[愛回‧家][推理] 執到寶事件手帖: 國產馬沙專用高達 - 第二章
第二日，我如常一大清早就返到「執到寶」，一開門既時候就見到阿飛佢喺到打理緊鋪頭入面既野，不停咁抺野同埋吸塵。
「咦阿飛，點解你今日做勤力幫鋪頭做清潔既？唔似你喎。」
「你唔好咁睇我啦事頭，我都唔係你諗到咁懶既啫。」
「無事獻殷勤，一定有問題，你都係老實啲講出嚟啦。」
「呀，真係冇野瞞得過事頭你既。其實係咁既，思思之前話想揾本有用既結他參考書，咁咪揾我一齊去囉，唔知…我今日可唔可以早少少走呢？」
思思係阿壯喺律師樓到做野既同事，得閒會去揾阿飛學點樣彈結他。
「但係你之前唔係去咗一次啦咩？今次仲去？你係想去揾本結他書定係想乘機去揾……」
「唉呀事頭你唔好講出嚟啦……」
睇見阿飛佢一講到思思既話題之後成個人本來望落好有男子氣慨既，忽然變到成隻含羞答答既小白兔，唔洗望都感受到佢心低入面對思思既愛係幾深。
「算啦，今日睇怕都唔會有好多客架啦，你今日早啲放都冇問題既。」
「真係架？多謝你呀事頭。」
唔知係唔係因為我頭先順口講咗一句「今日睇怕都唔會有好多客架啦」，今日既鋪頭真係冇乜野客。雖然話就話平時都唔係好多客，之但係今日既鋪頭比起平時更加安靜。
時間一分一秒咁過去，但係鋪頭連一個買野既客都冇。見到個咁既情況，我打算今日都係早啲收鋪，反正阿飛要早走，而我今日又想早啲返屋企。
不過隔咗冇幾耐之後，我喺門口附近又再次見到一個熟識既身影。
「喂二佬，又係我呀。」
呢一個熟識既身影就係阿壯，佢今日依舊係著住佢嗰套西裝，打住嗰條純黑色既呔。但係我留意到有樣唔同既就係佢冇再拎住佢平時用開嗰個公事包，而係孭住一個大背囊。不過有時公司多文件要拎返屋企睇既時候我都會見佢咁做既，所以都係冇乜野特別。
「阿壯點解你今日又嚟既？」
「冇，呀曹總佢囉，最近學緊結他，話要彈比佢BB聽喎，之後佢就話『喂阿壯，你知唔知有什麼情歌好聽呀？』……」
雖然我同曹總只有一面之緣，但係喺阿壯既七情上面既模仿之下，我彷彿睇見曹總喺我面前出現。見到佢扮到咁似，我都忍唔住笑咗出嚟。
「就係咁，我就想阿飛佢指教一下我結他既野，費時下次見到曹總冇話題就唔好啦。」
「阿飛就喺工作室喳，你自己去揾佢啦。」
我講完之後，阿壯佢就一個箭步衝咗入店到。曹總係阿壯佢做野嗰間律師樓既大客，而且一向都講到明只係比阿壯follow佢，某程度可以話係佢做咗咁耐最成功既地方。
阿壯走咗之後，鋪頭又再次回復冷清。之不過今次呢股冷清唔係維持咗好耐，因為冇幾耐之後門口頭出現咗一個著住白色恤衫，孭住紅色背囊，五官端正既少年，一個好熟悉既少年。
「咦阿爸今日都係冇人呀。」
「係呀，最近生意都唔係幾好。」
呢個少年就係我個仔，子仁。不過咁講都唔係幾啱既，其實佢係我大哥個仔，不過自從十年前交通意外過身之後佢就照顧埋佢，後嚟佢都改口叫我阿爸。
「係啦阿爸，我想問你呢到有冇啲舊既玩具呀？」
「有就有既，尋日阿徐生佢比咗一大箱人地收返嚟既玩具，你要嚟做咩呀？」
睇見佢一聽到我話有成箱玩具，對眼又好似尋日既阿壯咁閃到發光咁滯。我個心入面真係無奈咁嘆咗一口氣，唔通玩具既吸引力真係咁大？定係得我一個失去咗呢啲咁寶貴既童真？
「因為我最近喺師傅到接到個設計既主題係舊香港，咁我想用玩具嚟帶出呢個主題，所以咪想睇下你呢到會唔會有野可以比我拎嚟做參考囉。」
「冇問題，嗰箱玩具就喺入面呀，你自己去揾啦。」
「OK。」
同阿壯唔同，子仁行起上嚟既速度相對慢好多，睇得出阿壯佢份人真係成日都好急，而子仁份人就好淡定。
十分鐘之後，子仁佢兩手拎住三件玩具行出嚟，三件都係以前嗰啲鐵皮玩具。我喺尋日記底箱玩具款式既記錄紙到劃去咗呢三件玩具既名，方便日後記數之類。
而呢個時候子仁佢慢慢將嗰三件玩具放入佢一真孭住既背囊到。
呢個時候，阿壯佢又用一個箭步喺鋪頭入面跑返出嚟。
「咦子仁？」
「咦阿叔？你喺到做咩呀？」
「冇，我係時候返屋企啦，你一唔一齊？」
「咪住先阿壯，你唔係話要阿飛教你一啲結他既野咩？」
「本來就係既，但係佢就一陣要去買結他書喎。」
「呀……係呀，佢頭先話咗比我知一陣要去陪……朋友去買結他書，我唔記咗同你講添。」
睇見子仁喺隔離，我都唔係幾好意思講話其實佢係陪思思去買書，因為思思就係子仁既前度女友，我唔想講咗出嚟之後會令到佢唔開心。
「係啦阿叔呀，你成日玩玩具一定對香港舊時既玩具好熟架啦，不如你講啲比我聽啦。」
「冇問題，估唔到我呢個姪仔都開始對玩具有興趣，就等我神之馬壯同你想當年啦……」
阿壯一手踏住子仁個膀頭，如數家珍咁講有關玩具既野，一步一步咁行出咗「執到寶」既門口。