[gay]網絡情人: 第十六章

自從今次之後我地真係變左一星期見一次，電話都唔係傾好耐...雖然係我自己提出…但成日都好想見到佢，但係冇計啦…為左佢好真係要恨下心腸，最多去見佢果日整d唔同野食去慰勞下佢啦…

見唔到佢我又冇咩心情溫書，應承左佢會獎佢，所以就煮下野食啦…有時煲椰汁西米露，有時整下日式溏心蛋，有時整cheesecake，總知次次唔同，係呢排我肥左好多[sosad]，但係佢食極都唔肥(唉屌諗住養肥佢等佢飛左我都冇人要[sosad]，點知養肥左自己)

佢考AL前一個星期左右我病左，發高燒，呀媽番左大陸，我平時唔捨得睇醫生…一黎覺得好貴，二黎食完藥又會搞到身體好虛弱，所以我一般都係休息等佢自然好，但係呀媽唔係度我又請唔到假，又唔想曠課，所以打比情信，叫佢扮我呀叔打去學校幫我請病假，點知佢飛的過黎的左我落街睇醫生，小弟真係十分之滾動:~(。

睇完醫生送完我入屋之後我叫佢番屋企溫書，唔好理我啦….佢走左我就訓覺啦...點知過左一陣佢買左舊瘦肉番黎
情信:等我一陣，好快有得食
我:駛咩咁麻煩…買外賣咪得
情信:街外面d野唔乾淨，又多味精，一陣食左仲衰多二錢重呀




我:你走啦…一陣傳染埋你…點考試呀
情信:放心啦!我係無敵既!成五年冇病過啦我…我咁靚仔，d細菌見到我都掉頭走啦
我:收皮啦:o)

煲完之後，佢仲全日留係度照顧我，連書都唔溫:-( 
雖然好滾動，但佢冇落鹽搞到煲瘦肉粥好淡!!!!

隔左一日，我好得7788既時候，點知到佢病…唉叫左佢唔好理我嫁啦…而家傳染左比佢啦:-(而家搞到我要照顧番佢啦:-[

(待續)