[有甜]故事發生係2012年，我叫林燁磊。: 第二章

我一直都覺得自己係一個冇音樂細胞既人，點解咁講？小學學左４年小提琴都仲係得３級既證書１級實力同１０級既不情願。唔知除左我之外仲有冇人係咁，每年中學有兩日係我最唔想面對，就係音樂考試。睇住Ｄ同學個個又自彈自唱又張敬軒上身咁，而我，唱得細聲到機乎自己都唔知道自己唱緊咩歌，嚴格黎講只係讀緊字，俾小小高低音。
 
每一年既呢兩日都過得特別漫長，當過左５個咁漫長既日子之後我同自己講要自學彈琴，唔洗多，一首歌，每件考試都repeat一首就夠。接落黎既唔係一連串既練習，只係一次又一次既FF，幻想自己係音樂室入面如痴如醉咁享受緊自己所彈既音樂，係我同鋼琴有交流既時候有女同學住我背影幻想同我有進一步交流。
 
我地大家都知道FF係唔會有好結果，所以接下來既第６，７，８，去到第１１個都仲係同往年一樣咁漫長。直到有一日我去左我朋友屋企，正因為佢係一個音樂神人，神到基本上一隊band每一個位佢都勝任，當然我係後來先知道到底佢２我見到牆角有枝木結他，口多多問左句：你第時想教音樂，你估你教唔教得識我彈一首歌？男人既共通點都係有一個，或者多個死穴，係唔可以俾人講，而佢同我一樣，係唔可以俾人激。就正正因為我呢一句口多，我拎起左一支結他，我拎起左我去到而家為止既３段愛情，另加２段曖昧。甜？當然有，不過辛酸比較多。
 
從個一日開始，我由一個最Basic既C chord學起，學到可以完整彈一首齋掃chord既如果時間來到，係中學生涯最後一個漫長既一日同音樂神人一齊攞左我有生以來最高分。其實真係有ｄ似戲咁講，原來幾條木幾條弦可以帶到咁多自信俾我。