《青梅竹馬的婚禮》: 第四節

老實講，咁多年前嘅記憶已經好模糊，印象較為深刻嘅一次，就係升咗上中學之後，某一年嘅暑假，某一個落住大雨嘅早上，亦都係我最後一次返果度。
 
「克仔！快啲醒！」阿欣不斷拍我塊面。
 
我捽一捽眼，見到窗外烏雲密佈，問：「咩事？」
 
「你流到成個枕頭都係鼻血，嚇死我！」阿欣眼眶泛紅。
 
「吓？」我爬起身，成身都軟弱無力，只見半個枕頭都俾我啲鼻血染成紅色。
 




「你瞓喺度唔好郁，我去叫爸爸嚟。」阿欣講完之後就跑咗落樓。
 
唔洗一陣，賢叔就同阿欣上咗嚟，阿欣仲拎住盤冒煙嘅暖水。
 
賢叔扶咗我起身，用手探一探我額頭，就話：「克仔你好似發燒喎。」
 
「我爸爸呢？」
 
「你爸爸出咗去探朋友，有排都未返。」阿欣用暖水濕一濕條毛巾，然後行埋嚟床邊同我抹血，我只係感覺到好暖、好溫柔。
 




「我出去買啲藥，你照顧住克仔先。」賢叔同阿欣交待完之後，就出咗去買藥。
 
阿欣幫我抹完鼻血之後，幫我換咗個枕頭，仲斟咗杯暖水俾我，然後話：「你瞓一陣先啦。」
 
口乾嘅我將杯水一飲而盡，然後放喺床邊嘅木枱上面。
 
「阿欣……我哋一齊瞓好唔好？」
 
阿欣笑咗一笑，然後就除咗對拖鞋爬上床，瞓喺我右手邊。
 




我眼定定咁望住阿欣，完全失去咗睡意。
 
「你做乜望住我？」阿欣問。
 
「我可唔可以攬住你瞓？」

阿欣並冇回答我嘅問題，只係攬住我條腰，閉起雙眼。我喺阿欣嘅溫柔鄉入面，漸漸失去咗意識。