呃Like 呃出人鬼戀(完): 後記

首先，我要衷心多謝各位一直以嚟嘅支持！如果無咗你地，我根本完成唔到個故事。

經兩個月時間，終於都完成到大約八萬字嘅中篇故，真喺超開心！

其實，貼文依個版本同我之前寫嘅故事大綱有好大出入，最主要原因，喺因為個故唔喺太多人睇，所以改下改下，決定由50話，縮到40 話，等故事緊湊一啲。

不過，我還是比較鐘意自己原本嘅版本，而兩個版本最大分別主要喺 最後POST嘅第三戰線，哈哈。

要完成最後一戰，之前要用好多嘅篇章嚟舖，所以逼於無奈，我唯有將成段刪咗，難怪搞到好多巴絲打鬧我太屈機，連龍珠都出埋，哈哈。





等我寫番原來嘅舖排，留個記錄：
1. 原本被師太入法嘅喺肉身同地魂，小雅嘅天魂喺果夜受襲之後，就遊離喺人間，不知去向（師太都搵緊）
2. 小雅利用靈體偵側器，不斷去尋回自己嘅天魂，期間，將會遇到十個不同性格嘅靈體，而且仲收埋佢地入手機到。（其中有一隻我超級大愛！佢喺一位嬰靈。由於出世之後就夭折，感到萬二分不甘心，所以佢由死了那一刻就出盡全力咁爬回陽間，身上面俾鬼差鎖上八條鎖鍊要拉番佢入地府，但喺佢仍然死命咁向前爬，由於佢長年累月咁爬，最後練就咗一身拳四郎咁嘅身型（同樣貌），阿澤同小雅第一次見到佢時超搞笑呢～哈。
3. 入到去師太嘅異空間，小雅嘅天魂同人魂企喺阿澤兩邊，再加上實力變態嘅十個靈體與師太嘅神仙大軍作最後一戰。

唔知大家鐘意邊個版本呢？

無論點都好，故事總算告一段落。希望大家睇起嚟開心，如果故事可以令你會心一笑，我諗我已經成功咗啦。

再次感謝各位。有緣再聚。