[愛回‧家][推理] 執到寶事件手帖: 國產馬沙專用高達 - 第六章

  我諗都係時候要我自己冷靜少少，唔好再去諗點解部高達會唔見啦。
 
  不過可能就係因為心入面不停咁提自己唔好諗，最後得到一個相反既成效，就係令到自己變得更加在意呢件事。宜家我食飯又諗起，做野又諗起，搞到自己既精神都差咗唔少，而且最近仲開始有少少失眠添……
 
  「老公你今訓唔著呀？」
 
  我老婆阿嫦從背後面伸手過嚟攬住我，雖然佢既身軀比我細小，但係比佢攬住既時反而感覺到我既渺小。佢平時都唔會咁樣攬住我既，佢宜家之所以咁樣做，好明顯已經發現咗我為咗呢件而身心俱疲。
 
  「嗯……」
 




  我既精神已經差到冇辦法再掩飾自己既內心，只能夠好簡單咁用一個字去回答我老婆。
 
  「睇你咁既樣實係公司到有事發生呢？」
 
  「嗯……」
 
  「你不如講出嚟啦，講出嚟可能會舒服啲架喎。」
 
  就係咁，我將成件事既經過話咗比佢知，講完之後，我心入面真係好似放底咗一件背負咗好耐既重擔，當堂個心舒服咗唔少。
 




  「既然你都話唔要部高達，咁就算啦，快啲訓啦。」
 
  「嗯……」
 
  到咗第二日，我既精神好明顯好咗唔少，真係估唔到同阿嫦佢傾一傾就可以輕鬆咁多。我如常返去鋪頭到開鋪，個人已經冇再好似之前咁分心。不過今日鋪頭都係一樣冇咩客嚟，所以我都係夠鐘就收鋪返屋企食飯。
 
  食完飯之後，阿壯又一支箭咁走返去自己間屋到，而阿爸亦再次一副擔憂既樣走到嚟我，不過我今次喺佢未開口既時候已經知道佢想點，所以我冇問佢發生咩事，而係講咗句『我要過一過阿壯嗰邊拎野』之後就走咗。
 
  去到阿壯嗰到，今次一樣聽到嗰啲嘈雜既碰撞聲，不過同上一次比起嚟可以話係細咗好多。
 




  可能今次佢又唔知揾咩文件啦，呢個阿壯都做咗律師架啦，點解仲可以咁大頭蝦架？
 
  我同上次一樣禁咗個門鐘幾次，不過都冇人嚟應門。但係經過上次既經驗之後，我知道根本冇需要擔心，只需要等一等就可以。隔咗一陣之後，嗰陣好細既碰撞聲就咁停咗，隨之而嚟既就係腳步聲同埋鎖頭扭開既聲音。
 
  「二佬？有咩事呀？」
 
  「冇，入嚟諗住睇下你點啫。」
 
  「我？我點會有事呀？」
 
  「冇呀？平時你食完飯都會坐喺到睇陣電視先過返嚟架嘛，點解今日食完飯就返嚟既？仲有我頭先喺門口聽到入面好嘈喎，你係唔係又揾緊咩文件呀？」
 
  「哦，唔係，我只不過係見我宜家成為咗律師，將來一定會有好多文件，所以咪執定間房，方便將來擺野囉。」
 
  我行咗入佢間房，發現佢將啲傢俬全部移曬位，而佢最重視既玩具亦都放咗入一個新既位置到，而且睇睇下佢擺玩具既空間仲好似比之前大咗少少。




 
  「嘩，你都執得幾多野喎，不過話時話，有冇乜野要幫手先？有既你隨便開聲喎。」
 
  「冇事既，邊到會有野難到我神之馬壯先得架？」
 
  「咁是但你啦，不過執還執，唔好執到太夜呀。」
 
  「得啦。」
 
  阿壯佢不停咁向我揮手，示意想我快啲離開。
 
  之後嗰一日，我如常走返去「執到寶」到做野，見到阿飛一個人好落幕咁坐咗喺一張唔知幾耐之前收返嚟既凳到，目光呆滯咁望住我，不過就冇好似平時咁同我打招呼。
 
  「早晨呀阿飛，點解你今日好似特別唔開心咁既？」
 




  「喺咁既事頭，我尋晩去完思思到教佢結他之後返嚟就發現唔見咗一塊彈結他用既撥片呀，唉……」
 
  「只係一塊撥片啫，唔洗咁唔開心喎。」
 
  「事頭你唔知喳，嗰塊撥片係思思送比我架……」
 
  唉，原來係同思思有關，唔怪之得你會咁在意塊撥片啦。
 
  「但係你咁傷心都唔係辦法架喎，洗唔洗比你抖下先再做野呀？」
 
  「咁又唔洗，我冇錯係就係傷心咗啲，但係我都知乜野係負責任既，放心啦事頭，我唔會因為啲咁少既事而做唔到野既。」
 
  講完呢句之後，阿飛佢雙眼就好似失去咗焦點咁慢慢行開。
 
  不過佢口講就話冇事啫，之但佢個樣點睇都唔似冇事啦，唔止呀，仲要係好大件事添啦。




 
  見佢喺鋪頭到行既時候一時又撞到啲酸枝傢俬，一時又撞到啲二手電器。睇見佢咁樣我都覺得心酸，我唔係話怕佢一陣撞到啲古董爛曬搞到我蝕錢，我係怕佢一陣唔知撞到啲咩撞傷就大件事呀。
 
  「飛仔，你係唔係揾緊呢樣野呀？」
 
  洪爺嗰把沙啞既聲線由工作室到傳到出嚟鋪頭到，令到本來失去咗魂魄既阿飛當堂回過神嚟。然後洪爺就手上拎住一塊撥片慢慢行出嚟鋪頭到。
 
  「今次又執到咩呀？我真係冇心情陪你玩呀……」
 
  「今次唔同啦，我好肯定呢樣野一定係你架。」
 
  「唉，等我睇下…… 嘩洪仔，呢個咪思思比我嗰撥片？點解會喺你到架？」
 
 「唔記得咗啦？喺你之前叫我幫你做保養架嘛，仲叫我小心唔好唔見添，點知到頭來就連你自己都唔記得。」
 




  「唔好意思囉洪仔，不如你比返我先再話啦……」
 
  「唔拎都得，比一百蚊我啦。」
 
  「比咪比，怕你呀。」
 
  「呀，估唔到飛仔你今次會咁順攤呀吓。我都係返去做野先啦事頭。」
 
  「嗯。」
 
  「好彩冇整唔見喳……唔見咗真係唔知點面對思思呀。」
 
  「呀係啦，比著係平時洪爺問你收錢既時候你一定地同佢嘈架喎，點解今次會咁順比錢佢呀？」
 
  「冇辦法啦，呢個撥片對我好重要架，無論要我負出乜野代價都好我都會拎返架。」
 
  「咁如果洪爺一直都唔比返個撥片你呢？」
 
  「搶囉。」
 
  阿飛佢講既時候對眼好堅定咁望住我，同頭先既佢可以話係天壤之別。
 
  而喺呢個時候，我腦入面零碎既片段就好似有人操控咁串連埋一齊，我終於明白嗰部馬沙高達唔見咗係乜野一回事啦……
 
  我拎出自己部電話打比一個我好熟悉既人。
 
  「喂，我係阿強呀，你今晚可唔可以一個人嚟一嚟「執到寶」？」
______________________________________________________________________________________________