搶婚: 第十四章
在星期五之前，我要買到介指。可是，我根本沒有這個經驗，惟有請教前前女友〈唯一有聯絡的EX，而且她正在做珠寶買賣〉。她說在「我的珠寶」買一些碎石的介指會比較化算，因此我在星期一特意早點離開公司沒有和阿宜一起走，目的便是選介指。
去到選擇了一款平平實實的介指後便和SALES說要盡快拿貨，豈料她的問題卻嚇一嚇我，「先生你隻介指想買幾多號﹖」。我又怎會知道阿宜的介指的號碼呢，唯有用自己的手指試完之後再減兩個SIZE就算，應該不會差太遠吧。
「先生，呢款介指要過兩日先有得攞，有冇問題﹖」
「冇問題。」
「仲有提提你，如果隻介指唔啱SIZE可以攞番黎換，換細隻啲既話我既公司唔會退番錢。」
「有得換，實在太好喇，錢解決到的，就唔係問題啦。」我心想。
星期五了，我把準備好的介指好好收到公事包內，再重溫一次預先準備好的台詞，上班去迎接這重要的一天。
「5月11日，沈子駿你要好好把握今日呢個機會﹗」我心裡暗暗為自己打氣。
今天的工作進度是零，自起床的一剎那我便想著今晚送介子予阿宜的事情。好不容易才到放工時候，我在公司大堂等到阿宜之後便衝衝乘車到赤柱。幸好還未到下班塞車的時候，我們6點半已經到達赤柱。而今晚我訂了KING LUDWIG跟阿宜望望海、吃豬手。我喜歡這間餐廳的原因除了它的食物還可以外，是因為氣氛不會像其他西餐廳般太拘謹，希望阿宜也喜歡這餐廳吧。
例牌地點了豬手、德國腸、一些小食及啤酒後，便開始熱身。
「你鍾唔鍾意呢度呀﹖」
「鍾意呀，個景好靚呀，而家又咁啱見到佢少少日落喎，好正呀。」
「你鍾意就得喇。」
「做咩咁好帶我黎呢啲貴價地方食飯呀﹖」在阿宜心目中，KING LUDWIG是中上價的餐廳，這再次證明她是一個很節儉的女生，是我其中一樣最喜歡她的地方。
「冇呀，想同你黎呢度囉，你唔想同我黎咩﹖」我問道。「做咩問埋啲咁奇怪既問題呀﹖」
「你答我先啦。」
「梗係想啦。」阿宜答得有點害羞。
「你望吓個海。」
「有咩睇呀﹖」阿宜問。
「唔知呀。」我答道。
「咦~玩野呀麻你﹗」阿宜沒好氣的笑著說。
「你睇吓，咁無聊既野你都可以笑一餐既。」
「開心咪笑囉，唔得咩﹖」阿宜嘗試反駁。
「梗係可以啦，即係證明你同我一齊嗰陣係幾咁開心囉傻豬。」
「你先係豬呀~豬﹗」阿宜沒有正面答到我的問題，可是我感覺到她心裡是認同的。
「係呢豬，我地一陣食完野去海邊行吓咯，唔係肥死你呀。」
「你就肥，我一陣係陪隻豬行架咋﹗」就這樣，我和阿宜之間多了一個稱呼「豬」。
為了壯膽，我一連喝了兩杯大啤。行回赤柱大街，當阿宜仍嚷著要夾錢的時候，我則眼觀四方，判斷應該在那個地方行動。美利樓、卜公碼頭等太多人，並不適合我的行動，再往前走，看到行人路旁有一條長長的堤壩，正合心意。最後，我象徵式收了阿宜$100元後便帶予她坐到堤壩上。
堤壩上其實坐了不少情侶在談心，只是堤壩也夠長及各人都不想被打擾，所以都自動自覺地隔得遠遠的。
「赤柱真係一個拍拖既好地方。」
「係囉，你睇吓，周圍都坐滿哂情侶呀，後面仲有人錫緊添呀﹗」
「係呢阿宜，你覺得我同你行得埋左之後，同你之前識既我有冇咩唔同呀﹖」我問。
「冇之前咁惡囉，我之前都話過覺得你惡架，不過熟左之後先知道你都成日笑之麻。仲有都唔係想像中咁花心既。」
「我幾時有花心過呀豬﹖」我追問阿宜。
「感覺之麻，成日講野又冇黎認真，點知你邊句真邊句假喎。」
「吓，我對你係真心架阿宜。」
面對這個問題，阿宜再次低下頭不語。過了幾秒都不見阿宜回答，我便一手把她拉到我的懷來，正當她抬頭想望我的時候，我的嘴唇已到達她的嘴邊。雙唇交接時像已有默契般各自微微張開，讓對方的舌頭輕易進入。舌戰了數分鍾後，阿宜首先離開。
「駿，其實我地咁樣係唔啱架。」
「宜，你愛唔愛我﹖」是入正題的時候了。
「我愛呀，我好愛你呀沈子駿。。。」
「咁咪得囉阿宜，我愛你時你又愛我，咁我地不如正式喺埋一齊，有咩問題我地咪一齊解決囉。」我用堅定的眼神及語氣對阿宜說。
「但係，我唔可以就咁就放棄佢架，佢已經為我付出同埋放棄左好多野架喇。而且，我地12月就會結婚。。。」
「唔係冇得解決既。」雖然我沒有任何不傷害任何人的方法要阿宜悔婚，但我知道這一刻對我有多重要，而且這一刻的沈子駿絕不能對敵人仁慈。
「點解決喎，我地連酒席呀，影相呀，全部都BOOK好哂，同埋好多親戚朋友都知道哂，我地冇得退架喇。」
「宜，辛苦你喇，我淨係想知道，喺你心入面，你鍾意邊個多啲﹖」
「我唔知呀。。。」阿宜的答案我早已料到。
「宜，我唔係迫你做啲咩，我淨係想你好好咁諗清楚你究竟鍾意邊個，因為有啲決定錯左就一世架喇，而家仲有半年，你仲有得選擇架其實。」其實我正在迫阿宜，但我真的沒有其他辦法。可能我迫得有點緊，阿宜轉身用背部對住我，抱著膝頭不語。
就在此時，我的手俏俏地伸到袋裡，把一早預備好的介指拿在掌心。我的心「卜通、卜通」地吼叫著，慢慢靠近阿宜。「宜。」我叫了一聲卻得不到點應。我慢慢地用雙手環繞著阿宜，並盡量用手心遮掩介指。當阿宜整個人落在我的懷抱後，我用右手小心翼翼地拖著阿宜的右手，手指一卸，阿宜的五隻手指也分了開來。
「做咩呀阿駿﹖」阿宜問道。我以親吻回答她。就在她的注意力集中到我的嘴唇上時，我的左手以看準位置，一下便把介指套到阿宜的左手中指上。
「唔﹖」阿宜推開我。
「咩黎架﹖」並好奇地問道。
「阿宜，做我的女朋友，好麻﹖」阿宜傻傻的望著她的右手上那隻偏大了的介指，雙眼先是泛紅、再注滿淚水，嘴角卻微微揚起。是開心﹖是困擾﹖我真的攪不懂。就在腦內無數可能性在相互交織之際，阿宜突然撲到我的懷甫，緊緊地摟著我的腰，不停喃喃自語地說，「多謝﹗多謝你呀阿駿﹗」
可惜，阿宜說她不能收我的介指。
「駿，隻介指真係令我好感動、好驚喜，我好想收呀。。。但係而家既我係唔可以收你隻介指架。」
「點解﹖」我不惑地問道，明明很喜歡，為何不能收；明明很喜歡，為何不能愛﹖
「我雖然鍾意你，但我而家既身份仍然係佢女朋友，所以喺呢一刻，我真係唔可以收你隻介指。你俾啲時間我。。。我而家真係唔知點做呀。我想諗一諗呢半年所發生既事，想抽離少少睇成件事，再決定下一步應該點做。」阿宜繼續說，「雖然我真係好鍾意隻介指，但除非做左你女朋友，唔係既我唔可以亂收架，會影響左我既決定，我想我同你一齊左之後先收呀。」
「宜，對唔住呀，我係咪迫得你太緊，令到你唔開心呀﹖」
「傻啦豬，我真係好多謝你對我既愛，我亦睇到你喺呢段時間為我改變左好多，我睇得出架。係我問題，所以我講對唔住至真。」
「豬，我俾時間你，我相信如果真係有緣既話，我地最後都係會喺埋一齊架，我信你，亦都信我自己。」此時的阿宜已經泣不成聲。。。
「為何還害怕 若覺得這樣愛
尚在計算他又是誰 可否愛
旁人那個 接受這種愛」《勞斯。萊斯》何韻詩
我腦裡響起的歌詞，提醒了我，我不應只按自己的想法做。阿宜是一個女生，她有自己的名聲，我不要面並不代表阿宜也是，我需要為她想更多。
「傻豬，其實你開心就得架喇，其他啲野我地慢慢再諗啦好冇﹖」我安慰她說。
「唔。」
「但我隻介指唔攞番住喇，你幫我保管住佢先啦好冇呀﹖」
「吓，咁都得呀你﹖」嘴裡說不，阿宜已把介指袋好。
「都係唔好﹗」我說。
「吓。。。咁俾番你囉。」
「呀。。。唔係呀，我頭先見你戴隻介指嗰陣呢，好似大左啲，不如我地揾日去換一換佢好冇呀﹖」我連忙解釋。
「係呀豬，大左好多呀，你點買介指架你，哈哈。」
阿宜總算收了我的介指，縱使只是「托管」，都已足夠了。我對阿宜的愛有時也難捨難離得可怕，我們在乘260號巴士回中環的途中，由一上車(整個2樓也沒有人)，便一直接吻到回到中環，期間雙手還不自覺在阿宜身上游走了一輪。如果不是有數名外籍小孩在中途站上車，畫面可能更兒童不宜。
臨睡前，我傳了個CUBIE公仔（我和阿宜大多會用這個APP說話，因為她發覺內裡的公仔比LINE更傳神，而且少人用，就像我們兩個獨有的溝通渠道一樣。）及短訊予阿宜：
「我冇咩特別野講呀，只係想講多次我真係全心全意愛你，想照顧你、守護你，直到永遠。要真心愛一個人唔容意，要肯付出的更難，但我希望我所付出的，以及一切一切我為你做的，都可以令你感受到我對你既愛，同令你有信心同我一齊，俾我照顧你，繼續每日都感動你、令你過得開心快樂。我愛你。」