《一位明星，在自己的「生前喪禮」上死了》: Chapter 27

Chapter 27 

護士帶 Erica 和 Nicole 到一間私人病房，那裡有落地大玻璃，窗外望藉綠油油的山景，加上柔和的陽光，予人平靜舒服的感覺。 


陳校長正坐在床上，下半身蓋著被單，上身卻不是穿著病人袍，而是一件高貴典雅的白色套裝，還戴了串珍珠頸鏈。 

但最令人注目的，是陳校長那個光禿禿，被剃光了頭髮的頭頂，應該是為了下午的開腦手術而剃的。 

「你好呀，陳校長，記唔記得我地兩個呀？我地專程黎探你架。」Nicole 作開場白。 





「真係好呀，你兩個後生女，咁有老人家心，多謝你地黎探我呀。」陳校長微笑著道謝。 

Erica 把一箱來自 Vincy fans 的祝福心意卡及小手作放到床邊的椅子上。 

「呢一箱，全部都係 Vincy fans 托我地電視台送俾陳校長你嘅心意，希望陳校長能夠節哀順變，身體健康，早日康復。」 

「嘩，大家真係好有心呀！我好感恩，感謝神賜一班咁乖嘅 fans 俾 Vincy！Vincy 喺天上見到，一定好開心架啫！麻煩你兩位代我同 Vincy 向班 fans 講聲多謝，大家有心喇，我好感謝大家嘅心意。」 

陳校長一邊說，一邊拿起箱中的一封封心意卡，逐一翻閱，邊看邊笑。





「我地今日嘅身份，並唔係記者，純粹係想關心一下陳校長你嘅近況。頭先聽姑娘講，話你陣間要做個開腦手術喎？」Erica 問。 

「哦，係呀。」 

「咁請問係咩事要做開腦手術？個病好嚴重？」 

「哦，都嚴重架。我有末期腦癌。」陳校長漫不經心的說，繼續翻閱心意卡，好像不是什麼大事。 

「末期腦癌？你係幾時開始知道自己有 cancer 架？」 





陳校長放下了正在閱讀的心意卡，想了一想後回答： 

「係今年一月，即係大概三個月前發現嘅。都係怪我自己大意，一路以來都掛住全心全意照顧 Vincy，無留意到自己嘅身體原來有病。最衰腦癌嘅病徵又唔明顯喇，只係間唔中會頭痛呀，視力模糊呀咁，我以為只係一般老人小毛病，無去留意。直到今年一月，有一晚凌晨，我突然之間『發羊吊』。咁我同 Vincy 兩個人住，Vincy 就瞓咗，亦無能力救我，我唯有自己打電話俾葉醫生求救。葉醫生幫我急救之後，同我去醫院檢查，之後就發現我腦入面有個惡性腫瘤。」 

「咁你知道咗自己有末期 cancer，有無同 Vincy 講？」Erica 問。 

「無，我無同佢提過，亦無同任何人提過，只有葉醫生同我主診醫生知道。」 

「點解唔同 Vincy 講呀？」 

「講黎有咩用啫？佢又幫我唔到，講咗只會白白令佢擔心，對佢病情仲可能有負面影響添。我只係想 Vincy 專心養好自己個病，好好咁搞好佢最重視嘅生前喪禮，其他事我唔想佢操心。」 

Erica 聽了這個答案，想得入了神。Nicole 見狀，便接著問： 





「咁陣間個開腦手術危唔危險架？」 

陳校長拿起了一個由 fans 親手製的 Vincy 美人魚布公仔把玩： 

「危險，因為呢個唔係普遍開腦手術，而係一個香港大學醫學院研究計劃嘅臨床試驗性手術。佢地試驗緊一種新嘅開腦技術，如果試驗成功，將會大大減低日後病人做開腦手術嘅死亡風險。」

「試驗性手術？即係之前未有人試過？」 

「無錯，我係全球第一個試嘅人。所以無論手術成功定失敗，我都為醫學發展做過少少貢獻。 

仲有，我已經簽咗一份『預設醫療指示』，即係『Advance medical directives』，上面寫明一旦手術失敗，醫生無須為我進行急救，只要俾我無痛地離世就可以喇。」 



「點解要咁做呀？」Erica 強忍著淚水，問題的語調中似乎包含了不只一層的意思。 







陳校長沒有望向 Erica，只是定定望著手上那個 Vincy 美人魚布公仔： 

「我一生之中最重要嘅人，已經離開咗，上咗天家，我無咩需要勉強留喺世上。 

我有末期 cancer，我嘅生死以至一切，都已經交付到神手上，我已經了無牽掛。其實我根本無需要做手術，我可以選擇唔醫，平平靜靜等死。只不過我想喺死之前，為世界盡最後一點貢獻。」 


「咁做...... 唔會同你嘅信仰有抵觸咩？」Nicole 問。 

「唔會。我反對安樂死，但「預設醫療指示」唔係安樂死，只係話俾醫生知，當我去到一個咩情況，就唔好再用醫學強行延遲我嘅死亡，由得我離去喇。就係咁樣啫。 

生、老、病、死是自然的規律，係神所旨意，無人能夠抗拒。」 







Nicole 聽到後，眼神投向 Erica ，看看她還有沒有問題，如果沒有就不要打攪陳校長休息了。 

誰知 Erica 居然走到床邊一張椅子上坐下來，用認真嚴肅的眼神和語氣問陳校長： 


「有一條好嚴肅嘅問題，陳校長如果唔喜歡，你可以選擇唔答。但我真係一定要問，我好想親口聽你答呢個問題。」 


「好呀，你問喇。」 

陳校長終於放下手上的布公仔，雙眼直望著 Erica。 





如此的對望，令 Erica 很有壓迫感。 




「陳校長，你係一個教徒，呢個人人都知。教徒唔會請大話架嘛，係咪？」 

「呢個就係你想問嘅問題？」 



「唔係，其實我想問嘅係...... 陳校長，你係咪殺 Vincy 嘅兇手？」