米米蓮妖怪作品 -《旅行‧如此‧難以忘‧記 》(百集長篇): 第016集 ~ 輝︰你講咩話？「五絕」都出埋？
第016集 ~ 輝︰你講咩話？「五絕」都出埋？
上次講到我睇住「阿華」佢哋四個帶咗班日本男學生行去後樓梯，阿明亦都之後跟埋去。
我覺得事有蹺蹊，「阿華」佢哋成班明明係咸濕仔嚟，係女就話啫，成班日本仔，佢哋冇理由會聊人哋傾計，仲要帶埋佢哋去後樓梯咁奇怪嘅。
呢度嘅後樓好光猛好開揚，佢哋唔似係去做「衰嘢」，我反而擔心佢哋同我一樣，「撞嘢」，所以我好緊張，即刻四圍望，搵幫手。
我一另去右邊就見到「光管陳」佢企喺遠處，我立即就走埋去搵佢幫手，睇吓佢會唔會知道「阿華」佢哋做咩會咁。
「光管…丫，唔係，陳Sir，你見唔見到呀？「阿華」佢哋同D日本仔行咗去後樓梯呀！」
「你…你都睇到係男學生咩？」「光管陳」佢好愕然咁回應我，我就及及頭回應佢。
「喔，佢哋以為人哋係女學生啫，冇嘢嘅。」「光管陳」笑住講。
「咩…咩女學生呀？「阿華」佢哋又唔係盲又唔係傻，明明係男學生，點會係女學生呀？」
「你唔似係開咗「天眼」先睇到噃。」我呆咗無回應。
「咁你同個「傻仔」阿明佢一樣喇，都好「黑仔」，你哋見鬼喇。」
「見鬼！？」
「你都唔好離開我太遠喇，知唔知我住邊間房？我咩電話號碼？你有冇漫遊？校章有冇帶？仲有，我D手印記好未？」
「你323號房丫麻，你電話冇變，我以前攞過你個號碼，漫遊凌晨之後用得，校章留咗喺酒店房，返到去會即刻放返喺身，手印都記得好清楚。」
「算你都幾乖，萬事小心啦，你係咪擔心佢哋幾個呀？」我及頭回應。
「咁一齊行過去睇吓咩事囉。」
我哋冇直接行埋去「阿華」佢哋度，我哋搵咗個好位，睇到佢哋做乜又唔會俾佢哋發現，我企定就望吓佢哋做緊咩啦，原來佢哋係影相啫。
我同「光管陳」企定定喺度睇，見佢哋嗰邊冇咩事發生，我就諗到咩就問「光管陳」佢咩囉。
「嗰D咩「臨咩鬥者…陣裂在前」係咪都可以保護到我哋架？急急如律令又得唔得架？」
「光管陳」諗咗一諗，之後咁講︰—
「你咁問即係你唔識啦。你講嘅係「九字護身大法」，全句係「臨兵鬥者，皆陣列在前」，係四棟五橫嚟嘅，砌成一個網，係最強嘅護身方法之一，呢D唔啱你哋普通人用架，要做咁多動作，仲咁易做錯，做得嚟都死咗啦，呢D留返俾學道之士啦。我教你哋嘅簡單方便快捷好多，中指屬火，額頭屬火，其實係借火勢保護身體，食指點頭隱身就解你都唔會明架喇，係關陽氣事嘅。至於你話「急急如律令」呢，呢個就勁喇，係我嗰派嘅強項，「急急如律令」 即係打電話俾個神叫佢嚟幫拖，不過而家冇咩人用架喇，又係你哋普通人用唔到嘅。」
「你識請神上身﹗？」我真係好好奇咁問。
「當然！請神上身係我「鳳」派最犀利嘅法寶。」「光管陳」好自信咁回答。我仲更加好奇添。
「咩係「鳳」派？」
「喔，你哋唔識唔出奇，老一輩學道之士一定識嘅，東虫西聖，南龍北鳳，中神通。」
「咩事呀？武俠小說咩？仲要抄人哋「中神通」。」我好無奈咁講。
「抄唔抄我就唔知，不過個「中神通」真係可以通神架，係我哋D術士之中最勁嘅人，佢咩都唔使，赤手空拳就可以捉邪治鬼架喇。你話佢勁唔勁丫？咦，唔好講呢D住，你睇吓班衰仔先丫。」
我另轉頭一望，嗰幾個日本男學生好似喺度摸吓摸吓「阿華」佢哋四個嘅身體咁，真係好嘔心。阿明佢就一個傻吓傻吓咁企咗喺度望住佢哋。
我數清楚先知嗰度總共係五個男學生，不過奇怪嘅係，班學生好似傷害唔到「阿華」佢哋四個咁。
「放心啦，佢哋都有校章喺身，夠保護佢哋架喇，呢五隻係普通遊魂野鬼嚟啫，冇咩殺傷力嘅。」
「點解佢哋由得嗰幾隻鬼攪，仲好似好開心咁嘅？佢哋又唔似我咁睇到佢哋係男學生，連阿明都見唔到？」
「其實鬼好得意架，「黑仔」嘅人先睇到，睇到仲要唔係真身，好多時，係D人想見到D咩嘢，當見到鬼嘅時候，D鬼就會俾佢哋睇成佢哋想見嘅嘢。 至於點解阿明佢咁「黑」都睇唔到班鬼係男學生而你睇到呢，應該係你比佢仲「黑」囉。唔好俾我估中，班衰仔肯定係睇咗班鬼係日本女學生啦，呢，而家佢哋仲唔係睇到五個女仔扮錫佢咩？」
我另轉頭一望，見到嗰五個男學生發緊惡，個樣變得好恐怖，條脷仲伸到好長好長，想舔「阿華」佢咁。
其他三個同學仲喺度笑住咁幫「阿華」影相，阿明依然成碌木咁企喺度等。我即係望過去「光管陳」度睇吓佢會唔會出手。
「唔使驚，冇事嘅，呢幾隻鬼好「喳」，佢哋都係發吓脾氣啫，俾佢哋幾個係咁拉住影相，我都發脾氣啦，一陣佢哋就會走。」
「咁點解要用條咁核突嘅脷呀？」
「佢哋好似D狗咁，試嘢係用條脷嘅，佢哋試緊可唔可以傷害「阿華」佢囉，至於你話核突，其實你條脷伸到咁長應該都差唔多核突。」
講完冇耐，班鬼可能知難而退啦，真係走晒，我見到阿明佢仲好似好唔捨得咁，我都忍唔到笑咗出嚟。
我突然諗起「光管陳」同平時上堂咁唔同咁，所以好唐突咁問佢︰—
「其實你真係陳Sir！？」「光管陳」佢好愕然，所以就咁回應我︰—
「其實我爸爸真係姓陳架，至於你話我係咪阿Sir呢，我係你老師，咁唔係阿Sir就Miss架啦，至於我係阿Sir定Miss，真係要除褲驗明正身先得噃。Eee…都係算啦，我唔想除褲俾你驗，你鍾意叫我Miss就Miss啦。」
「我唔係講呢D呀，不過算啦，我信你係陳Sir喇。」我係有D尷尬，但係其實我係睇到佢對「光管腳」先咁講。
企起「光管陳」身邊，感覺真係好安全，連開頭覺得嘔心嘅畫面，諗諗吓都覺得幾好笑，呢層都就快閂門喇…
大家都集合返埋一齊，諗住一陣再落下層間機舖行吓。
(待續)
下集預告︰
…皮膚白滑，吹彈可破咁，切切實實就係我心目中嘅女神…