人來人往,你為甚麼要回來找我...: 13
又到了週五啦啦隊排練的時間，襯著現在還沒有太多人來到，先複習一下學過的動作吧。
俯身，舉起右手，左手放腰後……
「唔係咁呀，」一隻溫暖的手扣住我身後的手腕：「放完左手係身後面之後先舉右手呀。」
啊，的確是這樣。
「你睇你丫，無左我就即刻唔掂。」周子若這句話是有別的意思嗎？
「係呀，都幾唔掂架。」我轉過身來望著她。
「喂，咁多位，」剛走進來的林惠喻拍拍雙手：「佢就係我地綠社入面既高人朱咕力喇。」
「朋友朋友，你識唔識講中文架？」有些不認識他的人故意用奇怪的腔調問。
「我識聽，識講，唔識寫，」巧克力說：「仲有，唔好講粗口，因為我聽得明。」
巧克力不清楚的咬字吸引了大部分人上前簇擁著他。
對了，林惠喻找巧克力來幹甚麼？
「好喇，靜一靜先，」林惠喻舉起雙手：「我搵朱咕力黎呢度呢，係因為我想排一個動作，有請鹿仔為我地示範下先。」
鹿仔走出來，圍著他的人散開了，巧克力站在鹿仔的前方。巧克力微微彎腰，鹿仔踏幾步衝上前，按著巧克力的肩膀張開腿一躍，跨過了他。
看到鹿仔做的這個高難度動作，有人不禁拍手叫好。
「好喇，大家睇到啦？」林惠喻滿意地笑著：「我要多兩個人黎做呢個動作。」
「呢啲咁正既野就緊係等我黎做啦。」羅船長走出來。
「唔得，你要揸旗丫嘛。」鹿仔說。
「咁，咁呃……」
「等我黎啦，社長點可以無份架？」趙尚文拍拍自己的胸口。
「喂陳子良，」周子若在背後搖搖我的手肘：「我想睇你跳啊。」
「唔好啦……」
「跳啦……」
想要推開她的我一不小心向前跌了個踉蹌。
「咦？乜陳子良你都想跳呀？」林惠喻和在場的人都將目光投放在我身上。
我望向身後的周子若，雙手握拳放在頸前，一副替我打氣的樣子。
唉……沒辦法。
「好喇，你地過黎先。」
「對手，要放係度。」鹿仔雙手放在巧克力的肩上：「因住，唔好整傷朱咕力啊。」
「仲有，跳既時候要有向前既感覺，如果唔係既話就跳唔過架喇。」
「等我試下先。」趙尚文後退幾步，助跑向前，手按肩膀，成功跨過。
「到你喇，子良。」
「唔洗擔心。」巧克力看著我，然後拍一拍自己的背：「比啲信心自己。」
好吧，一、二……三！
怎麼會這樣？
躍起的我動作不夠流暢，失去控制地倒向前。
啊，跌在地上的我以單膝跪著，手按住地面。
「你呢個版本好似仲型啲添喎……」鹿仔伸手扶起我。
剛……是失手了。
幸虧沒有臉部著地。
「好喇，講解完呢個動作，跟住我地練返之前練果啲。」林惠喻說。
我走到周子若身邊：「呼，啱啱真係好險。」
「痛唔痛啊？」她拈起我的手腕。
「少少啦。」
她皺著眉，似乎是感到有點不好意思。
「唔緊要。」我按著她的手背。
就當作是為了她，這一跳，我一定要跳得好。
林惠喻見我們一眾啦啦隊隊員跳得挺熟練，決定加入最後一段舞步。
可是她的示範怎麼看起來總是令我覺得不想跟著跳……
「喂，唔係呀嘛林惠喻，你排啲舞愈黎愈乸既？」
「咪係囉，你咪當我地個個都係女仔至得架。」
原來不止我一個人有這樣的想法。
「咁樣叫乸？」林惠喻問。
「咁樣仲唔叫乸？」
「咁你地想點啫？起初又唔見你地話唔好？」
「咁我地果陣又點知你最尾排果啲舞咁乸既啫。」
「你地唔好嘈啦……」鹿仔走出來。
「拿啊鹿，你話喇，我排啲舞係咪真係咁有問題先？」
「咁……咁又……」
「你講丫，你照直講就得架喇。」
「咁又的確係有少少既……」
「吓？即係連你都覺得我有問題啦。」
「又係你話照直───」
「好丫！」林惠喻盤著手：「好簡單啫，一係跳，一係唔好跳。」
「超，唔跳咪唔跳囉，好巴閉咩？」小豬鼓著臉蛋，然後拿起自己的背包：「我依家就走！」
「喂豬仔，唔好走啦，」周子若伸手：「啊狗……。」
「你地傾掂數先好搵我。」啊狗晃晃前額的劉海，跟著小豬離去。
「一個，兩個……啊豬啊狗都走晒喇，仲有邊個想走架？要走既而家好走喇。」林惠喻望著我們。
我看著那些一動不動地站著的低年級小孩，他們臉上都掛上了不知所措的樣子。
「林惠喻。」周子若說：「你係咪要搞到啲人走晒先安落？」
「佢地想走咪由得佢地走囉。」
「其實，要走既人……應該係你。」我望著林惠喻。
沒想到我身後響起一陣掌聲。
一直臭著臉的林惠喻聽到這些掌聲後像遭到雷殛一樣，頓時呆住。
「你……你地咁想我走丫嘛？好，咁我走囉。」林惠喻不忿地走了。
「喂，啊喻……」趙尚文追了出去。
周子若轉過身來：「陳子良……多謝你啊。」
「呃，應該既。」我說。
「估唔到你會幫我喎。」
「唔通我幫林惠喻咩？」我聳聳肩。
「對唔住。」鹿仔垂下頭。
「傻啦，都唔係你既錯。」我拍拍他的肩膀。
「搞成咁都係因為林惠喻啫。」我說：「不過，你唔可以永遠都好似而家咁。」
「好似而家咁？」
「隨和係一件好事，但係我覺得有時你唔可以好似乜都無所謂咁……即係，應該要有自己既立場。」
「聽到未啊？」周子若拍他一下。
「你係啦啦隊隊長黎架。」我將嘴唇靠近他耳邊：「唔好衰比黃逸茵睇。」
「你……」他的眉抽了一下：「你點知架？」
「點知唔重要，」我拍拍他的肩膀：「加油啦。」
他默然不語。
「唔好咩都聽晒個林惠喻講，要做返你自己。」
「咁……咁我明白喇，多謝你呀子良。」
「客咩氣丫。」
能夠幫他一把就好。
啦啦隊的練習沒有繼續下去，鹿仔把我們解散了。
電話震動起來，是綠社那個群組。
趙尚文錄了一段口訊。
「喂，咁多位，有咩唔啱咪講到啱囉，唔洗咁樣對啊喻既。」
羅船長說：「而家唔係我地想針對佢呀，係佢啲舞真係排得好有問題我地先忍唔住出聲。」
「我呢啲叫做有問題？」
「好心你啦林惠喻，都唔識自己反省下。」
羅船長講話不留一點情面。
林惠喻離開了群組。
「羅銘浩！我返黎先同你計。」趙尚文擲下這一句。
另一邊傳來周子若的私人訊息。
「又係羅船長。」
「佢都係有果句講果句啫。」
「好既唔講，次次開親口都無好野。」
「係呢，我想問你一樣野。」
「問啦。」
「其實趙尚文同林惠喻咩關係？」
「點解咁問既？」
「無……我見趙尚文好似幫住林惠喻咁，覺得佢地既關係唔似係社長同副社長咁簡單啫。」
「佢地係男女朋友關係。」
原來如此。
「咁趙尚文會唔會淨係聽晒佢女朋友講？」
「放心啦，趙尚文無林惠喻咁蠻不講理架。」
群組那邊又傳來訊息。
「拿，我想講啲野。」鹿仔說：「我覺得今次林惠喻的確係有唔啱既地方……不過既然大家係同一個社，我唔想搞到大家啲關係咁差……」
「咁你想點？」
「我想大家一人讓一步，互相合作，搞好個啦啦隊佢。」
「佢肯讓一步咩？」
「至少唔好用咁既態度講野先，」我說：「意見不合好正常，最緊要係唔好傷和氣。」
「子良，我鐘意你講既野。」趙尚文回來了。
「咪係囉，最多有咩唔啱講到啱既啫。」蔡晨敏也贊同我所說的話。
「好，對唔住，係我講野語氣重左。」羅船長向趙尚文道歉。
「嗯。」
「之不過啊文你唔好掛住錫啊喻唔理我地綠社至得架，唔好唔記得你係綠社社長黎架。」
「我知道，往後既日子，我仲要靠你地去幫我。」趙尚文說：「不過而家比我氹返掂啊喻先啦。」
真是拿他沒辦法。
距離陸運會還剩下不夠一星期的時間，這岔子最好能搞得定。