《M-club之警察故事》: 第一章

2005年，有個5個男仔，自稱型黨(M-club)，受馬sir指派，進行調查黑社會新義安之臥底任務。
 
1月7日，深水埗好彩快餐店兩名食客於進食時被人用槍射死，警方初步調查只是一宗因各工程公司爭奪大厦維修合約，而演變成既生意糾紛，警方已拉左一名開槍既建築公司經理，經理姓楊。但馬sir 上司，鄭sir總警司深入調查，發現該經理本來姓俞，幾日前去過北京，見過國家領導人李克強、習近平。鄭sir 亦發現有警員大事化小，企圖拉一個人就結案。此事絕不簡單。
 
1月9日，流浮山有新義安成員走私200斤白粉運入香港，市值逾1.5億元。警方拘捕16男7女，疑犯利用快艇走私，表面上走私目的係增加黑幫新義安收入，但事實上被捕人士中，有一名姓黃男子，喺大陸已加入共產黨，有黨員背景。
 
1月10日，警方於將軍澳破獲一個地下賭場，拘捕37人，檢獲110萬元籌碼，表面上目的係新義安借機會聚眾，拉人入黑社會，但事實上新義安將軍澳堂口成員太多，早前爭地盤內訌、分裂，新的新義安大艇，屋企人有軍人背景，其叔今是廣州軍區少將。
 
以上種種跡象顯示，新義安將會喺香港繼續有大搞作，而且同內地國家政治局常委、軍方，有密切關係，警方有必要深入調查幕後主腦，及新義安下一步行動，以維持香港社會秩序。
 




1月12日，5名型黨成員，分別叫阿型，飛英，阿帥，靚仔，阿正，受命於馬sir ，進入新義安於蘭桂坊既竇口”Club Shake Shake”，因為有證據顯示Shake Shake 有人販賣白粉，馬sir 決定派出呢5個臥底，初步目標係接近一個名為阿華既一名大艇。
 
 
講起阿華佢身形矮小。每隔幾日阿華都去一次Club Shake Shake，而佢同場內一名毒品拆家阿業最為相熟。
 
Club大廳內，阿華同同伴玩得ha ha 大笑，阿帥走過去，扮識阿華，同佢打招呼，企圖接近阿華。但阿華見阿帥生面口，於是不理阿帥。大哥型見狀，SMS帥﹕「睇定D先」。於是5人喺club 內連續坐左幾日，結果阿英發現左一件事，就係阿華每次入club都攞一袋嘢俾阿業，之後業會攞袋嘢入VIP房再分俾出面D客。眾人立即知道呢袋一定係海洛英(白粉)。阿型立即走出club用電話SMS俾馬sir滙報發現。馬SIR高級督察正在灣仔警察總部當值房，馬SIR睡眼惺忪般打電話俾5人之領袖阿型，叫佢領導各人去搜證據以拉拆家阿業，並嘗試埋阿華身。阿型於是SMS叫四隊友離開CLUB，去阿型喺蘭桂芳附近，喺荷李活道的唐樓「永安樓」住所開會，再作部署。
 
會上，型說﹕「阿華係新義安內主要負責對外事務，表面上交遊廣濶，其實會內兄弟都當佢阿四，係「埋佢身」收集新義安消息既好對像。」阿正說﹕「華身形矮小，可以用呢條計。」阿正將計謀喺眾人耳邊耳語一番，於是各人受計，離開走去準備。阿型打電話俾馬SIR要借6名演員扮古惑仔增援。
 
晚上11pm，華拎住一袋嘢走入Shake Shake，阿帥、飛英、靚仔、阿正四人，連同6名假古惑仔，帶住面罩喺club外埋伏。阿華走上club外門口樓梯，走到樓梯一半，十人立即四面衝出，飛英大叫一聲﹕「你就係阿華啦﹗」，阿華受驚一望，飛英順勢一拳打爆門口reception一張玻璃枱，作勢要打人般。阿帥說﹕「喺我地個場賣粉﹖有冇問過我地先﹖」十人包圍華，阿正一手將阿華推落幾級樓梯，令阿華仆跌於地上。華驚問道﹕「你地係邊路既人﹖」阿英說﹕「14K既喪坤…」呢個時候阿型立即由附近巷仔衝出，將十人打倒跌於地上，十人企起身。飛英叫道﹕「我地走，叫大佬call馬嚟。」十人快速離開。




 
阿華驚魂未定，阿型問華﹕「你有冇事﹖駛唔駛報警﹖」
 
阿華心諗﹕「報警﹖我成袋粉WOR」，於是立即叫道﹕「呢位兄弟，多謝你出手救左我，不過黑社會之間打嚟打去係一件好閒既事，唔駛報警，無謂搞大件事。」
 
型﹕「你咁講我都唔放心，我驚佢地返嚟再打你。」華見阿型身型高大，心諗﹕「我自己都正需要人幫我做嘢，不如就叫呢個蒲精幫我」，說﹕「師兄你身手咁好，不如留個電話，我有嘢可以搵你幫手。」
 
型立即同門口reception借左紙筆，寫左個電話俾華。阿華俾左自己咭片俾型，阿型一望，title 係上市公司恒平集團既公關主任。阿華問型﹕「大佬你生得好英偉，點樣稱呼你好﹖」型哈哈大笑，道﹕「叫我大佬型得啦。」跟住型假意轉身走人，走左幾步，型叫住華﹕「停低﹗」，華停步，型問華﹕「有冇粉賣﹖」華一愕，型繼續說﹕「我毒癮起，又call唔到我個拆家，咪睇你識唔識人賣D粉俾我囉。」
 
華對型說﹕「我有朋友賣白粉，你跟我嚟，我介紹俾你識。」型跟住華上左Club Shake Shake，華走去拆家阿業身邊，向阿業介紹道﹕「呢個係我救命恩人型哥，佢想同阿業你買D白粉止癮。」阿業正煩惱D貨銷情麻麻，立即熱情招呼﹕「啊型哥，我D貨好純你要幾多﹖幾多貨我都俾到你。」阿型﹕「夠我食三，四餐已經得ga啦~」。阿業說﹕「等等，我攞貨俾你。」




 
如是者，阿型同阿業交易左幾次之後，型同業，華班人都混熟左，而且阿型將靚仔，阿正二人介紹俾二賊認識，三人同二賊一齊混熟左。一日靚仔故意扮醉酒，走去問阿業﹕「你地d毒品，其實係點得返嚟﹖」業說﹕「我手下雖然仲有幾個小拆家，但我都只係負責分貨，阿華負責帶貨俾我，我d貨來源其實都唔清楚，不過聽講阿華個老細有中共照住，所以新義安成個字頭有中共幫助，取得新鮮白粉供應。」
 
 
又如是者，阿型同阿業又做左十幾次毒品買賣，阿型、靚仔，阿正同阿華、阿業越混越熟。之後阿業又向「型哥」介紹club內3名小拆家俾阿型認識，於是警方得知場內其他拆家的身份。
 
2月3日，鄭sir決定係時候將呢間club既拆家一網打盡。型今日如常同阿業攞貨，阿業走入VIP房想攞貨之際，阿型轉身，向遠處既靚仔打個眼色。呢個時候，靚仔打電話俾馬SIR，說﹕「可以拉拆家阿業」。馬SIR帶同一早附近埋伏既毒品科警察，迅速包圍Club Shake Shake，並捉走場內所有拆家，包括拆家阿業。警方拘捕共4名拆家，並以販毒罪名起訴。
 
第二日，阿型約見阿華，提及阿華老友阿業俾人拉左既事，華無奈同阿型講﹕「出得嚟行古惑，其實預左會有今日。」型只好安慰華一番，又說﹕「你地一次過俾人拉左咁多人，我阿型可以隨時幫你手，包括…賣白粉。」華說﹕「其實我仲有大佬，我唔可以委任你做拆家，我冇呢個權力」(待續)