拖住我隻手，得唔得呀？: 第一章：拖住我隻手，得唔得呀？

 
  「拖住我隻手，得唔得呀？」
 
  輕輕既一股風吹過，旁邊既樹葉都被吹到「沙沙」作響，而喺朦朧之間我見到有一個黑色長直頭髮既女仔喺我面前伸直佢隻手，個嘴雖然細但係笑容就非常搶眼。呢個女仔既頭髮長到落條腰到，個身就著住一件淺紅色既恤衫同一條黑色碎花既長裙，望落應該係一個充滿氣質女仔。但係我無論點都好都只可以睇到佢喺到笑，嘴以上既部分就白朦朦一片，呢個女仔個樣到底係點我就完全望唔到。喺呢個女仔既身邊好似係一個小巴站，而每次有小巴到小巴站既時候都會有一大班人湧住去架小巴到，十足十嗰啲Fans要追明星咁款。
 
  我諗正常人一時之間見到咁多奇怪既事應該都會問好多問題，但係唔知點解我個腦入面居然完全冇諗過呢樣野，個身好自然咁應呢個女仔既要求伸手去拖住佢隻手。
 
  但係正當我捉住佢隻手嗰一刻……喂，唔對路喎，點解好地地一隻手會有咁多毛既？多到一個地步係好似頭髮咁囉。而喺呢個時候，我見到呢個女仔個嘴由本來既合嘴微笑再次張開，似乎係要同我講啲野咁。
 
  「哥…哥哥……你唔好咁啦，搞到我好痕呀。」




 
  哥哥？你講乜野呀？我幾時多左個長頭髮既妹妹架？冇錯我係有個妹，但係佢啲頭髮頂盡都係去到膀頭到，唔會去到腰到囉。
 
  就係呢個女仔莫名既一句說話令到我成個人立即清醒返，擘大對眼一睇先知原來我隻手喺咁摸住我個妹個頭，剛才我見到既一切都只不過係夢境。雖然話就話呢個係一個夢境，之不過我真係覺得真實到有啲離譜。
 
  其實呢個夢我由上年開始就晚晚都夢見，之不過次次一去到我伸手去到嗰個女仔到既時候就會醒咗，搞到我永遠都睇唔到個女仔係乜野樣。
 
  不過話時話，好彩我頭先隻手只係拍左落阿妹個頭到喳，如果我拍落少少既真係比佢打到呢世訓喺呢張床到都似。
 
  「哥哥你想摸到幾時先停手呀？媽咪已經煮好早餐啦，快啲出嚟食啦。」




 
  「阿樑你仲想訓到幾時呀？你唔係諗住第一日返學就遲到下話？暑假完左好耐啦！」
 
  「唔怕啦阿媽，有排都未係時候啦，唔信你望下個月曆。」
 
  我抬頭望一望個月曆，立即成個人O咗嘴，原來今日已經九月一號啦！點解可以係時候返學都一啲印象都冇架？我呢啲真係放假放到成個人懵左，連自己要返學都唔記得，我諗呢個世界上都唔會有幾多個人痴線過我架啦。不過咁又係既，鬼叫個假期又真係咁長咩。
 
  自從上年DSE放左榜之後，我就一日到黑都留喺屋企冇野做。因為我個分又唔夠入大學，讀副學士之類阿媽又話冇乜野用，結果最後就喺屋企人要求既情況下入左一間新既學校到重讀多一年中六，睇下有冇可能今年考得好啲喎。不過其實又邊有可能先得架，我讀書成績一向唔好，而且我都唔中意讀書既，就算讀多年又點先？不過既然係佢地要求，咁我唯有去讀既啫，都係求其讀多年應付下佢地算數。
 
  「今日第一日返新學校呀，點可以遲到架。」




 
  「得啦，我記得點樣去既，之前都試過去啦，坐巴士好快就到架啦。」
 
  「駁嘴你就叻，你好快啲食完然後返學呀。」
 
  「得啦阿媽……」
 
  好明顯我呢一個反應係求其到冇得再求其，不過阿媽咁講其實都啱既，始終第一日返新學校就遲到既真係唔太好睇。食完早餐之後我就絲絲然咁出左門口。
 
  果然天有不測之風雲，我係個不幸的人！我一去到個巴士站就望住自己架巴士開走，等左十分鐘之後先上到第二架。本來以為呢啲事只會遇一次啫，但係今次架車就爬爬下山死咗火，結果我要等第三架車先得，去到學校既時候得返兩分鐘就遲到。
 
  我一落左巴士之後就一直喺到跑，跑到學校門口既時候門口道大閘就快要閂埋，我望住嗰道大閘一直跑，但係似乎喺門口既訓導老師心入面並無一刻諗過放寬比我慢慢行入去，而係用依舊既速度閂閘。而喺呢個時候我幾乎成為左一個熱血棒球少年，以呢道大閘後面既空地作為我既一壘飛身撲過去。
 
  雖然撲到去既時候連眼鏡都飛埋出去，之不過我最後都好好彩咁趕到喺八點半之前入到學校到，都叫做冇遲到，SAFE。
 




  「呢位同學，今次算你好彩，不過你下次就知味道……哼。」
 
  嘩呢啲乜野老師嚟架，咁講野都有既，雖然聽講老師呢份工唔易做而且好大壓力啫，但係都唔洗咁講野架下話。如果我唔係跌左副眼鏡睇唔清楚野既話我一定會認住你個樣，然後揾日去捉你痛腳，然後要脅向我道歉。
 
  不過呢……眼鏡呀眼鏡，你到底去左邊呀？我宜家望親乜都係一pat pat咁，真係好麻煩呀。
 
  「同學你冇事呀嘛？有冇跌親呀？」
 
  喺呢個時候我聽到一把好甜既聲，聽落應該係一個女仔嚟。
 
  「冇…冇事。」
 
  到底呢個女仔係乜野樣我真係唔知，之不過就算我望過去都只會係一pat野，都係等我快啲汁返副眼鏡先算。
 
  「你係唔係揾緊呢樣野呀。」




 
  「乜…乜野呀？」
 
  我諗佢應該係幫我拎返副眼鏡掛，但係我都睇唔到佢拎住啲乜。唉，大近視有時都真係幾麻煩。
 
  「你係唔係大近視呢，唔緊要啦，等我幫你戴起佢啦。」
 
  而喺佢幫我戴返副眼鏡既時候，就見到眼前出現左一個黑色長直髮既女仔，皮膚好白，白到十足十嗰啲電視到見到既模特兒咁款。佢著住一條呢間學校既白色連身裙，右手拎住一本外國既翻譯小說，心口到掛住一個寫住風紀既牌，我諗佢大慨係負責捉人有冇遲到掛。
 
  呢個時候我仲係成個人扒左喺地下到未起身，然後呢個女仔就烏低左個身望住我，笑笑口咁喺到望住我。
 
  「你起唔起到身呀？拖住我隻手啦？」
 
  點解呢句野咁熟既……