搶婚: 第二十六章
自從被阿宜的男朋友發現了我和阿宜的關係之後，我倆見面的機會變得更加少。很多時，他也會有意無意來接阿宜放工，而中午亦會不停地打電話給阿宜問她的位置，所以我們很難才可以有共處的時間。有時，在午飯時候自己細看我剪輯給阿宜的《勞斯。萊斯》，竟也會把眼淚引了出來，低頭在工作檯前細聲飲泣。
「駿，你過一過嚟我度。」電話中的是王小姐，是我在這個部門的老闆。
「MABLE，你揾我﹖」我去到王小姐的房間時，見到她面前放置了一大堆文件。
「係呀駿，坐丫。」
「我地公司喺倫敦上年咪開左間分店既。」王小姐說。
「你意思係喺BIG EYE附近嗰間﹖聽啲同事講佢地做得幾好，做左半年已經開始有錢賺。」
「冇錯，我今次揾你嚟就係想講呢樣野。」王小姐指一指我面前的檔案。
「呢個係﹖」我有點不解。
「倫敦嗰邊覺得我地香港個BUSINESS MODEL有值得參考既地方，想我地派幾個人過去介紹同分享下我地既經驗，我想你跟埋我地去，學吓野。」
有機會過倫敦出TRIP，真是發夢都沒有想過，而且聽說外國的公司最遲五時都已經下班去HAPPY HOUR了，相比香港朝九晚九的生活實在差太遠了。而且，我一輩子都沒有到過歐洲，這個機會也真太難得了。
「好多謝你呀王小姐，俾個咁寶貴既機會我可以去倫敦交流。」我客套地說。
「唔，年輕人學多啲野係好既。不過我地既行程有啲趕，嚟緊12月2日就要出發，仲有大概一個月既時間，你都要幫手做啲準備工夫。」
「12月2日﹖」我呆了一呆，12月2日不就是阿宜的婚禮﹗雖然我一早已經跟阿宜說我不會去，而且自欺欺人地說不會認為過了12月2日之後她就成為了人妻，但12月2日對我來說，怎也不適宜作公事呀。可是，這個機會也著實難得，既可以拿公司錢到外國遊玩，又可順到散散心，放低一下。
「有問題﹖」顯然王小姐對我在出發的日子上呆了一呆感到不悅。她的問題一巴打醒了我。
「哦。。。冇。。。我只係已經諗緊有啲咩要準備者。」說得好聽，但我心內仍然對在阿宜結婚時我要在飛機上渡過感到很不自在。
「咁就好喇，我一陣會將啲資料同埋我地去既同事既資料FORWARD俾你架喇。」
「唔該哂王小姐，冇咩我返出去先喇。」
我認，我有一刻的妄想阿宜會是那五個去倫敦的同事的其中一個，亦曾想著她會一同去倫敦而不結婚，甚至我們偷偷地離開大隊在倫敦落地生根，永遠都不會回來香港。可是，15分鐘後，我這位能幹的老闆已經把一大堆我要準備的東西及其餘四個一同出發的同事的名字給了我-----全男班。一股悶氣湧上了心頭，稍為定神後便著手準備工作。
要準備的工夫也著實不少，令我每一天的工作都十分之充實，被填滿的腦袋鏈在沒有太多空閒時間去找阿宜，這一、兩個星期我們都只是以短訊溝通。我有一刻想過，我們會否就如此這般胡裡胡塗般斷絕來往呢﹖
YEE「喂，聽講你會去英國喎，係咪真架﹖」
CHUN「去一個禮拜之麻，做咩呀﹖」
YEE「冇呀，問吓者。。。」
CHUN「。。。」
YEE「。。。」
CHUN「你會掛住我架可﹖宜」
YEE「會。。。就算你只係去一個星期，我都會掛住你」
CHUN「係呢阿宜，點解唔見你POST啲婚紗相出嚟既，我想睇呀」
YEE「。。。你真係想睇﹖」
CHUN「係呀，咁你著啲靚衫我都想睇架麻，我知，嗰日都唔係我企喺你身邊，但係我見一見，都可以喺英國嗰邊幻想下你同我既時光。。。」
YEE「真係好好笑呀我覺得，我根本就唔想POST出嚟，好似一POST左我同你就玩完咁，我唔想話俾人知我就嚟結婚呀，一啲都唔開心。我唔想去到嗰一個階段呀。」想不到我無意的一問，阿宜會有這麼大的反應。
CHUN「宜，我唔係咁意思。。。我只係想睇下靚靚阿宜咋」
YEE「呢2個禮拜我想慢慢咁疏遠你呀，我想我地留一個好印象俾大家，但你知唔知呀，越想離開，越掛住。好掛住你。。。諗起你既同時要同第二個一齊你知唔知係好辛苦架。。。」
CHUN「我明白呀阿宜。」
YEE「我會記住我地一齊既回憶架，好希望我地既故事可以延續落去。我今日喺度諗，當個律師問我願唔願意嗰陣，我個心會有幾酸。。。」
CHUN「好似你之前咁講，好多野我地真係控制唔到。。。」
YEE「都係。。係呢，幾日冇見幾好麻﹖」
CHUN「一般啦。。。」
YEE「我地第時會變成點呢﹖」
CHUN「阿宜，可以打俾你傾幾句麻﹖」
YEE「好。。。不過等我10分鐘，我落左街打俾你」
CHUN「OK」
「喂﹖」「駿，有野想同我講﹖」
「冇呀，頭先你問我我地將來會變成點丫麻。我喺度諗，其實結唔結婚又有咩所謂喎，只要我地兩情相悅，就算你結左婚我地都可以好似而家咁架。」阿宜想了想，「唔同左架喇，駿。上次俾佢知道左我同你有野之後，佢都睇得我好緊。而家連放工都冇機會揾你，何況係假日。我只係希望我地都唔會忘記大家既愛。。。」
「宜，我會永遠記得我地一齊開心既時光，一定。」
「多謝你呀阿駿，我地下世一定會喺埋一齊架可﹖」
「一定。」我只可以這樣答。
「但係如果你下世變左豬咁點算﹖」阿宜笑說。
「。。。」一時間被這小妮子考起了。
「我會揾到你，都係喺一齊，因為你都會係豬~」沈重的氣氛一下子消失了，取而代之是昔日般說笑。
「宜，應承我，要開心。」
「好，我應承你，你都要。」
「一言為訂。」
「係呢阿宜，有冇機會。。。喺你結婚前我地再出多一日街，留番個回憶俾大家﹖」「你想去邊﹖」
「迪士尼。」