[校園][多角戀]《畸戀高校》: 第一章
我叫姚殷琪，芳齡15，一米六，戴一副透明框眼鏡，眼細鼻扁，雖說未樣衰到好似CatGirl咁完全啃唔落，但一拍埋去外表中上嘅同級女同學，五官真係輸蝕好多。
勝在瘦底大波，坐大C望D，皮膚皙白。
雖然身邊嘅人會拎呢啲優點來安慰我，但我覺得樣靚先會有正人君子欣賞，而單單身材好反而會令人聯想到「雞」、「肉便器」，以致於份人勁自卑，社交方面又唔夠放。
每次上社交網站見到同校fam j、班花、級花、又玩得又襟睇嘅世界女post靚相，我嘅容貌焦慮症也隨之日漸增強……
完咗今個暑假就升中四了，由於上年不幸地失手，我將會升到全級成績最差嘅4E班。
一入班房，果然不出所料，一個熟識嘅人都冇。
我秒速避開所有陌生嘅目光，視線向著前方地下，連忙瞄準課室嘅角落前進，盡量令步姿顯得正常。
「呼～」幾經辛苦終於安頓好自己嘅座位了，我不禁鬆下一口氣。
「嗨～」
我猛然抬起頭，由於頭先社交恐懼症發作，見到角落頭有位就一個勁兒坐過嚟，冇為意隔離位嘅存在……
「你之前邊班㗎？好似好面善咁……」聽落把聲幾清爽，短髮隨微風飄逸著，滿溢著燦爛嘅笑容，愈睇愈似日本AV女優深田詠美。
「啊我前3年都係D班……」我小心翼翼咁答。
「唔怪得啦！我中一D班㗎！可能你唔認得我啦。」
「喔你係程筱？我中一歷史科同你同組囉好冇，好難唔認得喎，印象中你之後升咗上C班……？」
「啱呀不過上年掛住出夜街蒲唔讀書，所以……砰！跌返落嚟lu……嘻。」程筱調皮咁伸伸舌頭，又好快縮返入去。
由於大家同樣喺新班級冇熟人相伴，孤單嘅共鳴感油然而生。
一連串嘅交談意外地舒服，毫不造作，有一瞬間真係覺得原來咁怕生嘅我，都可以搭嗲搭得咁暢順，唔存在任何尷味、冷場。
雖然可惜好多時呢種爽朗嘅女仔，日後未必會當我係最好嘅朋友，但對呢一刻嘅我已經好滿足。
多謝外向嘅人帶領內向嘅人融入新環境。
傾吓傾吓，內心嘅不安漸漸減退，開始放膽眼仔碌碌，不經意地觀察周圍。
世界仔女嘅一堆、學術味濃嘅一堆、四眼毒撚嘅一堆。
不知不覺地，對眼停到成個課室嘅中間。
有好幾個小跟班圍住一個疑似幫主嘅，頭髮啡啡地色，衫鈕冇扣晒，衣領鬆垮，衫腳都冇攝落條褲，蹺腳坐喺枱上面，連手機都夠姜拎埋出嚟，特別惹人注目。
我認得嗰個所謂嘅大佬叫徐天龍，皮膚黝黑，眉毛又粗又深色。
佢由中一到今年中四都離不開E班，聽聞佢見到gfable少少嘅女仔，就好容易起痰，會無啦啦抄人牌、跟蹤人。
不久之前，佢一廂情願地以為自己出咗pool，結果被校花friend zone，就扭曲事實，向外散播校花嘅種種不是。
又易動情又死要面，一啲風度都冇。
徐天龍嘅操行一向極為惡劣，專恰啲睇落唔些唔些嘅四眼仔。
有啲揀嚟收做低等𡃁，on call隨時stand by做出氣袋、atm、被請槍咁，但大佬一唔小心搞出啲咩大頭佛，有次互毆搞到連警車都開嚟學校門口調查，死貓就佢哋食晒。
高等少少嘅𡃁個底就花花地，讀唔成書，通常有返咁上下肌肉。
相比之下待遇好得多了，有得蝦蝦霸霸幫吓拖之餘，碰釘都有大佬罩住，不過要夠忠誠，凡事以大佬為優先，自己只可以享受大佬揀剩嘅福利。
而當中冼湛曦就係高等𡃁嘅佼佼者，好識刷鞋，周不時帶住令人唔舒服嘅眼光，上下打量路過嘅女仔，笑容都幾奸狡，睇落好虛偽。
儘管如此，天龍睇中佢話頭醒尾、情商高，又同自己特別志趣相投，湛曦先有得成日同佢孖住行出行入。
「龍哥！放學之後打算踩邊個場？」湛曦閃爍著期待嘅眼神，手掌合住捽。
「冇mood啊仆你個臭街！返屋企瞓啦。」天龍原本踩住張凳un腳，一講完即刻一腳踢開。
神奇嘅係力度控制得好好，張凳冇跌落地，看來唔係第一次咁做。
湛曦眼尾哨兩哨天龍嘅手機熒幕，顯示著校花嘅社交平台主頁，但右下角係冇頭像，唔似係天龍本人平時公開嘅網絡媒體帳號，突然好似諗通咗啲嘢，即時口快快噏咗出嚟。
「唉龍哥，男人老狗俾返啲骨氣啦，女人如衣服啊……」
「屌啊！咁多人死唔見你死！」天龍感覺被睇穿了心思，意圖一揶敲落湛曦嘅頭。
無奈湛曦早一秒預知到自己領嘢，笑笑口避開攻擊，身手相當靈敏。
最近天龍一直喺度苦惱人初戀我初戀，我嘅初戀就咁搞獲咗。
唔好講扑嘢，唉kiss都算，連手仔都冇得拖，仲要唔係我飛人而係人哋飛我，慘過返印度，講出嚟實被人笑到面黃，你話瘀唔瘀？
「唔係呢你睇吓！女死女還在啊～」湛曦快速皺起眉頭，擺個好認真嘅神情配合，一手攤開，快要包覆整個課室。
湛曦顧住觀察天龍嘅反應，隻手慢慢停到一個位，冇為意咁啱對正我嘅方向，一時半刻唔記得收返埋隻手。
天龍嘅視線不自覺地順著隻手嘅方向，與本身望緊過嚟嘅我四目交投，成就第一次嘅正面對望。
佢嘅眼珠好黑，眼神好凌厲，深沉到操控著我嘅大腦，好似一個黑洞，要吸我入去咁，有一剎那達到無意識嘅境界，我趕唔切移開對焦。
「超……狗也不屌……」天龍吞咗啖口水，斜眼地別過頭去，擰返轉身。
正當湛曦想回應啲咩嘅時候，學校鐘聲響起，直接打斷對話延伸，原先企喺度嘅同學都各自各返埋位坐。
咩？狗也不屌？係講得好細聲，不過我全程睇住佢嘅口形，應該冇聽錯，仲要係望到我然後咁講，以為自己係邊個？會唔會自視過高？
本身對佢嘅印象已經唔太好，家吓直頭blacklist。
對住呢種熱愛無故惹是生非嘅人，可避則避，我一定要加把勁讀好書，下年升返上D班。