米米蓮妖怪作品 -《旅行‧如此‧難以忘‧記 》(百集長篇): 第018集 ~ 輝︰返酒店喇！四圍都係嗰D「嘢」嘅？

第018集 ~ 輝︰返酒店喇！四圍都係嗰D「嘢」嘅？

「我唔係講呢D呀，不過算啦，我信你係陳Sir喇。」我有D尷尬，不過其實我係睇到佢對「光管腳」先咁講。

全部人集合返晒就一齊落咗樓下機舖搵嘢玩。

「喪狗」佢唔知係咪「淆底」，唔敢同我哋打「街霸」，一落去就衝咗埋部電椅機度，仲串我哋。

「你哋三個唔夠膽玩呀？」





佢講呢句之前，我已經望到張電椅後面個石像個樣好有問題，亦好恐怖，唔似係普通石像，好似好重邪氣咁。

見到「佢」我好想即刻走，但係「喪狗」已經坐定咗，我唔敢亂叫佢哋走，驚驚動咗「佢」…

所以我淨係好小心咁睇住「喪狗」，同時四圍望吓見唔見到「光管陳」。

好在，「光管陳」喺十步左右嘅隔離部「鉗公仔機」度睇緊公仔，我先稍為放心返D…

但係我感覺到呢個石像應該唔係「少嘢」，唔知出喺事嚟「光管陳」頂唔頂得住呢？





「哈哈，白痴仔。電到個樣都變埋，好攪笑。」「大袋」笑「喪狗」佢。

「到你喇，你唔變樣我話你好嘢。」

「大袋」佢見阿狗玩完就想坐落去，我即刻捉住佢走同講︰—

「唔玩D咁嘅嘢啦，電自己咁白痴，有咩好玩丫，去打「街霸」好過啦。」

可能傷到阿狗個心嘅，但係冇計啦，鬼叫呢度好有危險咩，幸好我哋行開咗都冇事發生。





之後阿狗佢都冇晒癮，唯有跟埋我哋走咗去打「街霸」，阿明個死仔就唔知走咗去邊。

玩咗無耐啫，王Sir就嗌大家走喇，「大袋」佢去搵返阿明，之後集齊晒D人，一齊出發返酒店。

搭「地鐵」好快就返到去酒店附近，我哋行返去嘅時候，四周圍都已經好靜好黑，冇咩其他人，我離遠見到有間車仔舖。

間舖似係賣麵食嗰D嘅，有一男一女背住我哋喺度似係食緊面，但係有兩塊布遮住咗佢哋個頭…

我睇唔清楚佢哋做咩，不過嗰一男一女好奇怪…

背脊同坐姿都好齊，齊到有種唔正常嘅感覺，仲要完全身體冇郁動咁，風吹起嗰兩塊布，嗰兩個「人」…

身體上面…好似冇咗個頭。

相反，我見到舖頭老闆個樣好清楚，係好普通嘅一個日本中年男人，佢仲對住我笑，笑起嚟一排利齒表露無遺。





我知道應該又有唔妥，我即刻行返埋「光管陳」度當冇睇過。

原來日本真係好多呢D「嘢」，好在而家有「光管陳」，可以化險為夷，不過佢唔喺我哋身邊就大鑊喇。

返到去酒店，差唔多十二點，「喪狗」見到酒店姐姐即刻耍手問好，另一邊就仲係嗰兩個傳教士咁嘅款嘅外國人坐咗喺度仲傾緊計…

都唔知點解兩個麻甩佬會有咁多嘢講。其他人陸續返嚟搭(車立)返自己房。

死喇，阿明同「光管陳」唔見咗嘅？佢哋兩個返咗去房？

「阿狗，「大袋」，阿明同「光管陳」去咗邊呀？返咗上樓喇？」我問。

「應該唔係噃，係咪去「爆石」咋？」「大袋」答。





「兩個男人一齊去「爆」？」我再問。

「聽落又真係幾嘔心噃，不過喺度等吓佢哋囉。」佢再答。

咁就等吓佢哋啦，我個電話好似可以用喇喎，我即刻就打俾阿欣。

「嘟嘟，嘟嘟……」，好似冇人聽噃。另一邊，阿狗﹑「大袋」同酒店姐姐傾緊計。

我又見到櫃位度有舊白色毛茸茸嘅嘢，不過眨吓眼又唔見咗。

「原來你識廣東話架？係呢，咁你姓咩架？」「喪狗」對住酒店姐姐講。

「我姓「狐」。」

「「胡」呀？個姓咁中國人嘅！？咁你叫咩名呀？」





「阿「狸」。」

「胡亞妮！？個名好好聽呀。」

「狐狸呀！傻佬。」「大袋」插口。

「都係一句啫。」阿妮笑住講。

「你仲識咩語言呀？」「喪狗」再問。

「唔係好多咋，英文﹑俄文﹑德文﹑法文﹑葡文﹑日文﹑韓文同埋廣東話囉。」阿妮諗咗一諗先咁答。

「咁我叻過你喇，我仲識講普通話。」「喪狗」竟然咁答。





「咁你可唔可以教我呀？」阿妮好有禮貌咁問。

「沒問題。」「喪狗」用普通話講。

(待續)

下集預告︰

「啪」一聲，有D火光咁，一舊嘢喺(車立)頂跌咗落嚟