《港男FF妄誌》: [Day 13－終結開始] PART 8
跟住賣藝喺三聖裏面買海鮮，其實呢道D海鮮都幾出名～
做仔嗰陣時就無錢食，就係有得睇人食～
大個左...就更加無錢食...
而家D海鮮真係貴到仆街...再唔係就上晒大酒樓...
想自己買返去屋企煮？唔係話唔得既～不過唔係大時大節都唔捨得囉～
大時大節喎～D奸商唔劏到你一頸都係血仲等幾時？
到嗰陣，又要就住就住黎食...
至於而家呢一刻，睇落賣藝出手都好闊綽...
「老闆！呢個同我執D～嗰個同我執D～兩個人夠唔夠食架？你話得我就信架喇！揀條靚D既！游水既！最緊要新鮮呀下～好好好～信你架喇！幾錢唔係問題！最緊要正！」睇住賣藝指住個老闆黎點，有錢人真係唔同D～
賣藝算唔算係財大氣粗？咁我又唔覺～
只係豪氣...無錯！係豪氣！
唔係大陸D死土豪嗰隻刺眼既豪氣！
賣藝呢隻係會吸引人目光...吸引人注意既豪氣！
我敢肯定，香港無一個女人唔會唔俾賣藝吸引到～
我更敢肯定，如果賣藝要食，真係可以食云全港九～
唔好話食女，食仔都得～
「喂～你有咩唔食得架？」賣藝擰一擰個頭過黎，望一望我...
『你岩岩話要嗰咋野，我全部都唔食得...』我咪話左我對海鮮有敏感架喇囉...
「咁就岩撚晒～數數佢，睇下夠唔夠數！」賣藝將堆銀紙俾左個海鮮檔老闆後...
老闆數一數，笑到四萬咁既口：「岩數喇岩數喇～多謝晒呀老細～多謝晒呀老細～以後多D黎幫襯喇喎～」
一睇就知，賣藝俾人劏到一頸血啦～
喺呢道買海鮮除左出名夠新鮮外，仲出名呃錢～
海鮮價呀嘛～熟既識人既咪平D囉～唔熟唔識仲要生面口到好似外地黎咁既，你仲唔仆街？
當然，賣藝要仆我就唔會阻止佢既～
佢話到明今餐係佢請架喇喎～我仲唔話知佢死咩～
等佢明知我對海鮮敏感都要捉我食海鮮呀嗱～
去到冬菇亭嗰邊搵間文武介紹既食店，問好晒點煮法，問好價，交低晒D食材俾佢地，同賣藝坐定定等食野～
「黎兩支藍妹呀唔該～」賣藝一黎就叫啤酒...
『我唔飲得啤酒架...』我冷眼望一望賣藝...
「屌鳩你仲細路仔咩？咁大個人唔飲啤酒飲可樂呀？」賣藝一邊洗洗D杯杯碟碟，一邊口噏噏...
『我一飲啤酒就出酒癩架...』等等仲要食海鮮...今次真係仆得街...
「咁咪岩晒囉～一陣食埋海鮮～出到成身都係～癢撚死你個仆街～鬼叫你毀左我既終生幸福丫～」賣藝陰陰嘴笑…
毀你終生幸福就要咁對我...
俾你知道我岩岩差DD就上埋Miss Ko既話…照咁睇我唔屍骨無全，都要同JJ分離...
「丫～講開又講～你同阿月真係幾夾架喎～佢又係一食海鮮就敏感～飲杯先啦～」賣藝幫我斟過酒，敲一敲我個杯...
『佢勁過我好多～佢一食清蒸龍躉就會敏感到要入醫院～不過佢自己就成日都唔記得...』飲一飲過杯啤飲，我又諗起粗枝大葉既羅海月...
阿月對好多野都有敏感，但佢自己呢就唔上心...
成日都到發作既時候先知太遲...
通常到知道既時候，已經抖唔到氣，唔係飛的就要Call白車...
阿月就係咁樣一個女仔～好似好獨立～好有主見～但就唔識照顧自己囉～
「總之你地兩個就係天生一對啦～係呢...講開又繼續講...你地最後有無喺埋一齊？」賣藝再幫我斟一斟酒，好似勢要把我灌醉...
『唔...有就係有既...不過...』我又飲過一杯...腦海出現好多阿月既片段...
以往...同阿月一齊既片段...
「不過咩呀？兩兄弟唔係有所保留丫化？」賣藝再幫我斟一斟...
『不過我係唔見得光...』我一啖又飲晒杯啤酒...
以往...同阿月偷偷摸摸一齊既片段一一浮現...
賣藝打量左我幾眼，再眼定定望住我對眼：「你唔係...做左佢既第三者呀化？」
『嗯...』我點一點頭，唔係好敢直視賣藝...
我真係有D覺得自己好卑微...
其實都唔係有D...係好撚卑微...
一直以黎，我都唔係好敢面對呢段往事...
唔係好敢同人提起...唔係好敢講起...
係人地面前...係自己一個人既時候...
我都會逃避...
我係好想念阿月，但就唔係太想諗起呢段醜事...
「唉...果然...果然你真係會傻到為左可以同阿月一齊，第三者都願做...我果然無睇錯你～你真係一個情痴～」賣藝又敲一敲我個酒杯...
『情乜鬼野痴丫…傻仔就有...』我擰一擰頭…又飲一飲...
世上有乜傻得過明知人地身邊已經有情人，仲要同人地喺埋一齊？
隔左咁多年都仲想盅個頭埋去囉...
「咁你地係點開始？」賣藝摸下摸下個酒杯...
『我地...當年...最後一年中學生涯...有一日喺學校同阿月搞活動搞到好夜...阿月個男朋友...即係校草呢...』我都未將我要講既野講完...
「校草...嗰個程勝？！成個古天樂咁嗰個程勝呀？！」賣藝差D噴埋啤酒出黎...
『係丫…』我無奈咁點一點頭...
「都估到架喇...嗰陣時佢地又真係幾襯既...男才女貌...Sorry...你繼續...」賣藝拍一拍我膊頭...
屌你老味...俾你咁樣頂一頂，叫我仲點樣繼續落去？！
『佢男朋友去左打波...我就送阿月返屋企...喺漆黑既行人路上，就只有暗黃色既街燈照亮街道...』
「我想搞清楚...一種感覺...」阿月行下行下，突然停左落黎...
『下？』我回頭望一望阿月，唔係好理解呢個怪人又想點...
「我想搞清楚...對你既感覺...」阿月行左埋我身邊，拖住左我隻手...
我唔知阿月有乜野感覺...但嗰一刻，我就真係好似觸電咁！
俾阿月電左一電，我真係乜野反應都無晒...
阿月望住我雙眼...我亦望住阿月對空洞無物既一雙大眼睛...
『我...我...我...我好大手汗架喎...』我捉一捉實阿月隻手，已經感覺到自己隻手心開始熱...開始出汗...
「咁岩既～我都係喎～不過我有個好方法...」阿月另一隻手喺裙袋拎左張紙巾出黎，放喺我地隻手既中間...「咁咪唔怕囉～」
『真係一個幾好既方法...』我望住我同阿月隻手，傻下傻下咁笑...
因為除左笑，我真係唔知俾D乜反應...
一直以黎，我都好想可以好似而家咁，拖住阿月隻手...
但一直以黎，我都無諗過可以有呢一日...
我以為我一世都無可能同到阿月喺埋一齊...
「梗係好方法啦～我聰明丫嘛～」阿月就拖住左我，一路行。
嗰一個晚上，送阿月歸家既路途好似特別漫長...特別遙遠...
好似特別耐咁…行極都行唔到去阿月屋企...
我唔知係我地都刻意行得慢左，定係個心多野諗左...
或者係個天俾個機會我，可以拖得阿月耐D...
「屌你咩～講故姐～唔使講到大文豪咁既款喎～」賣藝一邊幫我斟酒，一邊屌鳩我...
『屌你咩...識得講一定係咁拖住講架啦！唔係點入心入肺呀？』我敲一敲賣藝個酒杯...
「跟住呢？大文豪～」賣藝恥一恥笑我...
『跟住...跟住我地咪一齊囉...不過就係偷偷摸摸囉...佢有男朋友架嘛…平時同我一齊既時候，咪又好似平時咁囉...我地放左學都會去下公園談下心既...不過佢成日都唔得閒...又好多時應承左話出黎，結果又放我飛機...』其實同阿月一齊既日子，真係苦多過甜...
但係就唔知點解，總係記起甜既時刻多過苦既滋味...
或者呢D就係失去之後，就只會回憶返對方既好...
「咁你地既感情，都唔係好深姐～」賣藝擰一擰頭…
『梗係唔係啦！都不知幾深丫！』直頭深到入心入肺！
「你地一齊左幾耐丫？」賣藝冷眼望一望我...
『三個月囉...』只係短短既三個月...就影響左我一生...
「咁可以有幾深呀？」賣藝飲住杯酒，冷眼望住我...
『好深好深！你唔係唔知，我有幾愛阿月架啦？』我有D怒氣沖沖。
「我知～你中一第一眼見到阿月，就認定佢係你一生中最愛呀嘛～」賣藝一直冷眼望住我。
『係呀！阿月就係我喺呢個世上，命中注定要遇上嗰一個！』我可以好肯定，由始至今都咁肯定！
「但係佢咁對你...我都未問你，你地係點散喇～佢要你做第三者，偷偷摸摸唔見得光喎...你係真係愛佢？定係唔甘心咋？」賣藝鄙視住我...
『我...』俾賣藝咁樣講一講，一時間我又答唔出口...
愛，我可以肯定係愛！
係唔係唔甘心…我又覺得好似真係有少少唔甘心...
我唔甘心唔係俾佢喺我生日之後嗰日，送上一句：「我無野想聽，亦都無野想講。」而分手。
我唔甘心既係我都仲未可以同阿月真真正正愛一次就分開左...
那故事倉猝結束不到氣絕便已安葬...才成就心裏那道不解的咒沒法釋放...
我總係覺得，如果俾我認認真真真真正正同阿月黎一次正正式式談一場戀愛既話，一定可以好幸福...
好喇～算喇～就當我認命喇～唔好話好幸褔喇...就當俾個機會我，死得好好睇睇都好丫...
總好過好似而家咁，唔生唔死呀...
『我諗...我真係好想再愛佢多一次...』我又一啖飲晒杯啤杯...
「超記鹵味！都唔知你噏乜～香港唔係文化沙漠黎架嘛？搞乜搞到你講野講到好似D死人作家咁模稜兩可咁既柒樣架？唔該～俾多半打藍妹！」賣藝飲多兩啖，一碟餸都未炒好，咁就飲晒兩支啤酒...
我講野似作家咩？如果我有作家咁好文筆，我一定將我個故寫上高登！
不過寫黎都無人睇架啦～
高登上面唔係喪屍就甜故，邊個得閒會睇我呢D又長又譖又FF既愛情故事丫～
「咁你仲有無搵佢？」賣藝再斟一斟滿杯酒...
黃色既酒杯好清澈...
『尋日先同佢去完Camp...喺山上過左晚夜...』而家講返起，都好似發左場夢咁...
一場比夢境更夢幻既夢...
「打～野～戰～」賣藝拉長黎講，放聲咁講...
『邊有呀？我地好正經咁喺山上影星空咋！』本來咁有情調既夢境，突然變左淫賤既綺夢...
「嘩～孤男寡女喺山上都撻唔著既話...你無行LUU～」賣藝敲一敲我酒杯...
『超記鹵味！講呢D！』唉...我又點會唔知丫...
一男一女獨處既話，其實真係好易互生愛意。
因為喺只有對方既空間內，眼同心都只有對方。
所以好自然就會接受對方，愛上對方。
但阿月...從來都無將我放入眼內，放入心裏...
我係好清楚...我係好明白...