生活小分享：《咁快回味那些年》

生活小分享：《咁快回味那些年》
 
又回到最初的起點……
 
我從來都冇諗過會重返中學校園 ﹙唔係返母校﹚ ，而且係以教者既身份。( 不過我幻想過係大學教書……) 而加當然唔係去做中學老師啦，只係個詠春班既小小助教。但連個班都未正式上，我就已經開始回味那些年。
 
尤其係中五、六，七個幾年，真係充滿左回憶。或者係因為個幾年特別捱得辛苦，又或者係辛苦得黎，身邊有好多人互相扶持。
 
早幾日係太子見到補英文既「天王」，中學個時我跟佢補左幾年。雖然佢都仲係咁大份，但好似已經由肥貓咁既身型減到肥媽咁既「窈窕」。而加每逢行過旺角東個條行人天橋，都會諗起去補佢習既日子。因為我去個到補左幾年，就好似返緊兩間中學咁。
 




講起補英文，唉，英文真係好屎。有次英文聆聽測驗，個fd得十幾分。老師話二三十分個d努力下都仲有得救，有機合到格。十幾分個d, 求神拜佛把啦。跟住我地幾個fd就以恥笑黎安慰佢。但其實我地都只係有機救得番個d人……
 
除左去補習，仲有幾樣野係諗番起都覺得好有味道既。有次同幾個老友放學走人，行到出學校門口條馬路。有架車駛緊埋黎，但我覺得架車好慢，於是我就過。點知行到半路，「救神拜神」個條友突然衝出黎從後攬住我！我行都行唔到，但架車黎緊……而加諗番都覺得痴線！兩條友攬埋一舊企係馬路中心，真係等比車撞咩……咁我見向唔到前，就即刻向後退。好彩大家安全番埋安全島。條友竟然話架車黎緊，驚我有事，想拉番我埋去。唉，比個司機見到兩條痴線佬攬住企係馬路，真係難得佢咁冷靜咁駛過……不過我都好高興有個人覺得我有危險既時候挺身而出。
 
近測驗考試既日子我地又會一齊去自修室溫書。溫一陣又吹下水，一齊唏噓嘆氣，講下前路幾灰暗，又或者去食個下午茶再溫。有次我地食完下午茶入自修室。點知比人截住，話我地唔應該出去太耐，要食野就等放飯時間。我地say 晒sorry話唔知規矩，人地先放我地入。 ﹙其實係知既@@﹚ 但「求神拜神」佢仲唔知訂，咬住粒珍寶珠入自修室，即刻又比人的左出去…… ﹙自修室唔比食野﹚ 我地就係入面望出去，睇住佢食晒粒珠先入到黎。
 
由唔知幾時開始，我地興起捉棋。象棋，五子棋係轉堂、落堂既時候一定會出現。有時仲會捉唔停手，比老師話再係堂上見到就以後唔比再捉。畢業之後就再冇同佢地捉過啦。而加大家都忙住走自己既路，應該冇乜機會再一齊捉棋。
 
我地又試過暑假做夜青，成日夜晚唔訓，出黎飲酒傾計傾天光。夜媽媽揸住打啤酒係公園到，見到有兩個警察行埋黎都淆淆哋。我地唔係不良青年呀……原來佢地係黎叫我地細聲d啫……
 




講那些年又點可以唔講追女仔？我都追過……講完。
 
總之中學裡面有好多大大小小既事，可能其他人睇落好似好無聊，冇乜特別咁，但我地自己會記得呢d重要既回憶。
 
利申：扮晒老，其實只係離開左中學幾年啫……
 
講番個詠春班，早幾日師父師兄問我有咩期望，準備好未。我當堂嚇一跳，然後得啖笑。最初師兄叫我幫手，我其實都有少少興奮既。就好似當年班主任無啦啦叫我做畢業禮司儀咁，對我呢d毒男黎講，真係又新鮮又刺激，但我願意接受挑戰。
 
不過我只係諗住去扮 ﹙樹﹚木樁，比師兄做示範。同埋去見識下，吸收下經驗，增廣見聞。點知見師兄而加講起個班就幾咁熱血、幾咁興奮，幾咁期待，我都有d唔好意思。我竟然咩都冇準備XP…… 我怕會令佢地失望…… 一黎技術我完全唔係佢地個皮，二黎連心態都唔夠佢地熱誠@@ 於是我攝高枕頭諗左兩晚。為左唔好令佢地失望，我決定…… ！！ 扮碌出色既 ﹙樹﹚ 木樁！XD
 




原本只係諗住寫幾句，分享少少，點知諗下寫下就寫左咁多廢話…… 因為跟住我既回憶去寫，諗到乜就寫乜，又冇修飾，搞到成篇野既結構又散亂又無趣。
 
不過如果你竟然睇到呢到既話，證明篇野都唔係完全唔睇得既……