[廣東話小說] 天工號 第一季: 7

7. 

到我醒番既時候, 我已經o係屋企張床上面。 
我一打開眼, 第一樣野做既, 係搵 
搵睇下孫運個袋有冇唔見到, 好彩佢好地地放左o係我張椅上面 

我開始懷疑, 唔通我痴左線? 唔係點會發埋d咁奇怪既夢 
但係我知道唔係夢, 因為我望下我個身, 全身既衫都爛晒, 全身都好痛 
我起身去照鏡, 我成塊面都係傷口, 仲有頭髮入面有好多玻璃碎 





突然間, 門外面有人拍門: 「wilson! wilson! 你係唔係o係入面呀?」 
我知道係胡少o係出面, 佢係我管家 
其實又唔算咩管家, 只係佢幫我睇住屋企d野, 我間屋有三層, 我將其中一層俾佢住 
佢就冇咩做, 主要幫我屋企執頭執尾咁, 其實都係請工人做 
佢似我朋友多d, 佢基本上就係陪我食飯傾計, 只係 
佢收錢做我朋友 

「wilson! wilson! 你係唔係o係入面呀? 你冇野下嘛?」佢不停拍門。 
我忍唔住開門, 佢行入黎, 著住成食堅身衫, 好明顯係去蒲完番黎 
「咁早番既?」我問佢, 依家先係十一點幾 




佢好似好緊張咁, 走埋黎扶住我: 「你點呀? 冇事下嘛? 」 
「我會有咩事?」我拍下個頭, 想拍甩d玻璃碎 
胡少好緊張咁講: 「新聞話頭先東區走廊有飛機爆炸, 死左十幾個差佬, 仲話你有份幫手載個疑犯逃走呀!」 

我即時彈起身, 開左部電視, 入面仲做緊突發新聞報導: 
「依度係現場東區走廊, 我地見到依家好多警方o係現場調查緊同搜集證據, 依宗係本港開埠以來首宗針對本港既恐怖襲擊。 
o係今日傍晚6點, 一架不知名小型滑翔機出現本港上空, 警方即時派員出動企圖攔截, 但唔成功, 同時當時有一架黑色私家車, 撞開鐵馬, 協助疑犯逃走。 
疑犯據稱為一名中國藉老年男子, 身穿啡色大褸, 佢o係飛機著陸既時間, 及時跳上私家車車頂逃生, 而該私家車亦及後因爆炸造成沖擊走避不及, 翻轉數圈, 車上司機逃去無蹤。 
民航處表示該飛機並無記錄, 而該架私家車登記司機, 為本港市民中國藉男子 蘇維臣, 警方已發出通緝令。特首對此表示哀悼, 有消息透露中共考慮派駐解放軍進城戒備...」 





我見到咁, 驚到望住胡少, 咩都唔敢講, 而係去搵我部電話 
我望下我部手提, 有69個miss call, 全部都係同一個人打黎, 李總 
李總係中共軍部既人, 直接負責我公司個project, 佢搵得我咁急 
「究竟發生咩事呀?」胡少仲係咩都唔知咁:「我頭先一知道消息, 嚇到即時o係台灣趕番黎呀」 

我混亂間望下胡少, 佢去台灣係幫我做野, 我諗住o係o個面買幾間屋, 佢幫我過去搞, 我都唔記得左。 
我6點出事, 佢11點已經趕到番黎, 佢真係當我係朋友 
「多謝你胡少, 但係依家好大件事, 上面以為單野同我有關」 
胡少好似愈黎愈驚: 「咩死梗, 咩上面呀, 依家咩事o者, 你真係同恐怖份子有關咩?」 
我迫自己冷靜: 「胡少, 你依家幫我做一件事, 一件大事, 你幫我放晒我所有物業, 包括依度。盡快, 我要天光前搞掂套現。我依家要搞我公司既野, 將公司放盤套現。」 
「咩事呀究竟? wilson呀, 咩事o者?」 

我望住胡少, 迫自己講依句說話出黎: 「依家 我一定要走 , 離開香港。」