米米蓮妖怪作品 -《旅行‧如此‧難以忘‧記 》(百集長篇): 第026集 ~ 輝︰唔好理啦。去下一站，七福神廟。

第026集 ~ 輝︰唔好理啦。去下一站，七福神廟。

「大家快D行返去酒店，有D唔妥！」我見到嗰兩個通緝犯之後，就大叫。

「你哋喺度做咩？」突然，我膊頭俾人打咗吓…

原來係「光管陳」，仲有「鐵拳」同王Sir。

「冇呀，我哋啱啱食完「牡丹樓」，諗住返酒店，會合大家11點出發囉。」





「光管陳」見到「大袋」揸住本…書。

「冇！？呢袋咩嚟架？」

「我幫人拎住喳嘛。」「大袋」驚青回應。

「邊個？」

「我囉，我阿哥係都要我幫佢買喳嘛，我都唔想買架。」阿狗出口救「大袋」。





「幫你阿哥買！？原本就唔得架喇。不過咁啦，我買你保管住先，返香港先俾返你啦。有冇異議？」

「哦，好。」

好在阿狗佢醒目啫。「大袋」就…心情當然複雜啦，都唔知多唔多謝阿狗好。

之後，三個阿Sir陪住我哋返酒店。

………





沿途我都會四圍望，睇下嗰兩個通緝犯仲有冇跟住我哋…

點知到咗酒店門口，突然阿明大叫︰—

「走呀！有人想殺我哋呀！」

大家好快咁衝咗入酒店，嗰兩個通緝犯又真係冇跟入嚟。

「鐵拳」一入到去就問阿明發生咩事，阿明回應話見到有人揸住支槍想殺我哋。

「我都見到，前後係兩個男人，都有手槍，似係想嚟殺我哋。」我即刻就幫埋口。

但係其實我根本見唔到，只不過係段估。

「光管陳」之後叫咗「鐵拳」同王Sir返房，仲問我哋︰—





「之前做過D咩，點解人哋會追殺你哋？」

「冇喇，冇喇，我哋咩都冇做過。」

「光管陳」之後一手捉住大寶，搜佢身，即刻就搜到佢身上有半塊金邊玉佩。

大寶佢唯有和盤托出。

「光管陳」亦都解釋返︰—

「呢對玉佩有魔性，會引誘人類據為己有嘅。如果我冇估錯，嗰兩個男人就係俾呢對玉佩支配咗，而且一般人唔會咁易俾佢哋支配，所以我估嗰兩個男人已經擁有呢對玉佩一段長時間，一直跟隨住呢對玉佩嘅指示去殺人。你哋唔使擔心，一陣去七福神廟，我會化咗呢對玉佩，而家你哋準備出發先，我出去處理埋嗰兩個男人。」

我哋之後當然照住做啦，不過我心諗，唔怪得阿媽同家姐買名牌買得咁狠啦，原來係有魔性，會引誘人去擁有佢嘅。





之後我哋返房，我依然見唔到阿倫，但係竟然見到「龍也」佢訓咗喺我床度，「居居」就訓咗喺佢身邊。

我唔想整醒佢哋，所以好小心咁諗住執d嘢就去集合。

「輝哥哥，你返嚟喇？」「龍也」訓醒咗。

「哈哈，係呀，你哋喺度做咩呀？」唔小心嘈醒咗佢，我好尷尬咁問。

「居居」衝咗埋嚟舔我，「龍也」就咁回應︰—

「諗住嚟搵你玩囉，點知成晚都唔見你，所以無聊就訓咗嚧。」

「哥哥趕住出去呀，返嚟先同你玩丫。」

講完我就出咗門，去咗搵大家。集合之後，就一齊就上咗旅遊巴。





………

沿途可以睇吓日本嘅風貌。

「喂，你哋知唔知尋日「阿張」去咗邊呀？佢冇嚟我哋房玩噃。係噃，佢住邊個房架？」「大咀」佢突然問。

「唔知佢去邊，不過佢同校長同房嘅。」Kenny應佢。

「嘩！仲有得淨嘅！？」成班友仔大嗌，好在D老師唔知我哋講乜架啫。

「應該有嘅，話晒佢老豆係校董，條淫蟲抽吓水就會，攪佢應該唔敢呀？」

「係噃，阿倫同細鬼呢？真係去咗叫雞呀？」我問。





「冇人知，不過你哋睇吓佢哋兩個個死款。」

「嘩，又真係好死吓喎！」班友仔又大嗌，其實所謂「班友仔」係包括埋我。

我望埋去佢哋兩個度，覺得佢哋兩個唔止係攰，仲好似…中咗邪咁，不過有「光管陳」喺度應該冇嘢嘅。

唔係噃，「光管陳」呢？我去咗問王Sir。

「佢報咗警，去處理緊嗰兩個通緝犯，一陣會自己嚟搵我哋。」

「哦！」我坐返低。

我仲以為「光管陳」佢用咩方法處理添，原來都係報警啫。

咦，唔係噃，咁我哋而家咪冇人保護，希望D手印夠我哋頂到佢返嚟啦。

到咗七福神廟附近，我哋落咗車，就一路行去七福神廟，沿途我見到好多人，不過…

我見到有個人好怪，佢離我大約十米左右。

佢應該係一個女性嚟，著住一身女生校服，但係佢滿頭白髮，仲要好長好長，點睇都唔似真係女學生…

佢背住我企喺度，似係排緊隊等車，我再諗諗，會唔會係有病或者係Cosplay呢？但係…

好似又唔似噃，佢另咗個頭過嚟，雖然睇得唔算好清楚，但係我見到佢好老好老，成塊面都剿晒皮咁，而家…

佢望到我喇！我即刻另返轉頭唔敢望佢。

我行遠咗D之後，諗住去再望多一望佢，睇吓佢會唔會跟住我哋啦，我仲做定埋護身咒，轉身再望，點知…佢而家…

已經喺正我面前，近睇佢個樣好清楚，好得人驚，呢一刻，我終於明白我應該早D做嘅係…隱身咒。

(待續)

下集預告︰

廟唔好亂入，神唔好亂拜