米米蓮妖怪作品 -《旅行‧如此‧難以忘‧記 》(百集長篇): 第042集 ~ 欣︰「先生」話，夜D去你哋學校睇鬼喎。
第042集 ~ 欣︰「先生」話，夜D去你哋學校睇鬼喎。
一對手揸住隻茶杯喺家姐遮住咗嘅右邊遞到家姐面前，家姐另轉頭一望…
「哇！」突然大叫咗出嚟。
呢對血紅色嘅手，唔會係我哋之前喺呢間屋裡面見過嘅任何一個人嘅，究竟係邊個嘅呢？
我唔知自己係太過好奇定係經歷多咗呢？我竟然大膽到第一時間衝咗埋去睇吓發生咩事，一D都冇驚。
我衝到埋去見到嗰對手前面係一堆亂糟糟嘅頭髮…
原本個廳就已經冇開燈，我哋幾個之前一直都係靠由窗外透過窗簾入嚟嘅陽光先睇到周圍環境嘅…
喺呢個原本就咁昏暗嘅環境底下，見到一個只有頭髮嘅人頭，前面再加上一對血紅色嘅手，真係不禁有D心寒。
凌亂嘅頭髮緩緩升起，一塊面露咗出嚟，原來係一個耷低咗頭嘅男仔嚟，真係嚇死人呀！
但係佢個樣同正常人一樣，一D都唔得人驚。
當我正想問個男仔係咩人之際，又再聽到家姐佢…
「哇丫！」大嗌咗一聲。
我即刻就另返轉頭睇吓咩事，係一塊又黃又黑鴛鴦色嘅面就喺我哋隔離呀…
呢一刻，我係咁諗，唔通「先生」佢哋頭先喺我兩姊妹唔覺意嘅時候幫我哋通咗靈，而家我哋乜鬼都見到晒？但係…
「一龍，斟茶俾姐姐都要同人講聲「請飲茶」架。」係「嬸嬸」把聲，原來鴛鴦面人係「嬸嬸」佢。
「大嬸呀，你想嚇死人咩？邊有人咁樣用面膜架？」家姐話「嬸嬸」佢。
「哈哈哈，老人家，皮膚唔平衡，係要咁敷架。一龍過嚟丫，零龍呢？媽媽介紹兩個姐姐你哋識丫。」
「嬸嬸」對完家姐講就同嗰個男仔講，睇嚟個男仔叫做一龍，但係零龍又係邊個嚟嘅呢？
「嬸嬸」講完冇耐，梳化後面又有一個男仔行咗出嚟，同一龍係一模一樣樣嘅。
「佢哋兩個係我同阿龍佢領養嘅小朋友，孖生兄弟嚟架，都好乖嘅，係雙手嘅顏色同一般人唔同，不過阿龍佢就係鍾意佢哋對手，話係上天賜俾佢哋嘅一份與眾不同喎，呢個叫一龍，呢個叫零龍。你哋兩個叫姐姐啦。」「嬸嬸」介紹佢哋兩個俾我哋認識。
「姐姐，飲茶丫。」
「你哋好呀，好高興認識你哋呀，我叫莊嘉欣，你哋可以叫做嘉欣姐姐。」
「你哋好，我係嘉欣姐姐個姐姐，你哋叫Stephy姐姐啦。」
突然，「先生」佢揸住一支燒酒，似係有D醉意咁行咗出嚟講呢番話︰—
「我哋D仔女，話97唔知會變成點喎，所以就一早移晒民，得返我哋兩支老嘢。我十幾歲就跟我伯爺落嚟香港，喺度落地生根，經過幾多風風雨雨先有今時今日呀？我唔係話佢哋嚮往自己嘅生活唔啱，俾我係後生，可能我都揀移民，但係喺呢度咁多年，有感情家嘛，邊捨得啫，難聽D講句，去到外國，鬼聲鬼氣就有，邊有同聲同氣啫。喺我嗰代嘅人，百行以孝為先，邊會離開老豆老母唔理架？睇吓而家，咪一樣幾好！馬照跑，舞照跳，有咩唔好啫。我老喇，真係驚我死咗，佢哋都趕唔切返嚟睇我最後一眼，我連兩個孫係咩樣都未見過呀！我哋兩老見悶悶哋，咪領養返兩個小朋友囉，一龍同零龍，乖呀。」佢摸咗幾吓嗰兩個小朋友嘅頭。
「老嘢，夠喇！D仔女有叫你一齊移民，你自己硬頸係要留喺香港喳嘛，何況佢哋成日都有打電話返嚟同我哋傾計，你又唔係未聽過D孫叫你爺爺，自己飲醉咗就亂咁噏嘢，唔准飲，個傷口都未好返，飲咩酒啫！」「嬸嬸」雖然把口係鬧緊「先生」佢，但係自己都眼貶淚光咁。
「酒…」「先生」似係想應「嬸嬸」，但係「嬸嬸」又再一手阻住咗佢講嘢。
「吊！攪乜啫！我冇醉呀！訴吓苦水喳嘛！唔講佢哋喇！講起都唔開心。一龍，零龍，你哋乖，去搵管家阿姨玩。」
「先生」應完「嬸嬸」就打發咗兩個小朋友走，之後再對住我兩姊妹講︰—
「我幫你哋再諗過喇，你男朋友仔有可能冇事嘅，妖魔鬼怪雖然係纏住佢，但係鬼同妖怪都可以有好「人」嘅，希望佢遇到都係好嗰D啦。 另外，我已經託咗朋友幫我搵機票，你哋聽日出發，我應該跟唔切，不過希望可以之後一日就過到嚟啦。而家嘅時間就唔夠教你哋D乜嘢架喇，你哋就一人一個細細哋嘅「捉鬼塔」帶住過去先，一陣俾多幾道符你哋傍身。有咩大事，等我過嚟先攪。」
「丫，仲有，我打聽過，原來佢哋個老師都有跟埋去，即係話都識道術嗰個呢，佢都頂得吓嘅。」
「丫，仲有，而家唔係好夜啫，夜D帶你哋去見吓鬼先。」
「見鬼！？唔見得唔得呀？不如去到日本先啦。」家姐好驚青咁講。
「先生」唔知係冇聽到家姐講嘢定係聽錯咗呢…
「OK，一陣帶你喺香港睇日本鬼，仲有，睇吓黐線鬼。六點早D食埋個晚飯就出發，第一站，你男朋友仔學校，睇日本鬼操兵，第二站，高街鬼屋，睇D癲嘅鬼。」佢竟然咁答。
家姐已經嚇到面都青埋，我亦都心驚膽跳咁…
淨係聽到「先生」佢再講︰—
「老婆，一陣打打俾喺嗰間學校度做雜工嘅阿發安排一吓，其他嘢就我準備。你哋兩姊妹，就休息吓先啦。因為今日唔去習慣吓，我驚去到日本，你哋會俾日本鬼怪直接嚇死。」
呢一刻，我已經唔知點算好，我望一望家姐個樣，我諗家姐而家應該喺度諗緊仲去唔去日本好？
(待續)
下集預告︰
魑魅魍魎四小鬼，快快束手就擒！