我係網上面識左個女仔: 第三十二章-這不是導火線(6)

我地一路行，都只係講去邊食野好果啲，吹下水，無入正題。

坐低食飯嘅時候終於到左，我亦准備開口。

「青蛙仔呀……我呢之前呢中意左呢一個女仔啊……我呢鍾意左佢呢好耐架啦……咁呢我呢就決定左呢想追佢……」
咦？唔係我搵佢傾計嘅咩，點解會變左佢講架？佢男人老九妞妞拎拎咁，做乜春呀？
係啵……佢好似話有野想問人意見，應該指呢樣啦……

「下……係呀……？」
「我查過架啦，佢住係你對面屋，佢細我地一年，帶黑粗框眼鏡，矮矮地，你認唔認得呀？」




認得……咪Anna囉……仲係我女友黎添……

「認認…認得呀……」
「你可唔可以幫我追佢呀？」
陸仔問呢句既時候無啦啦好激動……睇黎佢真係好鍾意Anna啵……

「你有無查佢有無男朋友呀……？」
「下……係啵……頂，唔記得左查呢樣……」
無視陸仔好似數學拿九十九分就係因為唔記得寫單位扣左分咁既樣，我開口問我想問既野。





「陸仔呀，我阿爸之前走左佬，阿媽因為咁自殺左，之後我發現原來阿爸去左照顧佢舊情人既仔女，但係依家佢個『女』係我女朋友，你認為我應該點呀……？」
「哇！你幾時識到女朋友架？」
「咪講廢話啦。」
「我認為你應該離開個女仔。」
「下！？點解呀？」
「你既情況你應該好明白，如果繼續同個女仔一齊就要對住你阿爸，但係你應該對你阿爸好反感先會煩惱應唔應該同個女仔一齊啦，既然你咁猶疑，其實你都唔係咁深愛個女仔姐，咁不如放手，唔好要自己難做啦。」
我合埋雙眼思考陸仔既說話，最後我都有左我既決定。

「陸仔，我幫你追個女仔。」
「下！？但係如果佢有男朋友……」




「佢有。」
「咁算啦，我無謂拆散人地啦……」
「佢就係果個女仔。」
「下？邊個？」
「我掛名細妹。」
「……下！？姐係佢係你女朋友？」
「係呀。」
「兄弟妻啵，算啦，有咩可能要你為左成全我地而犧牲自己……」
「唔係你叫我離開佢既咩……」