破處·地獄: 【十七】

剛才喺鬍鬚佬手上逃走出嚟，志明已經消耗咗好多體力。

佢一路跑，個肥仔就一路喺後面追得好貼。

目測二人前後嘅距離只係差一個手位。

而唔知點解，佢地跑跑下，地面無啦啦冒起高溫嘅水蒸氣，周圍突然變得好焗、好熱。

志明成身出曬大汗，抖曬大氣，對腳跑到就嚟無力。





佢覺得有啲唔對路，於是抬頭望一望天，結果見到月亮中心有個類似蒸籠嘅圖案浮現。

唔通呢個係「蒸籠地獄」？

隨即，公園內嘅四周，一瞬間瀰漫住悶熱、潮濕、翳焗嘅水蒸氣。

志明同肥仔一邊跑，一邊扯曬蝦，好似哮喘發作咁款。

啲水蒸氣焗上嚟真係好難頂，漸漸佢地兩個都開始跑唔郁，各自停喺原位大啖大啖咁抖氣。





肥仔見到志明塊面紅卜卜，兼發出急促嘅喘氣聲，令佢不禁遐想，又再露出淫賤嘅表情。

事實上，佢地兩個呢刻只係相隔唔夠兩個身位，假如唔係俾啲水蒸氣蒸住抖唔到氣，肥仔應該已經撲咗過去志明身上。

啲水蒸氣一路喺地下谷上嚟，一路谷一路谷，直到過咗三分鐘之後，先至開始慢慢消失。

志明都唔等啲水蒸氣完全散開，就先於對方一步，啟動向前跑。

佢嘅目標好清晰，就係跑去前面嗰棵大樹下面。





至於肥仔就喺志明後面起勢跑、落力追：「死八婆你想走？無咁易！」

隨住體力下降，志明嘅速度明顯比頭先再慢咗。

反觀肥仔就越追越貼，隻手幾乎掂到志明個背脊，仲爭少少就可以掹到件衫：「嘻嘻！我就嚟捉到你啦！」

「呼！呼！呼！」志明上氣唔接下氣，跑到好辛苦。

基本上佢嘅體力已經用盡，家陣全憑意志力喺度支撐。

肥仔一直喺後面咬住唔放，眼見仲有大約十米就跑到前面嗰棵樹下面，呢個時候，志明突然一個急步剎停，然後再用埋最後嘅力，快速轉身調頭跑。

肥仔始料不及，完全估唔到對方會突然調頭。

由於佢嘅身形太過笨重，喺全速跑緊嘅時候，一時之間根本剎唔切掣。





結果佢成個人傾前，再跑多三、四步先至停到落嚟。

而就喺呢多出嘅三、四步，令佢落入咗志明嘅陷阱。

呢度嘅樹木，只要行得太近，就會觸發「機關」，無幾耐之前志明舔咗一次嘢，家陣佢學以致用，用返同樣嘅招數嚟對付敵人。

肥仔企喺大樹底下，當佢擰轉面，想調頭去追志明嘅時候，身後嘅大樹突然生出一條條帶刺嘅藤蔓，綁住佢嘅手手腳腳，兼且勒住佢條腰。

個肥仔當堂嚇咗一跳，面上露出驚慌嘅表情：「下！咩事呀？點解會咁架？」

佢係咁郁身郁勢，不停咁掙扎，只不過啲藤蔓箍得佢好緊，而且上面佈滿尖刺，只要稍微一郁，都會俾啲針拮到好痛。

志明用手抹走額頭上嘅汗珠，嚟咗破處地獄半日都無，就幾乎做夠佢一年嘅運動量。





筋歇力疲嘅佢之後用咗差唔多五分鐘，先至完全抖返順條氣。

「仆街！你陰我？」肥仔全身郁唔到，只能用不忿嘅眼神睥住志明。

「你啱先唔係好得戚架咩？依家笑唔出啦？」志明執起地下一舊碎石仔，掟去對方身上。

肥仔面如死灰，招牌式嘅「嘻嘻嘻」笑聲一去不返。

依家嘅佢就好似一舊放喺砧板上嘅肥豬肉，準備任由宰割。

而經過剛才一番你追我趕，又喺「蒸籠」度焗完桑拿，跟住又一輪追逐，不知不覺時間已經消耗得差唔多。

志明望住手錶上嘅時間，耐心咁再等多五分鐘。

最後無驚無險，時間終於倒數到最後一秒。





隨之，變身閃光一閃，志明同肥仔同時間搖身一變，分別變成男人同女人。