<網上交友的第一次> 憑感覺愛上你: 第二十章：相機成為了紅線？（2）

  ↵上到去，環境唔錯，加上天氣十分之晴朗，Jessica開心到立即叫Kenneth幫佢影相。由於中午時間，大家都覺得有啲餓。山頂

上面餐廳唔多，最終我地入咗翠華餐廳食。嗌咗4樣餸share，4杯檸檬茶，我同Jessica share一杯。後尾，為咗唔想比人地一個港女嘅

形象，Jessica依層都明白，我地今次AA制......

我地行到去一個地方，個度就好似一個公園，種滿植物，對住嘅就係一望無際嘅香港景色。雖然香港成日大霧已經見慣不怪，

但個日景色離奇地非常之清晰，猛烈嘅太陽襯托於香港嘅美景同周圍嘅花草樹木簡直係絕配。Jessica就好似一個旅客咁，立

即拉住Kenneth，之後叫Martin幫佢地影相。Jessica嘅行為的確做得過於表面，Kenneth又點會唔知佢心意，Martin又點會唔識

做呢。雖然部相機係Jessica，但揸機人絕大部分都係Martin。面對咁靚嘅景色，為免將來無能嘅政府將佢毀於一旦，我只好

立即拍下，留為紀念。講真，今時今日還能夠睇見清晰嘅香港美景只能夠靠運氣。

Wilson：『用電話影邊靚架』

我：『咁你用你部專業相機影完send返啲相比我囉』





Wilson：『無問題，一定靚過你影嘅多多聲』

卡嚓

我：『睇過』我䀹下佢部相機『乜你啲構圖咁差架，個天同下面嘅景色啱比例，左下角又無端端影到少少欄杆，唉.....』

Wilson：『咩啫，嗱，你試下影囉』

佢一隻手托住部相機，另一隻手將條相機帶穿過我條頸





我：『haha咩啫』我嘗試學佢嘅語氣『乜你講野咁女仔嘅』

Wilson：『跟得你多』

我：『痴線，我平時邊有講 “咩啫”』我再次取笑佢

我拎一拎轉頭，發覺Jessica佢地都唔見咗人，我同Wilson四周圍睇下，不過都唔見佢地嘅蹤影。

我：『唔好理佢地了，我地自己影』

揸住部專業相機，連自己都覺得專業埋，左手托底右手禁制，單眼影相，一個字『型』！

我：『喂喂，幫我影張我揸機影相嘅pose吖』

Wilson：『哦』『過啲，右少少，個頭愕高啲，嗯，hold住，隻腳前後企』





我：『喂呀，得未呀，好攰啦』

Wilson：『得啦』

我：『嗯，唔錯，記住whatsapp send比我呀』我接下相機睇番張相

Wilson：『嗯』

行到再入面，個度有個涼亭，我地面向風景休息一下。一路欣賞風景，一路有清涼嘅風撲埋嚟，的確好休閒，好relax。突然

間有隻好特別嘅雀仔飛到前面嘅欄杆，當我想影嘅時候唔知點解對唔到焦。我遞部相機比Wilson，佢唔知噤咗咩制，部相機又

搞返掂。我嘅身傾向前少少，喺差唔多噤下快門嘅時候，Wilson好大聲咁話我揸機姿勢擺錯。





我：『shu！再出聲隻雀仔就走架啦』我細細聲向Wilson講

卡嚓一聲

隻雀仔好快就飛走咗.....

Wilson：『等我教你點揸機啦』

Wilson捉住我隻左手，將佢移向鏡頭底下，一邊講：『隻左手唔係托住左下角，你要將佢托住鏡頭底下先會影得自然同舒服』

Wilson掂我隻手果下，突然有啲觸電嘅感覺。我又開始諗歪了，個腦喺度諗：死了，點解Wilson掂我隻手我個心會跳得咁快。

心仲未定，突然見到有人行緊過嚟......

Jessica：『哦！你地撇甩我地去偷情！』





我嚇到鬆開咗隻手，好彩條相機帶仲箍住我條頸

Wilson：『明明係你地走咗先，我地純粹係度抖下』

Jessica一副疑惑嘅樣望住我地.....

Martin：『我地頭先都影咗好多相，不如我地去個商場行下，順便入埋蠟像館參觀』

Kenneth：『咁我地依家行啦』

3個男人行前面，Jessica忽然箍住我隻手控埋嚟

『點啫，Wilson唔錯啦可？』





『你個Kenneth又點呀？』

『haha，我同佢影咗好多相，今晚有排慢慢欣賞』

『你得米啦』

『講啦，Wilson頭先同你做過d咩？』

『影相囉，仲有咩好做』

頭先Wilson掂我隻手觸電果下，我當然無同Jessica講，Wilson掂我果下痺痺地嘅感覺我仲記得。真奇怪，Kyle第一次拖我隻

手都未試過，唔通掂手背嘅感覺會大啲？依個時候忽然諗起Kyle….佢究竟去咗邊？做緊咩？即使對佢已經無感覺，唔嬲，無

唔開心，但我仍然好奇佢無故失蹤嘅原因。