拖住我隻手，得唔得呀？: 第四章：有啲說話聽完仲痛過比人打

 
  就喺我好神奇咁拎到三分之後，呢件事已經迅速傳到全級人都知道，呢啲野明明係天機不可早洩架嘛，有冇搞錯呀！不過同時喺我拎左三分之後，希文佢基本上冇再同我講過一句野，無論我點樣好似之前咁聊佢傾計佢都唔比反應我。宜家除左必要既對話之外我地就冇再傾計。
 
  如是者過左一星期，又到咗要數測驗既時候。為左防止我又考到個咁既分數，我唯有温下書啦，不過唔知係唔係因為考完DSE放得假太耐，所有學過既野都全部還返曬比之前嗰間學校既老師，就算你比我望住本書考試都未必會考得好。當然今次既結果都唔會好得去邊啦，雖然唔再係三分，但都係唔合格。
 
  不過希文對我既態度似乎並冇一絲好轉，反而好似更加唔理我。之前就算佢點唔答我都好都會望下我，就算冇叫我起身都會喺老師到之前拍下我提我起身，但係而家簡直係完全唔理我，即使見到我都會刻意行第二條路。死啦，係咪我唔知幾時激嬲左佢呀？
 
  但係我諗天無絕人之路既，因為十月頭嗰時我地成組人就會一齊去灣仔到做個有關香港地區Project既資料搜集，到時我地一組入面會分成唔同小組行事，我同希文就剛剛好編咗入同一組去做實地考察，我諗到時一定可以氹返佢既。
 
  我覺得要氹一個嬲咗既女仔最好既方法應該係揾一啲有趣既野引返佢笑，所以只要我決定如果沿途見到有乜野好笑既野我就立即話比希文知，希望咁做會有啲用掛。雖然佢開頭都叫有理下我係咁依望一望，之不過後來只要聽到我講之後就會加快腳步行開。




 
  大件事！唔通今次我又做錯咗啲乜野？
 
  我一路跟住希文佢後面行，每行一步我就會變得更加心急，好想快啲諗到啲乜野方法可以去氹返佢。無奈我呢個人的確係諗就天下無敵，做就無能為力。喂，有冇人可以幫下我呀，我覺得我女神真係好難觸摸呀！
 
  之後我地行下行下去到有「玩具街」之稱既太原街。
 
  叫得做玩具街，入面一定有好多得意野掛？係咁既我實揾到一樣野去氹佢既。
 
  我就喺條街到邊圍望，望下有冇啲乜野有趣既野；而希文佢就如常咁一路影下相，做下訪問，雖然我地兩個人係行埋一齊，但係我地一句野都冇講過。其實我對呢條玩具街都真係幾失望，本來諗住喺到可以揾到啲得意野，點知周圍都係得啲小學雞喺到買彈珠人。而喺不知不覺間我地就行完條街，資料搜集亦告一段落……




 
  「係啦，不如一齊去食晚飯呀？」
 
  「唔啦，我要返屋企。」
 
  希文依然係望都冇望我，只係用冷淡既語氣簡短咁拒絕咗我既邀請。佢咁樣既回應令到我心入面既疑慮變得愈嚟愈複雜。
 
  「咁不如我送你返屋企啦，反正時候都唔早，女仔人家一個人返去可能會有啲危險。」
 
  之後希文佢一句野都冇講，只係好輕微咁點左一下頭。




 
  之前希文對我既態度仲未係咁惡劣既時候我都已經試過送佢返屋企，因為我同佢同佢都算住得幾近，都係筲箕灣嗰一頭。咁當然名義上我會話係因為順路先會送佢返屋企，但係實際上梗係為左可以見多佢一陣。
 
  我地由灣仔一路坐巴士返去，雖然我地係一齊坐喺雙人位到，但係佢就全程睇實個窗，理都唔理下我，而我又唔夠膽去同佢講野，結果全程一片沉默。冇錯雙人位係可以令兩個人既距離變得近咗，但係呢一個距離只不過係物理上既距離，我同佢心入面既距離可能已經喺不知不覺間變得莫名咁遠。由我同佢講完要送佢返屋企之後我地就一直都冇講野，去到後來落咗車行到佢樓下都一樣。
 
  去到臨道別既時候，我終於都忍唔住，決定要去問清楚到底點解佢對我既態度會無啦啦由學期初咁親切變到今時今日咁樣。如果我地既關係一直都係咁唔清唔楚既話我一日到黑個心都唔會舒服，亦因為咁我好想去問清楚佢既諗法係點。
 
  「希…希文，你之前唔係都會同我講下野架咩？點…點解你最近…對…對我啲態度好似…好似冷莫左咁多既？」
 
  我講既時候成個人唔知點解變得好緊張，明明自己平時講野都唔會咁窒，話唔定喺我內心深處其實係怕自己會聽到一個最唔想聽到既答案。
 
  喺我講完既時候，希文佢終於拎轉個身，對眼又好似當初識佢咁望住我而唔係望咗去其他既地方，呢個時候既我以為情況終於都有好轉，但係事實證明我諗得實在太天真。
 
  「阿樑，我最近發現左原來我真係好憎你。」