《一位明星，在自己的「生前喪禮」上死了》: Chapter 6

Chapter 6 

兩位記者回到自己房間。 

「嘩，你頭先見唔見到呀？果個鄺牧師，有錢人黎架喎。一身名牌，佢隻錶呀，全球限量一百隻，起碼值成過千萬呀！做牧師做到佢咁有錢，真係利害利害。」對名牌觸覺特別敏感的 Nicole 非常羨慕。 

「人地果個有錢佬教會黎架，啲教友一係就高官，一係上市公司主席，非富則貴架。」 

「有錢佬教會？」 





Erica 打開平板電腦，找回之前為了這次上船採訪生前喪禮，上網隨便搜尋一下維基百科後整理出來的人物資料，然後遞給 Nicole 看。 


「鄺彼得牧師，基督教保守派組織『鹽光社』總幹事。香港特首提名委員會宗教界選委。曾經參選上一屆立法會議員，不過唔成功。 
近年開始積極參與政治，立場明顯偏向保守建制派，曾公開指港人應當『像羔羊般順從當權者』，佢既言論主導不少基督徒既政治取向和立場。 

佢大力反對『同性戀』同『安樂死』等議題，但除咗呢兩個議題以外，對其他民生議題，例如貧富懸殊、地產霸權、社會不公義、老人問題等，卻一概無出過聲。 

佢既『鹽光社』當年大力反對就『性傾向歧視條例』立法，曾經舉辦『守護家庭祈禱音樂會』，堅持『一男一女一夫一妻一生一世』家庭觀； 
最近，『鹽光社』就主力反對安樂死，上年就舉行過『愛生命，反對安樂死』大型簽名活動，又搞過『反安樂死』大遊行。」 





「哦，『鹽光社』，好似有啲印象喎。」 

「好多高官同有錢佬都係呢個教會架，簡直就係一個富豪私人會所咁。好多人想上位呀，揾著數呀，都會諗方法混入去架。之前呢咪有個明星打人，明明應該坐監架，但佢揾到鄺牧師寫封求情信，最後只係判社會服務令咋。」 

「咁都得？！」Nicole 覺得難以置信。 

「嗯，呢個社會係咁架喇，你做咗記者咁多年唔係唔知呀？」 

「咁...... Vincy 個媽媽陳校長呢？網上有無佢背景資料呀？」 







Erica 取回平板電腦撥幾下，把陳校長的資料讀出來。 

「陳吳麗芳太平紳士，香港基督教名校聖德蘭書院校長，香港基督女青年團董事會成員。著名女藝人陳詠詩 (Vincy)的母親。 

陳校長係一個單親媽媽，丈夫喺 Vincy 好細個時已經意外死咗，而且又只得 Vincy 一粒女，所以佢非常疼錫 Vincy。陳校長係娛樂圈出晒名既廿四孝媽媽，成日煲老火湯同糖水拎去 Vincy 既工作地方，有時仲會煲埋其他工作人員添。 

我揾到一篇報紙報導，係講陳校長做好多善事，除咗有助養幾個小朋友之外，佢規定自己學校每班最少要收一個讀書成積好既基層學生，仲自己出錢資助貧困既學生上興趣班。佢喺篇訪問入面話，名校教育唔係有錢人既專利，教育能夠為基層學生創造向上流動既機會，所以佢希望其他傳統名校好似佢咁，收多啲基層學生。」 

「睇黎 Vincy 真係好似佢媽媽，一樣咁善良，一樣鐘意做善事幫人。真係可惜 Vincy 有呢個病，好人真係唔一定有好報......」Nicole 感慨。