《青梅竹馬的婚禮》: 第六節

「飲……飲完！」我抹一抹個嘴，陣苦味仍然喺我喉嚨縈繞。
 
「叻仔！」阿欣拍手。
 
我指一指塊面：「咁你肯錫我未？」
 
阿欣呆咗一呆，然後笑住答我：「我又冇應承你，哈哈哈哈……」
 
「好奸茅！第時你一定要嫁俾我！到時我再錫餐飽！」
 


「好呀，等你大個啲先講。」
 
我伸隻手指尾出嚟，然後話：「咁你應承我先。」
 
「好，咁你都要應承我唔准同其他人講我哋嘅事。」
 
之後，我哋勾咗手指尾。
 
不過，承諾最終都係冇實現，或者阿欣早已經忘記呢個承諾。
 


到咗夜晚，我身體已經好返啲，老豆買咗成袋煙花返嚟俾我同阿欣玩，落完雨之後出面成地積水，空氣特別清新，夾雜住一陣雨水嘅味道。
 
我哋就喺出面嘅空地放晒成袋煙花，而我同佢之間所發生嘅一切，亦都好似煙花咁，漂亮但短暫，一瞬即逝。
 
除咗煙花之外，我祖屋出面塊空地仲掛住一個繩網，兩端分別勾住屋樑同埋一棵果樹，可以當韆鞦咁玩，我最鍾意同阿欣一人坐喺一邊傾計，一個下晝就咁樣悄然消逝。
 
有時候我哋仲會去游水，喺一片清澈嘅天然水塘消暑，由於果陣我仲未識游水，所以阿欣多數都會陪我喺淺水嘅地方玩水。
 
天真嘅我，覺得同阿欣結婚只不過係時間嘅問題，而冇諗到兩個人分隔兩地，可以點樣維繫感情，更加冇諗到種種複雜嘅問題，起程返香港當日，我仲同阿欣講：「下年新年我一定會再返嚟。」
 


但係我並唔知道，果次係我最後一次返鄉下，往後因為老豆工作嘅關係，我有五、六年都冇再見過阿欣。