[愛回‧家][推理] 執到寶事件手帖: 國產馬沙專用高達 - 第四章
雖然話就話部高達我本來就冇諗過要賣，更加冇諗過話想據為己有，之不過唔知點解我心入一面一直都好在意到底係乜野原因搞到呢部高達唔見咗，好想去查個究竟。
不過講就咁講，我一啲線索都冇，又可以點查呢？算啦，我都係唔好再迫自己諗點解啦，當冇咗件事算啦。
但係正當我心入面決定要忘記呢件事既時候，「執到寶」門口又再次出現一個熟悉既中年男人既身影，搞到我心入面既疑惑又再次浮現喺我腦海到。
「徐生，你好呀，今次係唔係又有乜野好貨色可以比我地呀？」
「係呀，今次既係呢部舊式收音機。」
「睇過先下。咦，好似唔係好用得喎，我諗我比唔到好高價你喎。」
「唔怕啦，我整返好就可以賣架啦。」
「咁都係既……好啦，我就收咗佢啦。」
「真係多謝曬你呀強哥。」
「乜說話呀…… 呀，不過話時話呢徐生你之前咪比過一箱玩具我地既，我想知你係喺乜野人到數返嚟架？」
我嘗試問下徐生記唔記得喺乜野人到收嗰箱玩具，因為曾經有好多放咗二手野既人放完既時候先發現嗰件野對佢地嚟講係幾重要，結果佢地返去收買佬到或者去夜冷鋪到睇下到底會唔會有機會揾得返。如果真係咁既，部高達比人拎返都唔出奇喎。
「哦，嗰家人呢……我記得佢地屋企都算幾大架，而且啲傢俬都好乾淨既。我諗佢地都幾珍惜啲玩具架，你見我比你嗰箱野喺比你之前全部都抹乾淨曬既，而已啲玩具全部都保養得唔錯，冇咩話壞呀爛之類。」
「係咁你會唔會覺得佢地有冇邊件玩具係特別唔捨得比你架？」
「我諗就唔會啦，我記得佢地拎啲玩具比我既時候一啲猶豫都冇，因為佢地屋企人話好肯定個仔去完外國之後都大個仔唔會玩具喎，就連個仔都笑笑口咁同我講佢唔會再玩呢箱玩具嚕。呢家人比我既印象都幾深刻架，平時我去收野既時候啲人點都會講下價既；之不過呢家人就唔同啦，我同佢地講完個價之後佢地諗都唔洗諗就話冇問題，之不過有個條件……」
「條件？」
然後徐生就用手指一指擺喺鋪頭入面嗰箱玩具。
「條件就係要幫佢地揾到一個好既新主人，唔好令佢地比人當係垃圾咁送去堆填區喎。唉，宜家諗返起我都有啲唔好意思，仲記得我以前玩啲玩具唔係斷手就係斷腳，冇一件玩到最後係完整既。而家我居然大膽到應承人地話會幫啲玩具揾新主人喎，唉，而家心入面唔多唔少都有啲壓力。」
「原來係咁……不過冇事既，以我識既徐生嚟講一向都好重視啲舊野，我諗唔會再好似以前咁架啦，如果唔係你都唔會做宜家呢行啦。放心啦，我一定會幫佢地揾到新主人既。」
「真係架？係就真係唔該曬啦強哥。咦三點三啦，唔好意思呀，我約咗個朋友食下午茶，要失陪先。」
「好呀，咁下次有乜野好野都要過嚟我地『執到寶』喎。」
「一定一定，拜拜。」
「拜拜。」
望住徐生既漸漸喺我既視線範圍之內消失，我感覺到我腦入面既一啲疑慮亦都隨之消失，我個身體亦都因為放鬆落嚟而不自控咁嘆咗一口氣。
雖然我其中一個疑慮已經消失咗，但係呢個時候我心入面又諗返起頭先既問題：咁到底點解呢部馬沙專用高達會無啦啦唔見咗既？如果唔係原本嗰家人要返，咁仲會係乜野可能呢？
喺呢個時候，我心入面好自然浮現咗一個答案出嚟，有外人偷野。
不過我好快就否認咗呢個可能，一嚟係我對自己鋪頭既防盜系統非常有信心，二嚟係阿飛夜晚會喺鋪頭訓，有人入嚟既話佢一定會發覺到，個賊又點會有機會落手先得架？而更何況如果真有賊既，點解唔偷其他野呢？要值錢既野就應該偷其他野啦。
如果我咁諗係啱既話……咁呢部高達唔見既原因就只會得返一個，不過到底會係乜野人呢？唔通……唔會係咁掛……
「二佬，喂，二佬……」
正當我沉思緊去諗到底成件事係點既時候，一把好熟識既聲音將我由自己既世界入面拉返出嚟。不過我唔洗望係邊個都估到係邊個，因為會係咁稱呼我既只有阿壯。
「二佬你喺到諗乜野諗到成個人失曬魂呀？」
「冇…冇野，都係啲工作上既小事嚟啫。」
「哦，咁都好啲，仲以為係啲乜野大事嚟添。」
「嗯……係呢，你今日嚟做咩呀？又請假買乜野限量版模型呀？」
「呀……二佬你又真係幾知我心喎。不過咁，我次係就係為咗買模型，不過唔係限量版。」
「唔係限量版？好少有喎。」
「唔係呀，我係想嚟買你之前嗰部高達呀。」
「咪話咗唔比囉，你堂堂一個律師點可以買山寨野架。」
「唉呀，你咪當睇唔到，唔小心賣咗比個客囉。」
「點同呢？」
「乜野『點同呢？』呀？即係咁……」
「唔好再講啦，總之我係唔會比你既，而且部高達都冇咗啦。」
「冇咗？點解會冇咗架？」
「我都唔知呀，阿飛佢尋日幫我執貨既時候發現架。」
馬壯聽到呢句說話既時候耷底頭，膀頭都放底落嚟，成個人好似一個洩氣既氣球咁冇曬精神，照咁睇佢真係好中意嗰部高達咁。不過我都係嗰句，佢宜家身為一個律師，就算有我都唔會比佢既。
「咁…咁好啦，我有事做，走先啦……」
「小心睇車呀。」
「嗯………」
比著係平時既佢，一定會大大聲話『我係神之馬壯，又點會傻到唔睇車呀？』咁答我。真係估唔到原來阿壯對玩具既痴迷程度已經去到呢個程度。