拖住我隻手，得唔得呀？: 第九章：腦筋急轉彎

 
  就係呢一絲絲微微既聲音吸引咗我既注意力，當我一拎個頭過去旁邊既時候居然比我見到希文個鼻有啲泛紅，神情亦變得唔再好似平時咁從容自在，佢平時測驗都做得咁好，應該估唔到佢做Presentation會做到咁。
 
  老師繼續講出佢既評語，佢每講一句，希文既心情就變得更差，個頭亦由望佢老師對眼慢慢咁望咗落去地下到，好似冇曬信心咁，而且鼻哥愈嚟愈紅，剛才聽到既索鼻水聲亦都愈嚟愈大聲，佢既情緒睇嚟唔係好穩定。我慢慢咁將個身移到去希文前面，希望大家唔會將注意力放喺佢身上，始終呢個都唔係一個好睇既表情。
 
  不過宜家都冇啦，如果比我一早知佢地整嗰個Powerpoint係咁樣既我一定會叫停佢地囉。我嗰個就唔同呢，入面有之前同阿玲一齊去唔同既鋪頭到做訪問，就算你上網咁好彩見到有人訪問過佢地都唔會咁詳細囉。唔係喎，如果拎我嗰個出嚟咪得囉？！
 
  「老師，其實呢我地個Powerpoint仲有第二部分。」
 
  「第二部分？」




 
  呢個時候唔單止係老師，甚至係同我同組既其他人都呆咗咁望住我，就連本來好似就嚟要喊既希文都冇再發出嗰啲鼻水聲而碌大對眼望住我，搞到我突然之間有啲唔好意思。
 
  「剛才我地比大家既只不過係灣仔好基本既資料嚟架喳，比大家對嗰到有啲基本慨念呀嘛。宜家嗰啲先係堅野嚟架，直情可以話係我地呢組人先至有既獨家猛料。」
 
  「咁你快啲比我地睇啦。」
 
  老師個表情立即由本來一副失落既樣突然變到宜家好期待既樣，雖然因為要開Powerpoint所以熄曬所有燈，之不過我都感覺到老師對眼好似發緊光咁。原來頭先既緊張感都只係算好皮毛，望到老師呢個咁期望既樣，搞到我緊張既感覺迅間提升到頂點，唔單止手心開始出汗，個頭仲開始有啲痛。
 
  「喂阿樑，得唔得架？」




 
  阿傑佢靜靜咁喺我耳邊問我，不過咁又難怪既，因為我自從訪問完就埋頭去整個Powerpoint，根本冇同佢地講過我做成點。
 
「冇事既，你地一陣喺旁邊配合我就得架啦。」
 
  宜家諗返起，我都唔知點解自己可以一臉自信咁同佢講冇事，萬一老師又唔收貨既我真係唔知點算好。
 
  我慢慢一步一步咁走去書包到拎出裝住我Powerpoint手指，插咗落班房部電腦到。雖然我仲未比組員睇過，稿都未度，所以試下以問問題既方式去Present，等同組既人問下我有關嗰啲店鋪既問題，然後主要既內容就由我去講。其本上所有組員都肯配合我既行動，但係唯獨希文佢一直靜靜咁企喺到。
 
  今次既Present比頭先順利好多，至少老師個樣全程都好期待，直到我Present完之後全埸同學都睇得好開心，老師亦對我地呢一組既評價亦同時升咗唔少。




 
  「呢部分比起頭先有趣好多，真係唔錯。咁有請下組出嚟啦，希望下一組都做到頭先咁既水準啦。」
 
  聽到呢一句之後我成個人都鬆咗一口氣，好彩今次過咗骨啫。就係我地慢慢由課室前面行返去自己個位既時候，希文佢行咗過嚟我到喺我耳邊細細聲咁講野。
 
  「你放學之後留底，我有啲野要同你講。」
 
  「嗯……」
 
  呢次係自從拎咗三分既之後佢第一次主動同我講野，而佢講野時候既語氣並唔係好似之前咁比人一種絕情既感覺，而係有少少軟化，不過我又唔係好識點講出嚟……總之就係同之前唔同啦。
 
  放學之後，我依佢所講留底喺課室到，眼見一個又一個同學離開學校返到屋企，我先發現原來自己從來都未見過呢一個景象，因為我之前一放學就會跑返屋企。最後差唔多全部人都走曬，得返我同埋希文留喺課室入面，之後佢慢慢行咗過嚟我既身邊，拋咗一支茶字典過嚟。
 
  「請你飲架，飲啦。」
 




  「嗯，多謝……」
 
  「你個Powerpoint做得幾好呀，睇唔出你都可以做到咁好，明明之前只係考得三分。」
 
  「嗯，我都估唔到啲老闆咁好人比我訪問喎。而且呢……」
 
  真係好啦，睇嚟我地之間既氣氛好返好多啦，我今次既決定的確係冇錯既。講完之後，我扭開咗個樽蓋，開始飲佢比我既呢支茶字典。
 
  「衰人。」
 
  吓？！點解佢既語氣突然一百八十度變咗，仲要變返之前嗰種討厭我既語氣既？我聽到佢咁講之後幾乎連自己啱啱飲嗰啖茶字典都噴咗出嚟。
 
  「你其實係處心積慮特登整個咁好既Powerpoint之後等我Present完我嗰個既時候出嚟串我係唔係呢？知道自己可以同啲老闆做啲咁深入既訪問，而我就只可以喺問到啲好皮毛既野，你心裡面一定喺到暗爽緊啦係唔係呀。我真係點都估唔到原來你係個咁既人嚟呀！」
 
  唔係掛，點解佢會點諗我架？！我真係一心一意諗住做好個Porject，點會諗到原來咁做會令到你個心入面係咁諗先得架？




 
  「你知唔知咁做只會令到我心入面更加唔中意你架喳！一諗返起今日見到你突然之間咁有型喺到做個Presentation 我真係好想拎條繩將你吊起嚟打到你變豬頭丙呀！」
 
  「對唔住呀！我真係咁冇心架！我只係想做好個Project，冇其他意思架！對唔住呀，對唔住呀，對……」
 
  其實我都唔知自己做錯啲乜，之不過我諗唔到除咗道歉之外仲可以做到啲乜。
 
  而喺我不斷底頭道歉既時候忽然聽到一下「噗」既聲，雖然唔係話好大聲，但係足以令我好清楚咁聽到。我慢慢咁抬起頭，居然比我見到希文佢個樣由本來既嬲樣又回復去一個好開朗既表情，好耐冇見既笑容亦再現眼前。
 
  「噗，哈哈哈哈哈……」
 
  望住呢個只係不停咁笑既希文，我真係完全唔知道應該點反應至好。
 
  「哈哈哈，我呃你喳，我呃你喳，蠢材，嘻。今次就放過你啦。我知其實你都係為咗我地呢組啫。而且……」
 




  「而且？」
 
  「而且喺我比老師講到就嚟喊既時候你居然主動行喺我面前，呢啲其實我係知既。」
 
  「其實呢…呀…呀，我只係咁啱想行前啲聽下老師講咩之嘛……咁……」
 
  「不過我最開心都係見到你用心去做呢個Project，我要收返之前嗰句說話，我宜家一啲都唔憎你。」
 
  佢講完呢句野之後單起隻眼，伸一伸條脷，呢個絕對係我識佢開始到宜家最可愛既動作，望到呢個動作之後我都唔知點做好，而且我又發現自己塊面變得好熱，成個腦又變得一片空白，冇幾耐希文佢都一樣面紅起嚟，課室入面又回復返一片寧靜。但係接住落嚟既就係呢一片寧靜絕對冇令人感到有一絲既不安，但係令到我地覺得有一種安全既感覺……
 
  呢個時候我就好似不控制唔到自己既身體咁慢慢哄個頭過去希文到，而希文都係一樣。
 
  「衰…衰人，做咩哄個頭嚟呀……」
 
  「我…我都唔知呀……但係你…你又點呀……」




 
  「你…你行開啦……」
 
  「你唔…行……」
 
  雖然我地兩個都講出啲咁既說話，但係我地兩個都冇縮返個頭既意思，反而我地兩個塊面變得愈嚟愈近，我地既嘴唇亦都一樣……
 
  「喂，同學做咩你地仲唔走呀？我地校工要汁野啦。」
 
  就係呢個校工既一句說話將我地之間既氣氛一下子衝散咗，我同希文就好似如夢初醒咁望住對方。之後佢就用九秒九既速度推開我之後立即拎走佢個書包離開課室返屋企，而我就留埋係原位到呆咗唔知做咩好。
 
  不過其實細心諗下，希文佢應該原諒咗我啦掛。只要一諗到呢點，我就會不其然變得好開心，不自覺咁笑出嚟。
 
  「喂走啦同學，做乜喺到傻笑呀……」
 
  呢個校工又用一句說話將呢到既氣氛衝散咗。


---------------------------------------------------------------------------------------------------------------

最近開始mid-term, 開始要努力温書, 所以唔記得咗呢到 , sorry
真係希望大家比下comment, 因為乜comment都冇個感覺好空虛 :(
最近諗緊之前嗰篇<情人節那天，我在衣櫃中找到我生命中的天使> 可能會喺聖誕節出個特別篇, 不過內容就仲未諗好, 雖然係咁, 我都好希望大家多多支持