米米蓮妖怪作品 -《旅行‧如此‧難以忘‧記 》(百集長篇): 第036集 ~ 欣︰「九龍伏魔訣」！

第036集 ~ 欣︰「九龍伏魔訣」！

「大惡鬼」佢…根本唔係「先生」之前所講嘅咁…佢個樣實在太恐怖…

我第一眼望到嘅…係佢嘅身體，連繫住身體嘅…係六隻巨爪，指甲好尖好鋒利，指骨又瘦又長，皮膚熔爛到不堪入目…

淨係睇到咁，我已經覺得毛管都動起晒；佢嘅頭頂…有三個頭，狗頭，一隻瘋狗嘅頭；鱷魚頭，長牙利齒咁，仲有呢個…

究竟係咩嚟架？一個詭異驚嚇…嘅蟲頭？三個頭喺個窿度爭住衝出嚟咁，見到佢哋個樣，我已經嚇到呆咗…





佢…佢嘅下身，根本唔係「先生」之前所講嘅藤壺蛇尾，事實上係一個又一個，一堆又一堆唔完整嘅人頭…

佢哋條脷都伸吓伸吓咁不斷慘叫住「救命呀~！救命呀~！」，好似好痛苦好辛苦咁掙扎緊。

我雖然冇被嚇暈到，但係就差D嚇到靈魂離開身體，我仲以為自己已經死咗，身體完全郁唔到，淨係識得震…

「嬸嬸」佢見到我同家姐咁，即刻就踎低身攬住我哋。

「唔使驚，有我喺度，大妹妹佢冇事嘅，我哋一定要相信阿龍佢呀。」





「嬸嬸」佢都未講完啫，「先生」就突然已經大嗌咗一聲︰—

「青龍翻海！」

佢一個筋斗跳咗入紅光法牆裡面，直接旋轉一劍拖斬落「大惡鬼」個頭頂度…

狗頭一聲慘叫，似乎係斬中佢要害，但係「大惡鬼」立即就一隻巨爪抓埋去「先生」度…

「黃龍金甲！」





「先生」紮行馬步，做起手印，身體就出現咗一道金光護甲，強行防護惡鬼嘅巨爪…

「大惡鬼」之後連續幾吓巨爪迅速抓埋去「先生」度，好在金光護甲堅硬無比，幾吓巨爪似乎都傷唔到「先生」身體…

「先生」襯住巨爪來襲嘅空檔，迅即伸手入黃袍裡面抽咗一支水出嚟，佢一躍而起，大叫︰—

「紅龍吐炎！」

左手推開瓶蓋，大啖飲入口，之後一口氣向「大惡鬼」頭頂噴去，一道紅火燒到「大惡鬼」嘅頭同身上…

「大惡鬼」成個上半身都滿佈火炎，頭頂上嘅三個頭更加掙脫唔到，只係不斷咁慘叫。突然…

「哈哈哈，我個頭根本唔喺上面。」一把尖銳刺耳嘅女聲。

「咁即係喺下面啦？」「先生」似乎想使詐。





「吓！點解你會知架？」女聲似乎已中「先生」奸計，唔好意思，講到「先生」好似係奸咁添。

「唔該，我見到你個頭喺邊喇！」

「冇理由架！冇理由架！咁多個頭喺度，你點會睇到架？」

「先生」突然一個直刺刺埋去人頭堆中嘅其中一個女人頭度，「大惡鬼」兩邊蛇身迅即蠕動將呢個女人頭縮入體內…

「先生」呢一劍只能夠刺中蛇身。

佢之後直立企定，兩手做好準備就大嗌︰—

「大姐，你個死人頭喺度口擘擘好似講緊嘢咁，唔拮佢拮邊個呀？」





「你個陰險小人，呃我出聲！」

「你前世肯定係日本人，仆佳藝均子，看招！」

「先生」向上一望，突然向後一跳，使出一招「綠龍盤據」，我見到旁邊嗰幾盆花嘅藤變得好粗好大，之後衝埋去「大惡鬼」度…

法器唔小心被撞倒，紅光法牆消失，粗大花藤纏繞住「大惡鬼」全身，令佢動彈不得…

「大惡鬼」突然擺動蛇尾，打向我哋呢邊，「先生」再嚟一次「青龍翻海」，將蛇尾斬斷…

佢之後轉身一個大躍步衝前踩到「大惡鬼」身上，順劍向上一推。

「白龍飛天！」

「大惡鬼」半邊身被(界刂)開，只聽到「大惡鬼」「依丫」一聲慘叫…





「先生」而家凌空喺「大惡鬼」嘅頭頂，佢另轉身，頭向下就轉動身體，大叫︰—

「紫龍神劍！」

成個人就旋轉直衝向下鑽入「大惡鬼」體內…

呢一刻，我呼吸停頓咗…

兩秒之後，尖銳女聲「嗚丫」大叫，「大惡鬼」突然全身爆開，血肉橫飛到周圍都係…

…

過咗冇耐，D血肉就慢慢消失晒，而家「先生」佢企正喺我哋前面耷低咗頭…





佢慢慢抬起個頭，但係…佢雙眼…反白嘅！？

(待續)

下集預告︰

爆裂神拳…