就算幾痛都好，都放唔低你。

（唔係好識點開始，咁交代吓件事起因經過結果先？雖然現實中嘅結果都唔知係咪真正嘅結果。）
諗返起中二嗰一年，你嘅稚氣令我覺得好煩，但原來一切都係你為咗引起我注意嘅把戲。講嘢好大聲，豪放，動作又好粗魯，成隻癲狗咁，係我對你嘅第一印象。唔知點解我去到邊，你都會喺附近；身邊有男仔同我傾計，你都要癡埋嚟，明明同你冇講過野；特登話唔知我係邊個，但一早已經留意住我；向身邊朋友打聽我ig，表面上又扮到冇嘢咁。
到後來發現原來中一嘅時候，我哋之間嘅紅線一早已經牽起。一開始喺ig傾計，傾到喺學校開始行近，一齊咗之後，一開始講嘅「低調」已經變成人盡皆知。同你一齊嘅時候，係喺我黯淡嘅人生入面，最開心嘅日子。
𨍭眼間嚟到中四，由幾時開始，我哋呢段關係開始變差？由幾時開始，你發現你已經唔愛我？我哋不斷錯過，到底係緣份定係命運？喺你愛我嘅時候，我太靦腆，唔敢表達對你嘅愛；喺我懂得愛你嘅時候，你已經鍾意咗口中所講嘅「朋友」。
到我已經愛你愛到走唔到嘅時候，你狠下心留低我自己一個喺原地。每次見到你同佢一齊行嘅時候，都好似一把刀咁插入我心，到底點解你可以咁快忘記一齊過嘅日子，同下一個咁幸福快樂…我又可以點樣放低你…