美國佬的衝擊 ，異能の抗爭: 第一章
「花火亂飄散，斷腸人在那？」
我企係國金二期既天台，左手拎住支純萬寶路，右手渣住罐得番兩啖既朝日，聽住本地地下樂隊既歌。
然後大喝一聲…
「嗚阿！今晚既幻彩詠香江真係好幻彩阿！」
「嗖！」
「喂，喂！我支煙呀！唉！」
唔知邊個咁大個人仲玩bb彈槍，仲要一下就射穿左我支煙，係無辦法既情況下我當然就緊係點過支啦！
但係...停！ 點解我見到有紅光既，仲要越黎越多，唔通我咁快就醉？
「哦，明哂啦！幻覺黎架姐，嚇我唔到既！」我心諗。
但係岩岩果支寂寞的煙又真係熄左… 「屌你啲死人冷氣機滴水就搵人搞搞佢啦！一支煙你估好平咩！」不過呢度係天台黎架喎…咁即係…
「咁咪即係落雨囉！？」我真係聰明，咁難既問題都比我解決到，但係...落雨既話就一定有雲，有雲既就睇唔到幻彩詠香江啦...唔通係同啲紅光有關？
「唉，算啦，呢d關我咩事呀，繼續食多支煙算啦！」
紅光慢慢咁越黎越多，成件事變到恐怖過海洋公園十月全城哈囉喂既聖羅籣咁，我就緊係拿拿臨飲埋果 兩啖朝日就閃啦，好中意夏蕙bb咩。
一拎起就有條紅線對住左罐朝日 ，「連我罐酒你地都唔放過？無咁易！！」
我將隻手拎高放低，再拎高又放番低，但係條紅線一直都無離開過罐酒半步，月老你係咪搵左個「女罐」比我罐啤酒？
「咩事先而家？」唔通我想飲啖野都咁難！？
突然間，又「嗖」一聲，將我果罐啤酒驚天地泣鬼神嘅浪漫愛情故事射穿，我望住因為我唔小心放手整跌既朝日先生，心中一陣悲痛，朝日，你安息啦，我忍住涙水，朝日 ，雖然你我相識只有短短半個鐘，但係呢段日子，係我過得最開心嘅，呢個仇，我一定會幫你報！ 希望你係下面可以搵到你嘅女罐小姐，有情人終成眷屬。
「邊個，邊個？同我出黎，隻抽隻!我以家一蚊挑你機～！」 我專登將個機字拖長，因為可以表示我對罐朝日既尊重，同埋仲有我口喝無野飲既深深不忿。
「你老尾，你決定唔出黎啦麻，好！你唔出黎我走！...我走...我真係走！...」
「喂呀你出黎啦，其實我真係好口喝呀，我已經無錢買野飲啦，你還番個朝日先生比我呀！鳴呀！」
一個黑影係左邊閃左出黎，之後係右邊，接住係左邊，場面越黎越多黑影，到最後我都黑埋一份...
我打開雙眼，我見到我既前途，一片光明。 呀!唔係，只係呢度周圍都係白色，比左個錯覺我姐，但係…話時話呢度係邊度？
我記得一堆黑影圍住我，跟住我都黑埋，眼前一黑就黎左呢度…… 唔通天妒奇才，因為我又靚仔，頭腦又好，所以捉左我黎呢度？
唔係掛？
涼風有訊，秋月無邊，虧我思嬌既情緒好比度日如年， 雖然我唔係玉樹臨風，瀟灑倜儻，但我有廣闊既胸襟加強健既臂彎。
「細路，收皮啦！」
「邊個？邊個仆街講野？」
我心入面諗野又關你事？
「咁就緊係關啦，因為係我帶你黎架麻！」
「頂你個肺，又黎，明明我初戀情人就係我老公，唔關我事架麻，你又會帶我黎呢到偷窺我個心既！」
既然成件事變到咁聖羅籣，我就的起心肝拎出部洛基亞打電話講遺言..
一拎出黎點知部3310係咁閃係咁震，我起初同大家一樣都係以為電話嚮...
點知...
最恐怖既事發生啦...
部3310有wtsapp搵我喎...
其實有wtsapp，震係平常不過既事，但係點解呢到會有wifi既...
「wifi一早就全球覆蓋左啦傻仔！」一把女聲似遠亦近咁傳入我神聖既腦袋，但我擺出一副瀟灑既態度冇理過佢，正當我撳掣嗰一下，其漬髮生鳥！
3310既螢幕居然…
無變過！
即使我撳左掣都係…
無變過！
我十分懊惱，陪伴我多年既3310終於變左舊磚…
曾經佢係我中學既初戀情人，佢可以引發恐怖襲擊，可以當百潔布用黎洗碗，可以用黎同朋友打網球分享天神賜俾我既喜悅，我死慳死抵，連媽咪！丫講錯，連老母麵都唔食！終於買到佢！
但係點解！點解要係緊急既關頭變舊磚！我連緊急通話都撳唔到！
我歇斯底里嗌出一句黎填補我心中既空洞：「咁即係點先！我想wtapps姐！」
「傻仔！我見係你先問炸！係咪要屌阿？連touch mon都唔識用？」
此人突破盲點，功力肯定異於常人，正所謂古有硬幣改變磁通量，今有3310改變我力量！
我心中既殺意之波動此時此刻終於醒覺！
「丁力係邊！我要殺死丁力呢個仆街！」
「丁力唔係度！」
「咁你係邊個！」
「我就係你！」
「咁即係你就係我？」
「冇錯！若我與歌再加上你，溫度將提升更多！」
「……」
留下既只有寂靜，我心底裡既阿龍已經俾我打敗左，一切回復正常，回想番剛才果把女叫春聲，傻仔前傻仔後咁嗌我，唔通佢對我有意思？心中不禁泛起了陣陣既漣漪。
正當我沉醉緊既時候，突然有一梳蕉從天而降！
「食蕉啦你！」女聲溫柔中帶有絲絲既怨恨。
「copy that,sir.」我溫柔咁接住梳蕉，拼命咁完成食哂啲蕉既任務，估唔到佢連食既方面都照顧得妥妥當當，真係窩心，我決定將呢梳快要死去既蕉命名為「蕉屍暮想」，用呢個名字黎記念蕉既離別以及我同把女聲之間既果種柏拉圖式愛情。
嗚阿！係呢個moment我好想瘋狂食蕉阿！
「只不過你係點變d蕉出黎架！？」唔通呢條女係....
「我係真金白銀買超能力番黎變梳蕉比你架，係咪好醒先！」
我從來都未見過呢把女聲既主人，但係佢會用錢買超能力送梳蕉比我，睇黎佢係我既舊相識...
但係我究竟點樣先可以見到呢條女既真面目呢，唔通我要...停！咪住，佢岩先話買超能力？？
＿＿＿＿＿＿＿＿＿＿＿＿＿＿＿＿＿＿＿
2020年，美國將全球的所有國家吞併正式成為強國，剩低既只有香港呢幅小土地，因為香港係異能者既...唯一一個集中地。
美國既人口佔全球98%，剩低既2%其中1%是北韓人，最後的1%就係異能者。 我唔係美國既人，亦都唔係金正日既餘種，我係異！能！者！
自從上次我係天台飲醉酒發現左我既能力之後，我既責任感都強左，例如，我食完包煙一定會買過第二包，我出街買蕉食一定會帶錢咁。
但係自從上次個叫春女消失左之後，我就一直都好記掛住佢，我亦知佢終有一日會太掛住我食蕉既樣忍唔住番黎搵我，所以每當有幻彩詠香江既時候，我都會播住香港地下樂隊既歌，食番口萬寶路，拎住罐朝日，係天台咁等佢。
我知佢都係能力者，因為上次既情況似夢非夢，我醒左之後都仲有（蕉皮）可以比我踏，咁細心既人係邊到搵？
今日都唔例外，但係正當我想買番罐朝日果時，間七字頭既便利店剩番朝日超級乾，原諒我唔識讀個名，我只係知道總有一間係你左近。
真係搞撚笑，啤酒出超級乾，咁唔知遲啲雪糕會唔會出隻超級溶呢？
不過唔緊要啦，我照買，上到天台呷住啖超級乾，個口就越黎越乾，果然名不虛傳。
「拋一根煙，拋下所有，對你，對你，思念！」歌播到呢到我就彈走支煙整停音樂唱起另一段，「尚未忘記，曖昧遊戲，結局完美，剩下了自己，自以為守護著你...」
我唱到呢到，個幻彩又出現紅光，我緊係知道我能力走火啦，我即刻放低罐酒，「鳴呀！自以為守護著你！！」我真係好掛住佢...
一重重黑影突然現出，我知道佢黎啦，相熟既情況，一樣既地方，唯一唔同係我既心情，我懷住一顆感恩既心，進入呢個白色空間...
女神你終於黎搵我啦！？
＿＿＿＿＿＿＿＿＿＿＿＿＿＿＿＿＿＿＿
兩個作者好比心機寫，為既只係你地一個批評