友愛的決擇: 第九章：為何你不聽我解釋？

有時坦白唔係一件好事，因為過份坦白能夠令你認清一個人嘅底細。

我坐咗喺阿謙屋企樓下，坐喺花槽石壆邊，個心亦仍然忐忑緊應唔應該call阿謙。最後，我同自己講，

今次係我最後一次因為同阿俊嘅事而搵佢，跟住就call咗阿謙落嚟。我眼角已經見到阿謙已經行到我身邊，

之後好冷淡講咗句：今次又咩事   但係我唔知點開口

『你又同男朋友鬧交？』當時阿謙仲企喺到，未有坐喺我隔離





『今次唔係啦，我...』

『夠啦，你每次因為阿俊而唔開心就嚟搵我，你當我係咩呀？告解員？社工？定係兵？每次有咩事你都搵我，因為你知道無論點我都會幫你？甚至要幫你男朋友氹返你開心？講真，我對你係點，我知你係feel到，無可奈何每次你搵我都係關於你男朋友，你有冇理過我感受？我叫你同佢分手，你唔捨得，你覺得你搵我，我仲可以同你講咩？』

『阿謙呀，真係好對唔住，我真係無當過你係兵，你係我非常好嘅朋友，其實呢，我今次係想同你講我...』

『得喇，唔駛再講，我明白架喇，係咁先』佢斷絕我嘅說話就已經轉身走人

『阿謙呀，唔係呀，你聽埋我講先啦，好嗎？』我用盡僅有嘅氣力去嘗試大聲講





“gacha” 佢樓下大堂嘅門已經關咗，完全唔比機會我講究竟發生咩事

我同阿謙嘅誤會就一路落去.....

到咗一星期一次嘅聚會，今次喺Michelle屋企，當阿謙到咗嘅時候，我同佢say Hi，但佢無理過我，

當然，依個時候樂哥佢地好似意識到咩事咁，就耍開場面嘅尷尬，話大家一齊食啲野再傾下一次去邊度玩好。

食完野，Kelvin就提議不如去大嶼山，但係Michelle就話夏天去好辛苦，跟住就提議去歷史博物館同科學博物館行下，

樂哥同Kelvin都ok，而我就無所謂嘅，但係阿謙話近排學校野忙，話去唔到，叫我地照去就得

Michelle：『咁我地騰遲2個禮拜去吖，我地就你』

謙：『唔駛』

Michelle：『你同阿慧最熟，你喺到佢會安心啲架』

Kelvin：『咪係，你唔喺度我實蝦阿慧架haha

謙：『都係玩下啫，佢唔會介意，何況我』

阿謙講完後，差唔多dead air咗成半分鐘，冇幾耐，阿謙話要返屋企做功課為理由就早走咗

佢走後Michelle佢地都問我究竟同阿謙係咪鬧咗交，但係我同佢地講其實我都唔知發生咩事，應該係誤會，叫佢地唔駛擔心。

離開時，Michelle見我好似唔開心，就話請我飲野，同時間，我都大概講返果晚同阿謙嘅事比佢聽，佢應承咗我會保守秘密，

甚至連阿謙都唔會講，唔會提。

之後果2個禮拜，阿謙因忙為理由無嚟聚會。後尾，Kelvin話不如搵日食飯，就大家時間，就決定月底去沙田果間上海店食。

其實果餐飯真係嚟得奇怪，我大概都知係佢地想我同阿謙和好返，點解我會知？

點菜後，樂哥就打開話題

樂哥：『係呢，下次活動去邊度好呢？』 Kelvin：『不如去迪士尼吖？』

Michelle：『係喎，阿慧阿謙，你哋之前唔係話想去架咩，依家都放暑假啦，不如我哋下個星期去吖，你哋話好無？』





我其實知道阿謙想去迪士尼玩好耐，不過如果我話去，佢實話有嘢做唔去，咁我唯有拒絕

我：『唔喇，我...要返暑期工』

Michelle：『吓？無聽你講過嘅？』

Kelvin：『唔會7日都要返掛』

我：『吓...我....』

謙：『你唔係想去好耐架咩？係咪因為我，所以你唔去？』

我：『你講咩呀？』雖然阿謙終於對住我講野，不過佢咁講搞到我好唔開心

謙：『或者你肯定同你男朋友去咗，所以你唔想再去啦』





我：『男朋友？你覺得真係咁咩？明明係你唔想見到我，所以我知如果我去，你可能會話唔去，所以我咪話唔去囉！』

謙：『我點解要避開你？』

我：『我都想知究竟你嬲我啲咩！點解你要唔睬我?!』

謙：『我無！』

我：『夠啦，真係夠啦，我好攰，我走先，對唔住』

我忍住眼淚，好快就走出餐廳，到度上咗巴士，我先忍唔住喊咗出嚟。某程度上黎講，阿謙對我真係好重要，

唔係普通朋友咁簡單，但係又唔知自己係咪鍾意咗佢，對佢有好感，定還是真係對佢係朋友嘅感情咁簡單，

反正我好care佢對我點諗。

落咗車，我唔敢返屋企，我唔想比屋企人見到我咁，唯有一個人坐喺石灘到，等自己個心平復返啲先返屋企。

海浪聲，帶比我寂寞嘅感覺，同時間，我個心好亂，亦好痛，因為我唔知點解我同阿謙嘅關係會搞成咁。

夜晚對住海吹風，身體永遠好誠實，自然會自己縮埋一舊，但係我完全無凍嘅感覺 。不過當我諗返起頭先同阿謙講嘅野，眼淚自然一滴一滴咁流下，索一索鼻水，個身亦開始有啲震。

果種空虛嘅感覺再次返嚟，就好似世界上無人明白我一樣。已經夜晚10點，個石灘可以話係空無一人，

但我feel到有人行緊過嚟，我好驚，我唔敢望，當我個心卜卜咁跳嘅時候，有人比咗件褸我摟住，之後仲坐咗喺我隔離。

果刻我好希望係阿謙，不過我知係無可能，所以我唔敢望果個人係邊個。

『對唔住』

非常熟悉嘅聲，我一眼望過去...

『阿謙？』

『對唔住，係我誤會你』 聽完佢講對唔住，我又忍唔住喊咗出嚟

『我唔應該咁對你，真係好對唔住，你唔好喊啦』

佢叫我唔好喊，但係我仲喊得犀利啲

『我...我真係無當你係咩架，我有事先搵你，因為...得你先明白...我』喺喊緊嘅同時，我一個一個字講得好辛苦

『好啦，唔好喊啦，Michelle已經講晒比我知』

『你走咗之後，其實我仲好嬲，樂哥同Kelvin已經比我地嚇到冇聲出，果個時候，Michelle好大聲咁同我講叫我出去，佢拉住我出餐廳行埋一邊。第一句已經話你同阿俊已經分咗手』

『係你當時唔比機會我講』

『因為當時我好嬲，我唔明點解你唔開心先嚟見我，而且我以為你係想講一路以來我同你都只係普通朋友，所以為免聽到依番說話，我先至唔比你講落去』

『對唔住，但..但係你真係我好好...好好嘅朋友，我唔搵你我唔知搵邊個』

『Michelle佢鬧醒咗我，我就即刻返嚟搵你，我打過去你屋企，但auntie話你仲未返，咁我知道你一有唔開心就嚟依度坐，所以我真係喺度搵到你』

我望住阿謙『我今次唔開心，唔係因為阿俊，我係好驚你唔會再理我呀』

『我明白』佢好細心咁用佢隻手幫我抹掉啲眼淚

我個頭擰返埋『你唔好對我咁好啦！如果我....我話如果...如果我咁緊張你係咪嬲咗我，其實係因為我鍾意咗你，咁你會點呀？』講完之後，我眼角偷望阿謙反應

『傻妹』

我終於笑返，因為我鍾意阿謙叫我傻妹

『咁你想唔想知點解我會同阿俊分手？』

『點解呀？』

『因為你』

『真架？』

『haha講下咋，傻瓜』

『哎吔，叫返你傻妹先』

————————————————————————————

喺我唔清楚明白阿俊諗咩嘅情況底下，我終於決定主動搵佢，佢接電話時依然若無其事，好安然咁問我搵佢有咩事，

為免同佢再鬧交，我無問佢點解近排對我咁冷淡，只問佢今日做咗啲咩，佢嘅答案令我心情大跌，

再次興起另一場鬧交，甚至...

『無呀，今日自己一個放學時咁啱撞到個ex同佢個friend，佢地話去食飯一唔一齊，咁我咪應承囉！』

『你明知我唔鍾意佢，點解你仲要應承佢喎！』

『有乜所謂啫！朋友啫！前年聖誕節佢咪又係約我出去食！』

『咪住先！你講咩話？前年聖誕？你唔係話要準備DSE，要留係屋企操數架咩？』

『係呀！我有同你講過啫！佢話想約我聖誕食飯嘛』

『我記得！但我有話唔想你去！』

『咁耐無見，有咩所謂』

『我話想同你聖誕出街食，你就話要操數，佢想約你，你就應承，咁啫係點？』

『過咗去就唔好追究喇，我都同你講咗依件事啦！』

『食完飯之後你哋去邊？你有冇送佢返屋企？』

『咁又無，比咗個goodbye kiss佢就走咗啦，話你知吖，原來有女朋友但係錫其他女仔嘅感覺又幾爽架喎』

『你爽？咁我呢？我係你女朋友，你仲要話俾我聽你kiss咗你個ex？你當我係咩？朋友開心share？』

『咁耐啦都，仲嬲咩呢？駛唔駛我比時間你冷靜下』

『我諗我唔需要時間冷靜，我唔會再哂任何時間喺你身上，我同你已經無嘢可以再講』

『過咗啦都，我都講比你聽，仲分咩手呀？』

坦白唔係罪，錯在於一次不忠，百次不用。件事的確已經過去，佢亦向我坦白講出事情經過，

我無再嬲佢，我只係喺佢身上失去安全感，所以我無勇氣再同佢一齊。

第二日，我走到屬於我同阿俊曾經擁有共同回憶嘅海濱長廊，由以前嘅2個人變成孤身一個慢慢行，面對住海風，亦唔會有人幫我阻

擋...

好好分開應要淡忘 你找到你伴侶

重臨舊情景 我卻哭得出眼淚

時常在聯想 你會溫馨的抱我午睡

然而自己現在沒任何權利 再抱怨一句 ---到此為止

—————————————————————————

『早就叫你同佢分手，你又唔聽』

『依家咪分咗囉』

『好啦，要返屋企喇傻妹，我送你返去』

『你比我坐多陣啦，難得你唔再嬲我』

『好啦好啦』

『嘻嘻』

當一切也跌倒了

是你令我再次找到心跳

當一切也失去了

沒有預料　至少都可擁抱你哭笑

偽善的世界　混沌了意義

唯獨你在我身邊

拍掌拍肩直到了最後的一秒 --- Supper Moment 是你令我再次找到心跳

誤會消除咗，迪士尼自然去得成，不過今次只有我同阿謙。

炎熱嘅夏天，為大地帶來....汗水

對於我依啲小女人嚟講，一生只想搵一個對我無微不至嘅男人

果日最難忘嘅並唔係一齊玩機動遊戲，一齊並排企阻擋內地人打尖，一齊影相而係佢帶咗幾包紙巾，

之後親自幫我喺鼻上抹走汗水，再為我遞上面部濕紙巾

而我亦幫佢噴上補濕水，讓佢可以清爽啲


隨後果一日，再次係一星期一次嘅聚會。我去到時，阿謙已經喺度，我嘅眼神仍然避開佢，當我去到時，

亦只有阿謙一個無同我say Hi。

Michelle眼見情況如此：『不如我地玩個小遊戲？』

Kelvin：『仲細咩，小遊戲，玩就玩大遊戲啦！』

樂哥：『唉，咪鬼理佢，Michelle你講』

Michelle：『嗱，我哋都識咗咁耐啦，應該好清楚大家嘅，我地做個好朋友測試，我呢就做主持 ，你地就分成2組，um…樂哥Kelvin你地就一組啦，啫係阿慧阿謙就一組』

Kelvin：『下，2條友好gay啫，不如我做主持啦』

樂哥：『咪嘈啦！』

Michelle：『每人一張白紙，我分別問你地問題，2個嘅答案都要同時寫喺張紙架，就問阿謙阿慧你哋先』

1）阿慧係咩星座

2）阿謙口頭禪係咩

3）阿謙鍾意食咩肉

4）阿慧鍾意睇咩類型漫畫

5）阿慧鍾意咩色

6）阿謙有咩壞習慣



Michelle：『你睇下你地！啲答案係一樣架！你地搞咩呀？仲要唔理對方到幾時？阿謙，我咪同你解釋咗囉，點解仲要咁對阿慧？』

依個時候，我唔小心笑咗，阿謙亦跟隨住笑

Michelle：『你地笑咩』

我：『其實我地已經好返架啦，我地做戲㗎咋』

謙：『前日我地去埋迪士尼添』

Michelle：『哦！你哋撇甩我哋！』

Kelvin：『樂哥，你知唔知發生緊咩事』

樂哥同Kelvin對望住：『唔知』

我：『不如我地傾下嚟緊去邊度玩....』