呃Like 呃出人鬼戀(完): 第三十三晚：黑暗都吞噬唔到！我嘅太陽！
依一種感覺思源點會唔熟識，佢嘅一切都喺太師傳授，只不過想唔到，今日自己竟然都要身陷其中。
「叛徒！佢地究竟俾咗啲咩好處你。」師太嘅聲音，唔知喺邊到傳過嚟。
「師父......有好多嘢原來喺唔駛衡量利害關係。之前，我失敗咗，果個叫阿澤嘅細路無條件咁放過我。佢班朋友，亦都可以無條件咁去幫果個女仔。我......我都想試下依種感覺。」思源唔知道師太嘅位置，只喺面向前回答。
「廢話！」師太一聲怒喝。
三道勁風喺三個唔同嘅方向來襲。
思源完全睇唔到四周環境，只能夠喺喪門釘差唔多射到埋身嘅時侯，僅僅回避。
不過，師太又點會預計唔到！就喺思源嘅落腳位置，馬上又有一支喪門釘打中咗思源肩頭，衝力之大，令到佢成個人跌坐地上。
「放心，我唔會殺妳！妳對我仲好有利用價值，妳喺點都唔可以死。但喺，我就要令到妳從今以後都無能力再背叛我。」師太殘酷嘅冷笑聲，由四八方面咁傳過嚟。
「黑暗」依一種咒法就只有施術者一個可以保持正常視野，身處一個完全黑暗嘅環境之中，思源根本無計可施，佢喺袖中退出一支喪門釘，握住手中。依家避到就避，避唔到就用手中嘅武器撥打開佢。
但喺......思源心中有個疑問......
事到如今，師父仲會對我留手咩？點解師父只喺用「黑暗」？唔用另一個更可怕嘅咒術？
可惜，未及多想，一支喪門釘已經準確咁打中思源手腕，握住嘅武器鬆手脫出；之後再有三支同時打中左肩，左膝，右膝，令到思源成個人無力咁跪咗喺到。
「原來只喺我諗多咗，師父只喺想打到我殘廢，咁都好......就當我將一切都還番哂俾妳......師父......」連反抗嘅最後意志都磨光，思源雙手無力地垂下。
最後五道勁風，平胸激射而來，估唔到短短二十年嘅歲月，咁快要畫上句號。
＊＊＊＊＊＊＊＊＊＊＊＊＊＊
「你究竟仲坐喺到做咩」東寶龐大嘅身驅，同瑟縮一角嘅阿克成形好強烈嘅對比。
「老......豆......我都唔知，我唔知呀！點解我會搞成咁，我本來只喺好想努力咁去證明自己有用，但喺做果樣就衰果樣。我無心害個女仔架，其實佢都未死，不如我地放過佢啦。傷人罪唔算好大，我去自首，坐兩三年就可以出番嚟。喺咪？老豆？喺咪呀？」阿克雙手抱頭，成身震哂，仲有啲語無倫次。
「你真喺一條廢柴呀！如果你仲想做我個仔，就去做番啲嘢。唔好淨喺識坐。」東寶掉低咗一把明晃晃嘅匕首。
阿克見到更加縮埋一舊。
「依個喺你最後嘅機會，見到有人走咗入後堂嘅話，搞掂佢！如果部手機喺佢手上就搶走佢。好簡單架咋，你唔好再衰，衰埋今次......唔該你唔好再喺我面前出現。」東寶轉身離開左阿克房間。
阿克睇住把匕首，企喺人生交差點。
拎定喺唔拎？殺定喺唔殺？搶定喺唔搶？
佢無膽再望，不過佢隻右手已經慢慢咁伸向把匕首。
＊＊＊＊＊＊＊＊＊＊＊＊＊＊
「啊......」一聲痛苦嘅慘叫，然後喺五下清脆爆裂聲，唔通連肋骨都斷埋？
黑暗之中思源只感到難以想像嘅震撼。
五下喪門釘攻擊，竟然連一支都無打中。依一刻佢雖然咩都睇唔到，不過，佢感覺到有一個「人」，企咗喺佢前面。
「你......你喺？」思源把聲震哂。
「咳......咳......思源大師，妳......無事嗎？」
潮哥？
「變......潮？點解會喺你？點解？點解你要走入嚟？點解？點解你可以搵到我？點解？點解你要同我擋？」思源一生，被禁情禁愛，對其他人不能動情，對自已更加要絕愛，佢點估到世間上竟然會有人用自己身體去擋住五支喪門釘。
思源淚如雨下，喊到一發不可收拾。
「嗚......你喺邊呀？你喺邊呀？」思源雙手摸黑不停探索，終於俾佢摸到潮哥隻手，跟住一路向上摸，清清楚楚咁摸到五支喪門釘筆直咁插住喺佢胸口。
「咳......咳......我梗喺搵到妳啦。妳喺我嘅太陽！連黑暗都唔可以吞噬嘅太陽。妳發出嘅光，就算喺宇宙嘅邊緣我都可以睇得一清二楚。」黑暗之中，無辧法睇到潮哥究竟傷成點，不過佢不停咁咳，一定傷到內臟。
「嗚......你喺蠢才嚟架，我咁辛苦踼你出去，你做咩要走入嚟喎......嗚......」思源喊到好似個細路女咁，感情一旦缺堤，一發不可收拾。
依個時候，包圍佢地嘅黑暗開始消散。
師太冷眼望住喊成淚人嘅思源，同埋中釘倒地嘅一個男人。
「白痴！死不足惜」師太覺得依個畫面非常諷刺。
「咳......思源大師？你做咩喊成咁呀？」潮哥笑問。
「嗚......你就死啦，你就死啦......嗚......」又聽到潮哥咳，思源好心痛。
「咳咳......死？我諗唔會嘅，不過就真喺好痛。衝力咁大頂嚫條氣門囉。」潮哥強顏歡笑。
「嗚......嗚......嗚......」思源唔信，喊得仲大聲。
「咳......嘻，唔信你睇下，我真喺死唔去架。」潮哥拉開咗少少果件袍嘅領口。
「嗚......?依啲咩嚟架？避彈衣？」思源一邊喊一邊低頭睇下喺咩嚟，不過真喺毫無頭緒。
潮哥好似隻箭豬咁慢慢爬起身，仲要一支支咁將插住喺胸口嘅喪門釘拔番哂出嚟。
中哂五支喪門釘，仲可以企得番起身！雖然話師太已經故意避開要害，但喺......絕對無可能。
「荒謬！我嘅喪門釘連飛虎隊LEVEL 4 嘅避彈衣都可以插得穿！你究竟施咗咩妖法！」師太指向潮哥，突然覺得依個男人唔喺人。
「哈哈，如果依啲喺妖法，咁就喺科技嘅妖法啦。」潮哥一手將件啡色嘅長袍扯甩，型到跌渣。
仍然跪坐地下嘅思源，傻傻咁望住眼前依個突然變得高大嘅男人，開始發出光芒。