我係網上面識左個女仔: 平行時空的我們

如果要用一個詞語去形容你嘅初戀，你會用咩字？

單純？

幼稚？

青春？

甜蜜？





定係遺憾？

好單純咁相愛，為對方幼稚嘅舉動開心，以為自己拍緊青春偶像劇，天真地相信住甜蜜會一生一世。

但係最後，都係分手收場。用自以為好嘅方式愛對方，落得兩敗俱傷嘅下場。幾多年後，先會發現自己嘅「為你好」，只為對方帶黎左傷害？

當睇得清當初嘅分開，只係源自自己嘅唔成熟，初戀，就成為左遺憾。如果俾個機會我翻翻去嗰陣，我只想同你講一句對唔住。然後，用盡全力挽回你。

挽回嗰個笑容無雜質嘅你，挽回嗰個曾經全心全意愛我嘅你。





就算係唔埋一齊，都想話你知我咁做嘅原因，想比妳知我無唔信你，無唔愛你，起碼，起碼，令你傷心少啲。

「所以，你因為我老豆對唔住你阿媽，所以選擇對唔住我？」Anna雙眼通紅，唔敢相信兩人之間，竟然仲有一段咁狗血嘅關係。

「我⋯⋯」我一時語塞，面對Anna嘅指責，我無力反駁。其實成件事最無辜嘅人，就係Anna。

「你同你阿爸有咩分別？為左自己個心舒服啲，就肆意去傷害愛你地嘅人。」Anna好嬲。

但佢無鬧錯。





為左唔想見到阿爸，我自私咁決定放棄呢段感情，自以為是咁一走了之，彷如當初嘅阿爸。我以為Anna會捱過去，會同陸仔好幸福，但我憑咩擅自幫佢做決定？當初阿爸咪又係以為阿媽會堅強。

「對唔住⋯⋯」我後悔，真係後悔。眼淚不自覺咁流落黎，抹極都有。但我真係放唔低心入面嘅恨。哪怕成為左同討厭嘅人同一種人。

「點解你唔一早同我講？」Anna亦泣不成聲。

「如果你真係信我，就應該相信有咩問題，我地可以一齊解決。」Anna抱住我，埋首繼續喊，一邊斷斷續續咁繼續講。

「錯嘅唔係你，亦唔係我。你真係介意，我可以唔要呢個老豆。」

我愕然，為左同我一齊，失而復得嘅父愛都可以唔要？Anna心入面，我係有幾重要？

「一個十幾年無出現過嘅人，你覺得我有幾需要？你覺得佢⋯⋯害死左伯母。我何嘗唔怨佢令我媽媽受左咁多年苦？」

「我一早唔係小朋友啦，唔會因為人地有爸爸而我無而傷心。只會因為媽媽一個人咁辛苦養大自己而心痛。」





「如果我知道，傷害一個家庭先得到一個老豆，你覺得我仲會心安理得咁接受？」

「你心入面，係咁諗我？」Anna抬頭直視我，眼入面滿是受傷。

「對唔住⋯⋯我唔係呢個意思⋯⋯我⋯⋯我地仲可唔可以係翻埋一齊？」

「嗯⋯⋯梗係要一齊！」Anna表情似哭似笑。

對唔住，為我做錯過嘅，為我傷害過嘅。我會用一生去對你好，去補償翻。

係呢個平行時空，陸仔先係放手嘅人。

陸仔望住相擁而泣嘅兩個人，望住自己買黎表白嘅花，默默地轉身。





「送比你。」隨手送比一個路人，陸仔忍住眼淚衝去無人嘅角落啜泣。

唔係自己嘅，終要放低，最後一次，喊多最後一次，我就放手。

「你無事吖嘛？」拿著花的少女，遞上紙巾。