拖住我隻手，得唔得呀？: 第十一章：世界大戰抹黑宇宙了 Can you feel

 
  就喺落完雨之後嗰日，我地成組人一齊去到希文屋企到開一個温書會，因為佢屋企人都因為工作關係去咗外地工幹，所以全間屋得返我地幾個。但係子軒同卓珊都因為大事嚟唔到，最後得返我同阿傑兩個人上希文嗰到。
 
  我地開頭都好比我機温書，但係點知只係温咗一陣之後我地就開始變得心散。不過其實我都唔想架，鬼叫啲題目咁難咩？望住一睇唔明既野，喺人都知道會覺得眼訓架啦，下話？我不停用呢一啲藉口令自己心散變得合理化。
 
  「哎呀，點解啲題目咁難架？」
 
  「希文你都唔識做呀，咁我地就真係玩完架啦。」
 
  「咁我都可以唔識架嘛，唔怕啦，最多我地聽日返去問老師囉。」




 
  「唯有咁啦。」
 
  「阿樑，你話如果我地一遇到難題既時候有個天使出嚟幫我地解決困難既話你話幾好呢。」
 
  「阿傑你喺到FF啲乜野呀？與其喺到諗點樣揾個天使出嚟，不如我地都係現實啲諗下點解決眼前呢啲書先啦。」
 
  雖然我表面上係講到咁正氣，但係事實上我咪又係喺到亂諗野冇用心温書，唉……不過如果真係有天使既話又會喺邊到出嚟呢？喺個窗到飛入嚟？喺電視到爬出嚟？定係好求其咁喺個衣櫃到走出嚟呢？算啦，我諗嚟都係無謂架啦……
 
  「唉，都五點啦，我都係返屋企先。」




 
  「吓，阿傑你咁快就走啦？」
 
  「冇辦法啦，我個心始終喺今日新出個集漫畫到呀，等我下次先温啦，拜拜。」
 
  喺我同希文都仲未趕得切同阿傑佢講再見既時候佢就走咗，到底漫畫既吸引力係唔咁大呀？我都幾中意睇漫畫既，不過我未去到為咗追漫畫而唔温書囉。不過講就係咁講啫，阿傑都走咗既話咁即係得返我同希文兩個人喺到，我心入面又真係幾開心既，但一諗到而家孤男寡女共處一室，搞到我又有啲緊張喎，呢啲就真係叫做百感交雜啦。
 
  「唉，我覺得好眼訓呀，都係訓陣先。阿樑你有乜野唔識就等我起身先答你啦。」
 
  講完呢句之後，希文佢話咁快就僕咗喺枱面到，靜靜咁喺我面前走咗去陪周公玩。




 
  希文你咁做係有心定係有意呀？孤男寡女共處一室既情況下你仲要喺個男仔面前訓覺？！唔通你真係唔怕我趁你喺訓覺既時候「咩」咗你架？我知啦，你一定係想試下我幾有定力係唔係呢？
 
  放心啦希文，我一定控制得到自己………………我忍唔住啦。
 
  見到希文訓覺嗰時合埋對眼，塊面紅卜卜咁，細細既嘴唇又毫無防範，真係迫我想入非非架啫。唔得既，我點可以喺呢個時偷襲架，咁樣做好cheap啫；但係又唔係喎，既然佢明知呢到得返我地兩個佢都夠膽喺到訓，即係其實佢都預咗我咁做架啦；不過唔得既，咁做又真係卑鄙咗啲喎……
 
  我個腦入面幾乎分裂出兩個人格，而兩個人格幾乎喺到展開世界大戰抺黑宇宙了，我feel到成個人好煩囉。當我不停去思考應該點做既時候我已經發現自己個頭經已哄到希文面前。
 
  當我哄到咁埋既時候，我更加可以細心咁望住希文。唔單止咁，哄到咁埋既時候我仲可以微微感受到佢既體温，同埋聽到佢訓覺時候既抖氣聲。
 
  咪…咪住先，點解我呢個時候會諗埋曬啲咁既野架？！我頭先咁樣既行為真係同一個變態佬差唔多囉！
 
  我同自己僅餘既理性控制自己對手禁住張枱，將自己個頭拉翻返嚟。
 




  但係唔係喎，呢到又冇其他人，而且我只係會輕輕掂一掂佢既嘴唇啫，除咗我之外唔會有人知既……
 
  一諗到呢到除咗我之外就冇人知既時候，我僅餘既理性話咁快就輸咗……
 
  話咁快我個頭又再次哄到去希文既面前。希文呀希文，你塊面其實係唔係有尼古丁定唔知乜架，點解會令人愈望愈上癮既？！就係咁我個頭就愈嚟愈哄得埋，愈嚟愈埋，愈嚟愈埋，我地兩個既嘴亦都就嚟近到可以掂到。
 
  「樑……阿……樑……樑……」
 
  希文突然之間開口講野。死啦，我實係比佢發現咗啦，今次真係水洗都唔清啦……


--------------------------------------------------------------------------------------------------------------------------------
今次又咁遲先更新真係好唔好意思, 因為一到sem尾就好多project同present等住我......我唯有希望大家體諒我啦 :(
不過我有一件事要宣佈, 
就係呢個故事會「無限期」停止更新。




點解我要咁做呢？ 係因為project同present完咗就會到final exam, 唉，都唔知要chur到幾時
而考完final之後我諗住試下幫之前<情人節那天，我在衣櫃中找到我生命中的天使>寫返個外傳，所以唔知幾時先會寫返呢個故
不過放心，我只係停止更新，唔代表我放棄呢個故，我估呢個所謂既「無限期」會係一兩個月到啦。

最後都係例牌講返句：「如果大家中意呢個故既話一妨comment同埋share 比朋友睇啦 :)。」

(題外話，我覺得高登最近個認證真係好鬼煩，我幾乎比佢搞到冇咗個account,搞到我以後唔可以喺高登出故，好彩最後都冇事。)