓，又唔想訓住噃。
唔知係咪仲沈醉緊喺同阿欣嗰一吻度呢？
咦，不過…點解好似唔見咗阿明嘅？
佢唔係戇居到走咗去為情自殺呀？
不如去班死仔個房度睇吓佢會唔會喺嗰度都好噃。
………
之後，我就去咗班死仔嗰個房。
「喂！你哋班死仔攪咩啊？」
咦！奇怪喇！點解佢哋床面連一隻啤牌都冇嘅！？
「我哋傾緊計喳嘛。」大寶講。
「傾計！？成班麻甩佬傾咩啊？傾女啊？見到有咩靚女啊？」
「唔係啊！你唔覺得呢次旅行好怪咩？」細寶回應。
「咪係囉！我哋都覺得好似好有問題，仲好危險咁！」阿倫和應。
「危險！？你哋見到D咩啊？」
佢哋唔通都見到D鬼怪？
「記唔記得玉珮嗰單嘢啊？」大寶講。
「仲有，我之前好似俾鬼迷過咁，但係我又唔敢肯定。」阿倫又和應。
「仲有添啊！記唔記得今日喺廟嗰度啊？」達明都出埋口。
「嗰度做乜啊？」
我扮唔知，睇吓佢哋見到幾多嘢先。
「你記唔記得啊？廟嗰度，我哋衝出武士石像廟呢，之後我哋就斷咗片喇！」
「大Lin雄」個死仔仲好講，咪就係因為佢做嘅「好事」囉。
「我哋綜合大家所見，發現大家都有類似嘅片段，發現…」達明咁講。
我記得「光管陳」講過佢哋應該只能睇到大約廿四份之一嘅情況，但係冇諗過…
佢哋原來可以綜合返埋一齊。
「發現幾個共同點，就係母夜叉，鬼武士，喪屍曾經喺廟出現過。」達明再講。
「仲有，「光管陳」同一個我哋唔識嘅老伯同佢哋打鬥過。」大Lin雄補充。
似乎佢哋都知道晒，咁點算好呢？我唯有再試試佢哋。
「我又唔覺有呢D印象噃！不過如果係有，你哋又會點做啊？」
「嗰D都唔計喇！你睇吓呢D相，嗰晚喺後樓梯同女仔影嘅，今日曬咗出嚟。」
阿華佢俾咗D相我睇，又真係幾心寒噃，仲記得當日我都在場，但係…
張相竟然得阿華一個人喺相中間好似好享受咁，真係越睇越恐佈。
「咁…你哋點啊？」
「我哋可以點丫？你都唔知，我哋頭先同「黃仔」講，仲俾佢鬧添啊！」
「咩話！？想提早返香港！？邊個俾你哋走啊！？未完，邊個都唔准走！」
達明學返「黃仔」當時嘅語氣，但係如果「黃仔」佢真係咁講，又好似好怪咁。
「咁你哋唔搵王Sir﹑「鐵拳」同條「淫蟲」佢哋傾吓？」
「王Sir同「鐵拳」你唔覺佢哋成日都唔喺度咩？佢哋原來都識D日本朋友住喺附近嫁，呢次旅行根本就係假公濟私。」阿華講。
「校長一早訓咗啦。」阿張講。
阿張同佢同房，當然最清楚啦。
我都唔知點同佢哋講好，唯有咁講啦︰—
「打波先嚟落雨，唔通連個天都唔鍾意我？」
「希望在明天丫嘛！」
嗱！佢哋自己講嫁咋，我同佢哋講咗聲，就咋咋啼走咗。
………
我真係自己一個返咗房訓，而家得返我一個，我諗好快就會訓著…
而家…諗吓欣欣都好噃，最衰佢俾家姐禁固住啦，唔係我使乜得個諗字丫，唉…
唉…哎…丫…丫吔！我個頭…好痛啊！
「救命啊！丫~！好痛啊！」
我個頭就係咁，一直咁痛，痛到我想死…
………
大約…我都唔知過咗幾耐喇，總知…
而家唔痛喇，但係成身汗，又訓唔到…
我唯有再去沖個涼啦。我真係諗唔明頭先發生乜事，無端端個頭痛到爆炸。
我好快咁就沖完涼，之後見仲未訓得，就走咗落去樓下。
其實我只係諗住去買包熱奶飲吓，睇吓會唔會好訓D，不過我又見到阿妮…
佢打緊掃，佢個樣真係春風滿面咁，睇嚟阿狗冇講大話。
我出到酒店門口，條街又係冇人，靜蠅蠅咁，但係…
我有個感覺好奇怪，就好似有堆嘢喺度等咗我好耐咁…
有一份無形嘅壓迫感，仲好似喺天上面嚟嘅，所以…
我即刻就望一望上天，點知真係…
一排十個，同之前跟我嗰隻一樣，都好似獅子咁大個頭，長毛飛絮…
灰白紫紅黃綠啡藍PINK黑，十隻眼凸，口大鼻大，利齒帶血嘅「鬼頭」…
就喺度等緊我…
佢哋似乎喺度等我等咗好耐咁。我心諗…
你估我仲係之前嘅我咩？
我驚都冇驚過，仲對佢哋展露出我自信嘅微笑…
唔係講笑，我真係嚇窒晒佢哋，由頭先佢哋對住我奸笑…
到佢哋而家淆底想走嘅樣…
哈哈，我即刻懶有型咁…
「獨鈷印﹑大金剛輪印﹑外獅子印﹑內獅子印…」
我仲要好慢咁做，一筆一筆咁劃出嚟。
「外縛印﹑內縛印﹑智拳印﹑日輪印…」
仲要每筆都輕輕力抽起，就好似寫毛筆字收筆一樣，等每劃個尾都變得尖銳。
好！等我都學阿明咁，改返個靚名先！
「隱形印！九劍飛星！蝦！」
一講完，九筆一齊飛出，插向「鬼頭」…
(杷杷杷杷杷 ~ 杷杷杷杷杷 ~)
十個「鬼頭」迅間俾我打爆晒！
「哈哈，知我厲害未？」
但係，唔係噃…
我得九筆，點打爆十個「頭」嫁？
好似同我開頭諗嘅有D唔同…
我望來望去，數來數去，地下都係有十條「鬼頭」屍喺度慢慢消失緊。
我仲諗住最後要打多一吓添。不過算啦！可能係一箭雙「頭」啫。
我轉個身好快就去便利店買咗包奶，仲叮熱咗，之後就帶返去酒店飲。
………
我坐咗喺大堂張梳化度，諗住嘆埋包熱奶，就返上去訓啦，點知…
「阿輝，你係咪訓唔著啊？嗰邊個架有D舊嘅香港報紙嫁喎，你可以睇吓丫。」
阿妮同我咁講，我咪試吓攞嚟睇吓囉，我隨手拿起咗一份成個幾月前嘅報紙。
我求其打開一頁去睇吓啦，見到一則新聞，有段短文，仲有張個人相添…
咩嚟嫁呢？我好奇一睇，點知…
我毛管立即棟起晒，仲覺得好心寒添，我似乎直接聯想得到，呢次旅行…
點解會有咁多鬼怪纏擾我哋，我諗…就係因為「佢」，段新聞寫住…
「聖華校隊隊長 慘被鏟斷右腳 唯恨輸掉決賽…」
而最主要，係最後六個字…
「跳，樓，自，殺，身，亡。」
(待續)
下期預告︰
阿狗佢反晒白眼，好似中咗邪咁，個樣仲好似好辛苦…