寧寧之斜槓族篇: 1. 瑪姬玩具老細

只係用過一晚嘅「小粉」就叉唔到電，於是「寧寧」帶埋單據去「瑪姬玩具」打算更換。

大熱天時必備嘅單薄背心，個樣依然包到冚，行入去玩具連袋放上櫃枱，
照舊變聲吊高聲線 "唔該，個玩具好似有啲問題”
坐喺櫃枱點算緊貨品嘅老細，水平線望望前方，胸前半濕透嘅吊帶背心，成對波擺咗上枱面霸佔大半視線，再微微抬高望望面前聲音來源，眼定定 “啊…妳…妳咪之前個靚女~，個玩具有咩問題呢？”
我望住佢講嘢，就好似琴晚佢喺屏幕上講嘢咁打咗個突，自尋煩惱毛病又發作，心諗 「佢點知我琴晚做直播㗎！？」 嚇到攞晒啲嘢轉身正想離開。

唔信自己貨品咁差嘅老細 “喂，咁就走啦有緣人，我啲玩具無理由咁快壞喎，不當使用唔包換㗎，俾我睇睇先”
停下腳步定個神，哦，佢應該只係認到我嗰日一樣包到冚嚟幫襯啫，況且一個玩具又可以點樣不當使用呢？即管行返上前聽佢講乜。有緣人？ 都算係嘅，由我搵情趣用品撞到呢間開始，計埋而家算係第3次見到佢。



望住老細揸住「小粉」凌空模仿幾個使用情況，愈嚟愈近上下睇吓邊個位置出問題，忽然諗起琴晚無電用唔到時，又唔想濕水叉電，搞一輪最尾都係用唔到，就咁擺低咗完全唔記得清洗！咁尷尬嘅情況，我手背遮住口罩下嘅傻笑唔知點好，

身後邊一把女聲 “係咪反轉咗個C型用，肉緊過籠扯鬆咗裏面啲線呀？”
一個長長金髮、戴住鴨舌帽、口罩、低胸背心，上圍唔算豐滿，胸口有啲字樣紋身嘅女仔，由後面行到我身邊望住我 “我上次都係咁樣整壞咗一個，嘻”

老細手指指 “妳個衰女叫你早啲嚟幫手睇舖而家先嚟，仲好講上次，上次俾我睇完個嘢先話未洗過！”
金髮女仔 “咁梗係用完先洗嘛，都未用完！” 轉頭又望向我 “啱唔啱呀？嘻…尋開心時發生啲咁唔好彩嘅事，咁似我上次黑氣纏身嘅~，師傅係咪呀？”

又衰女又師傅聽到我一頭霧水之際，老細解釋 “呢個係我契女又係我弟子，佢講嘅黑氣，全名係「中陰黑氣」，如果係女人被纏上會好麻煩…” 一雙手指作畫符狀點過雙眼，望望我頭頂再望望週圍 “…唉…真係咁，都係唔講喇，驚嚇親妳…”
被人咁樣望忽然涼咗一截，潛意識縮低跟住望吓自己頭頂週圍，都唔記得咩變聲唔變聲 “唔係有飛曱甴呀…？”



老細無理我，一雙手指對住「小粉」作畫符狀，收入一個黃色布袋合掌口噏噏，轉頭攞出新貨 “原本操作不當嘅損壞係唔包更換嘅，而家我換一盒新嘅俾你算啦，我哋緣盡於此，請回” 遞手指向門口方向。

金髮女仔好緊張咁同我講 “最近係咪有樣嘢總係令你唔開心，硬係放唔低咁呀，我上次中招前都係咁呀！”
見我無回應，跟住緊張到就喊咁 “師傅你好似上次幫我咁幫吓人啦~！”
聽見老細似乎有啲心軟嘅口吻 “…唉，整定，一切都係整定…紫盈，你兩個係舊同事啱咀形啲，去坐低慢慢傾吓先，我需要啲時間”

未搞清楚發生乜事半信半疑之時，仲要嚟一個震憾訊息！舊同事、「紫盈」再加埋把聲嘅記憶碎片快速喺腦內穿插，雙腳好似唔聽使咁被金髮女仔慢慢扶住行出舖頭，行到出門口稍為定神，身邊個女仔，點睇都唔似以前成日見嘅舊同事呀！老細又點會咁神通廣大知我做邊行！！

成個腦都係呢兩師徒嘅對話， 心諗「最近真係覺得成日都行衰運，連個玩具都要玩我，仲要唔只呢排有嘢放唔低、唔開心，係同哥哥嘅關係一直都唔開心！」