唔小心食咗亞仔嘅女朋友: 九

九)復仇

Ruby一路淚帶梨花一路跑，肥仔昌心有不甘係後面係咁搏命追…終於Ruby最後都停低係度等埋佢…肥仔昌大汗疊細汗一路扯晒蝦走埋嚟…

「Ru……by……吓吓…吓…叫咗…你唔好走…究竟…發…發生咗咩事呀？…吓吓吓…」

「你仲乜追嚟？嗚嗚…」Ruby索性坐咗係地下度…

「亞姐呀……吓吓…你冇啦啦喊晒口…就咁衝咗去…吓吓…我好驚你有事呀！」





「我冇事…」

「你咁樣都叫冇事？講出嚟聽吓啦…頭先我見你聽完個電話就咁啦…」

「俾返個電話我！」

「咦…我點解諗唔到嘅？睇下你頭先同邊個傾電話咪得囉！睇睇先…」

「死肥仔…攞返嚟呀！！」





「咦？係Christy喎……咪住先！究竟發生咩事呀？係唔係佢有咩意外？Ruby…你唔好嚇我呀……」

「佢冇事…你唔使擔心！」

「但係……」

「你好煩呀！男人老狗你咁八婆做乜呀？我哋D女人嘢關你撚事咩？」

「哦…對唔住…」





「…………」

「…………」

「唔…算啦…喂…肥仔！我個包呢？」

「你仲好講！頭先掛住追你…D嘢食全部留底晒啦…」

「你個死蠢！我哋快D返去食埋D野啦…」

「吓？隔咗咁耐…俾人攞咗啦！」

「我哋擺底去廁所唔得㗎？行啦…」

「哦……咁我哋仲打唔打電話搵佢哋？定係等到十二點去條橋度？」





「煩…坐低先講啦！」

另邊廂殘廁內……

「希…希呀…你做咩停哂手呀？」

「對唔住……Christy…我做唔到……」

「希……唔緊要！我唔介意㗎…呢個係我哋嘅秘密！我絕對唔會話俾任何人知㗎…嚟啦…攬住我！我想你俾D温暖我…」

「對唔住！我真係做唔到！我…我唔可以做D對唔住Ruby嘅事！我只係愛佢一個……」

「希…我知…我明㗎…不過呢一刻我只想你俾D温暖我！就當俾個美好回憶我…好唔好？」





「Christy……」

「希……錫我！」

「唔得…真係好對唔住…我哋係好朋友嚟㗎嘛…我，你，Ruby同肥昌…係咪？」

「係係係…係你老母呀！仆街仔…有得俾你免費扑都唔扑？你係咪痴撚咗線？好…不過我話你聽…無論我哋有冇做到…你個Ruby都認定有㗎啦…」

「Christy…咩呀？我唔係好明？」

「唔明？你頭先好撚High揸住我對波叫春嗰時，我靜雞雞打咗電話俾Ruby…我諗佢全部都聽到晒…」

「你……你點解咁做呀！！今次俾你害死啦…」

「因為我愛你…我要同你一齊囉！希…錫我啦……」





「你行開呀！你都痴線㗎…我依家就搵Ruby解釋清楚…」

「真係好笑…你估佢會信你咩？」

「Christy，當我求吓你…你陪我去解釋…我最多揸咗你幾嘢姐…其他乜都冇做過…」

「死咗條心啦…一來Ruby唔會信，二來我根本唔會同你去…不如咁啦…你同我一齊啦…我哋會好幸福㗎…」

「你放手…你唔去，我自己去！」

「葉信希！你同我企係度呀！！你……你好！有本事你走！我要你後悔一世！」

較早一段時間…





豪叔一個人自己走到鴨寮街某間店鋪内…

「華仔…好耐冇見啦！幾好嘛？」

「喂喂喂～豪哥…冇見一排有精壯咗喎！點呀？有乜指教先？」

「落得你呢度梗係買返D好嘢啦…近排我發覺屋企成日唔見錢…想裝返個針孔！睇下你有乜介紹…」

「吓？唔係掛？你好似有一仔一女喎…真係要好好管教吓…記住依個年代打唔得架，要多D溝通先得架！我哋呢個香港未來就靠哂佢哋㗎啦…」

「知啦…我同佢哋不嬲以朋友方式相處…從來都冇頓起個老豆樣…不過呢家香港愈來愈亂，後生仔係香港愈來愈冇自由，我真係好擔心佢哋將來嘅出路…你睇下呢家個仆街政府做咗D乜？自從回歸以嚟上任嘅特首，全部都冇撚用！一個八萬五廢柴，一個貪污，呢家依個仲衰！強制打壓民生…上台以嚟全部都係語言偽術…你話…你話…我哋幾時先至有一人一票嘅真普選？」

「豪叔…你又唔使勞氣嘅！凡事都有兩面睇嘅！始終香港都係屬於中國大陸嘅一部分…呢一點係事實，而且冇得改變…共產黨建國六十幾年，從來都係咁專制…對香港算係唔錯㗎啦…依家全世界消費最多都係我哋D同袍…雖然佢哋D行為真係仆街咗D…又冇禮貌，又隨地大小異便，又破壞公物
咁…但係真係振興好多國家嘅經濟…所以呀…全世界D國家對佢哋真係又愛又恨……」

「睇嚟你都係親中多D喎…」

「er……唔係喎！我只係唔想同D錢過唔去姐…我哋身上流著始終係中華民族嘅血，依個係改變唔到嘅事實…我話你聽…我對政治冇興趣！你問我愛唔愛國？當然愛啦！人哋日本仔當年就係愛國，先至打到我哋呢班中國人一仆一碌，如果佢地當年唔係衰On鳩嘢起美國…俾人落兩個原子彈！我諗我地仲係淪陷梗…仲講乜嘢民主，乜嘢自由！屎都唔知有冇得俾我哋食呀…」

「華仔，但係我覺得近排班學生攪嘅示威真係冇錯喎？…」

「我從來都冇話佢哋錯！我個衰仔依家咪又係日日佔中，我都好支持佢哋㗎…我啱啱先俾咗八千蚊叫個仔補給佢哋嘅物資…人一定要有自己嘅理想！星爺都有話啦，一個人如果冇夢想？咁同條鹹魚有咩分別？我只係同我個仔講…自己一定要小心…千奇唔好走最前…有咩事就唔好逞英雄…我個仔都不知幾開心！」

「咁你姐係兩頭蛇姐…」

「豪叔，依個世界唔係非黑即白㗎…如果真係咁樣就真係死得人多囉…我個仔話我聽…佢有D朋友上facebook一見唔係自己人又或者講唔埋就Unfriend佢哋…有個仲攪笑，同屋企人各持己見，老豆老母唔支持佢佔中，佢就索性唔返屋企，呢家日日係度瞓街…你話攪成咁幾咁無謂！」

「算啦…我哋今日不談政治…我一陣食三㸃，同你簡完一齊食返個Tea啦…」

「好呀…我都未食嘢…」

「拿…呢幾款就係最新間碟用嘅針孔盗錄器…全部高清可錄最少十二個鐘…快速搜畫，儲存容量由8GB到64GB都有…支援手指，Harddisk同埋咩嘢卡都得…童叟無欺，價錢由最低八百蚊到最貴四千八都有…你隨便睇，有咩嘢唔明可以問我…」

「哇…好迫真喎…鏡頭咁細？解像度高唔高架？」

「放心…最平嗰隻都有成三百萬Pixel，包保唔會矇查查！」

「你知亞叔我係退休人事冇乜收入啦！大家咁熟…有冇折頭先？」

「豪叔…就係大家咁熟先講…雖然我係老細，但係唔止我一個，我仲有兩個Partner㗎…咁啦…最多俾個八折你…好未？」

「我諗住買兩個喎…都係得八折咋？」

「搵食艱難…真係最多得八折……」

「唉…好啦好啦…就呢兩部啦…易唔易裝架？」

「易到爆啦…直頭唔使睇說明書都識用…」

「係真唔係呀？咪老點亞叔呀…」

「點敢呀？真係㗎…嚟啦…去大快樂食個Tea啱唔啱？」

「咁行啦…」

Mcdonald內………

「嘩…我哋D食物居然仲係度？」

「嗱…肥仔…睇下…都話冇人掂㗎啦……」

「係啦…至醒係你啦…又話肚餓？食嘢啦…」

「食乜鬼…凍鬼晒啦…」

「好彩我冇買雪糕姐……」

這時突然出現四個MK打扮的三男一女，其中一個男大聲對住肥仔昌同Ruby講：

「喂喂喂…死肥仔！做乜嘢呀你哋？霸我哋張枱仲食緊我哋D嘢？」

「唔係喎…張枱係我哋坐先㗎喎…仲有…呢度得兩個餐咋喎…你哋四個人喎…」

「屌你老母死肥仔！我哋四個人唔撚食得兩個餐㗎咩…有乜嘢証據話係你哋㗎？」

「你要証據好簡單姐，我頭先用八卡通找數，張單就有…」

「死肥仔…你買棺材唔知掟呀？郁佢…」

「哎呀…停…手呀！救命呀！」

「停手？攪埋你條女仲得呀…」

就係喺呢個時候，Ruby唔知係邊度攞住把界刀…諗都唔諗一野界落嗰個MK男嘅大脾度…

另一方面，信希離開咗Christy之後，一個人漫無目的去咗一間茶餐廳正打算打俾Ruby…

(呢次大獲啦…究竟點樣先令到Ruby信我同Christy係冇嘢呢？)

「喂…細路！叫D咩嘢食呀？」

「吓？一個…一個常餐…」

「咁飲咩呀？」

「哦…凍檸茶少甜…唔該」

「特別新聞報導…警方較早前向示威人仕施放催淚彈，至今己有一百二十人到達附近醫院求醫…另外早前被警方清場的路段…有大量學生及示威人仕重新聚集…現場警方一度高舉<往後撤退，否則開槍>的警告字語…」

「仆街…開槍？唔撚係呀？」

隔離枱有對青年男女大聲拍枱大叫：

「仲成世界嘅…催淚彈仲唔夠？仲想開槍…班學生嚟咋…家吓打恐怖分子呀？痴撚咗線呀班差佬！」

(哇…唔知Ruby佢哋走咗未呢？依家咁危險…唔理啦…都係打過電話先……)

「嘟嘟…嘟嘟…」

MK男雖然著住牛仔褲，但界刀嗰一嘢非同小可…當場血花四濺，隔離幾枱平時坐係度吹水嘅亞叔亞嬸見到咁情形個個都鷄飛狗走，最搞笑係平時同MK男搭晒膊頭嘅MK男女一見到咁嘅情形，講都唔同佢講聲，就咁以九秒九的速度速離現場…

就係咁，現場只係剩返肥仔昌，MK男，同埋暴走中嘅Ruby…

「對唔住…呢位女俠！係我細路仔有眼不識泰山…你就大人有大量原諒細路我啦…」

「係啦…Ruby…我哋玩大咗啦…就咁算啦…你睇下條友流到成地都係血啦…」

「…………」

「係呀…係呀…我保證唔追究……」

「襯我未改變主意之前…即刻同我走！！」

MK男一聽到呢句說話，有如皇恩活蕩咁拮吓拮吓離開咗間M記…

「Ru…by，你仲企係度？行啦…搏拉咩？」

肥仔昌一手拖住Ruby强行跑出M記，跑咗足足五分鐘…肥仔昌今日做咗一世人最多嘅運動，扯晒蝦嘅佢同氣定神閒嘅Ruby完全係兩類人…

「頂…頂…頂唔順啦……抖抖先……吓吓吓吓…」

「肥仔…都叫咗你做多D運動啦…真係冇鬼用！」

「你仲……仲好講…唔係為咗你！吓吓…我死…洗…四圍……走…吓吓…」

(呢個肥仔都幾好嘅…不過始終唔好！我唔想傷害佢…佢太好人，太善良…我唔想利用佢……不過我要報仇！！我要葉信希後悔一世！！不過搵邊個可以激死佢呢？？……呀！！有啦…點解我諗唔到呢？一於咁做！葉信希…你睇住嚟…我要你家庭同愛情一舖清袋！邊個對我唔住？我要佢十倍奉環………)

「喂喂喂…Ruby…你仲咩鬼發晒呆呀？」

「鈴鈴鈴鈴…」

「咦？係亞希打嚟…喂喂…係呀…係呀…哦…Ruby佢冇事！聽唔到電話姐…係呢…Christy佢又點呀？……坐低傾？好呀！平時飲開間Starbunk等？好好好…一陣見！」

「Ruby…你聽到啦…行囉！」

「好…咁行啦…」



下回預告<豪叔的決擇>

一念天堂，定係一念地獄？…故事分為兩個支線…係走向大團圓結局？定係仆街悲劇收場？一切盡在豪叔的決擇
…