米米蓮妖怪作品 -《旅行‧如此‧難以忘‧記 》(百集長篇): 第020集 ~ 輝︰我識咗個「朋友仔」。
第020集~ 輝︰我識咗個「朋友仔」。
個小朋友突然喺我面前擘到個口好大，好似想吞咗我咁……
「乞嚏」，原來佢只係打乞嚏，頭先真係嚇親我。不過…
佢打到我成個頭都係鼻涕，阿明佢哋三個見到我咁樣，終於識笑返。
小朋友佢一直同我講對唔住，又用佢條褲仔幫我抹面，不過佢條褲仔好似幾十年冇洗過咁，好臭好臭…
但係我又唔想浪費佢一片好心，所以我死忍死忍，見到我咁，佢哋幾個更加笑得大聲。
「小妖，你知唔知自己係妖怪？有冇害過人？」
「光管陳」咁問，個小朋友都唔知答得邊樣，佢又及頭又另頭咁，個樣都幾得意。
「你身上怨氣雖然重，但係冇邪氣，算你啦，唔好再整蠱人喇，再整蠱人，叔叔就打你屁股。」「光管陳」講。
「唔敢喇，唔敢喇。」小朋友回答。
雖然佢係隻妖怪，個樣仲怪怪地咁，但係眼仔碌碌，其實真係幾可愛。
「陳Sir呀，我可唔可以帶佢去我房度幫佢洗洗條褲呀？」我問。
「光管陳」及頭回應咗我。
「咁我同阿明返房度睇睇佢D嘢。」佢之後再講。
「你哋放心，有我喺度，成個酒店都安全嘅，見到妖怪嘅事，就唔好同其他人講喇，費事嚇親佢哋啦，OK？」「光管陳」再望住阿狗同「大袋」講。
之後佢都冇等阿狗同「大袋」回應就同阿明行咗去1201號房。
「「光管陳」佢頭先整爛咗我件衫呀。」「大袋」個樣超無奈咁呻。
「你都放屁陰咗大家一鑊啦，算啦。」阿狗搭住佢膊頭氹佢。
之後佢哋兩個都慢慢行返去自己房，我就帶咗個小朋友去我房。
去到我房，發現同我同房嘅「阿倫」仲未返，唔知去咗邊，我心諗，佢唔係真係同「細鬼」條鹹蟲走咗去叫雞呀？
我之後帶咗個小朋友去沖涼房，諗住幫佢洗吓條褲，洗吓身，順便自己都一齊沖埋涼…
「哥哥，你個咕咕咁多毛毛嘅？」佢咁問。
「你大個D都會有架。」我一面尷尬咁回應佢。
我一時唔記得咗佢係妖怪，唔會長大，我怕佢會唔開心，所以即刻就轉咗話題︰—
「唔好講呢D喇，係呢，你叫咩名呀？」
佢搲吓個頭篤篤手指咁，之後…
「唖…唖…唖…唖…」
佢喊到收唔到聲。
我正想安慰佢之際，佢又講︰—
「咁多年嚟，得哥哥你會問我叫咩名咋，D人唔係叫我細路仔﹑小朋友，就係叫我做妖怪，其實我爸爸媽媽改咗個好好聽嘅名俾我架，我叫木村龍也。哥哥，你又叫咩名呀？」
我笑住咁摸摸佢個頭。
「我叫朱嘉輝，我朋友叫我阿輝，你叫我輝哥哥啦，好高興認識你呀，我哋做個好朋友丫。龍也呀，咁你爸爸媽媽呢？點解你識講廣東話嘅？」
「好朋友！？好呀！爸爸媽媽上咗天堂度望住「龍也」長大，廣東話係叔叔同姐姐教我講架，佢哋都好錫我架。」
我一路幫佢洗身，暫時都冇再問佢嘢。其實佢同普通小朋友差唔多，係多咗對角同藍色皮膚啫。
沖完涼，成缸水好似用完「灰錳氧」咁，變晒色，反而佢嗰身藍色嘅皮膚變咗粉藍色，個樣望落去仲可愛咗添。
佢喺度玩水，我就幫佢洗洗條褲仔。
「差唔多喇，唔好玩水喇，你坐定定，等一等我丫。」
我行咗出去，喺個喼度攞咗件衫，就返咗入去俾「龍也」佢著。
「咦，估唔到又幾啱身噃，成條睡衣裙咁，你著住佢，就當係哥哥送俾你啦，條褲仔就乾咗先好著返喇噃。」
「龍也」佢望咗一望件衫。
「係狐狸姐姐呀，我著住佢俾狐狸姐姐睇吓先。多謝輝哥哥。」
佢一路講多謝，一路衝咗出門口，我叫都叫佢唔停。
我想追佢俾返條褲仔佢，但係一行到門口就見到佢行樓梯走咗。
反而我望到另一邊，見到Kenny同「老鼠安」行緊埋嚟…
「喂，阿輝，踢波囉。」
「踢波！？」我望一望隻錶。
「凌晨喇喎，邊度有球場呀？」
「Kenny佢帶咗個「毛毛波」嚟，(車立)口嗰度個位好闊，夠我哋玩3打3架。」「老鼠安」回應我。
「好，過去睇吓。」
………
行到去(車立)口見到阿狗﹑阿明﹑「大袋」﹑大咀﹑豬仔﹑Stephan佢哋六個人喺度，佢哋仲用拖鞋整緊個「龍門」位。
「其他人呢？」我問。
「佢哋話玩其他嘢，唔踢喇喎。我哋9個人，分3隊「跟隊」踢啦。」「老鼠安」答。
之後我哋「包剪揼」分3隊，再「包剪揼」猜邊兩隊踢先。
阿狗﹑阿明同我一隊，我哋猜輸咗，要跟隊；「大袋」﹑大咀同豬仔一隊；Kenny﹑Stephan同老鼠安就一隊。
咇！「大袋」嗰隊先開波，一開波，佢就一腳揪埋去，應聲入波。
Kenny嗰隊好無奈，但係阿狗﹑阿明同我即刻WE嘩鬼叫，笑到停唔到口，仲嘈到拆晒天，Kenny即刻講話下場開始唔准揪射，唔准遠射。
到咗我哋出場，咇！一開波就嚟個夢幻三角短傳，我試射一腳，可惜俾「大咀」救出，個波落咗喺「大袋」腳度，點知佢又想揪射…
阿明一吓拍埋去，佢射咗個空，之後阿明攞咗個波，同我嚟一個凌空「彈牆」，之後佢夾住個波，一仆一碌咁打咗個筋斗…
條友竟然就咁連人帶波碌入「龍門」，阿明咁大舊，大咀根本阻佢唔到，就咁就入咗，YEAH！
正想大叫之際，突然唔知邊度彈咗個西裝骨骨嘅男人出嚟，佢仲企咗喺訓咗喺地嘅阿明前面…
(待續)
下集預告︰
佢突然望住廁所旁邊嗰一幅人像畫，仲伸起右手對住我…