我叫求東。: 第一章 漁村仔

我叫做求東，係一條漁村長大。我冇咩機會踏出城市，因為果度通街都係鬼佬，雞腸又唔識多隻。野食又貴，村入面啲檔口又平又抵食。所以，我由細到大都幾乎留係村入面，除非有咩節目，我都會同班兄弟一齊落山，搭船去尖沙咀玩。

我地條村近近幾年既發展都叫完善，我老母以前淨係係天台讀書，老豆就跟住呀爺去捉魚。直到今日，我地都總算有間小學讀。

我每日起身就係踩單車去"大公"玩。呢度係一塊空地，得兩棵樹，幾枝鋼根。但係就成為左我同陳展同大強既"小地盤"。

陳展同大強係我由細到大既好朋友，用兄弟黎形容更加貼切，因為我地都係著同一條底褲長大。

事關大家既老豆老母都係一齊長大，又住係隔離，所以我地幾乎打死不離。返學，食飯，捉魚，踩單車，咩都係一齊做。





陳展睇上去瘦到成條死魚咁，不過係我地村讀書都有返咁上下，每次常識同數學都係拎第一。大強份人就傻下傻下咁，不過講起打交變左另一個人。

係呀，打交就係我地生活既一部份。

對我地啲漁村仔黎講，拳頭最硬就係最強，咁先稱得上做男子漢!而呢個地盤就係見證住我地成長既印記。

呢達空地原本係屬於第二班漁村仔。佢地個大佬就叫做柏飛，大我地三年。細個已經唔讀書，走去張伯間機鋪打機。似住自己個呀哥係城度跟大佬就蝦蝦霸霸。

因為呢達空草地係好多仔既集散地--跳飛機，麻鷹捉雞仔，咩都係度玩。每次柏飛班友黎度就會趕走晒我地班仔，係度煲煙，睇咸書。





我地當然唔妥協啦，就群班仔打佢地，但係搞到一身傷既永遠都係我地呢邊。

直到有一日，陳展佢俾左個提議。