友愛的決擇: 第五章：無你，我的生活便會乏味
門聲響起，我即刻走去開門，阿俊攞住一袋二袋嘅餸上嚟，佢話今日要整西餐
依個時候，阿謙從佢間房出咗嚟
謙：『咦！你黎左呀，我...會唔會阻住你哋？不如我...』
俊：『唔緊要呀，我研究咗啲新菜式，想比你哋試下味，你做自己嘢啦，整完叫你出嚟食』
謙：『洗唔洗我幫手？』
我：『唔駛啦，我幫佢得架啦！』
俊：『都好！阿慧佢實雞手鴨腳，你坐下先啦，唔好阻住我哋』
謙：『haha，你去睇電視啦！』
阿謙推咗我去梳化度，不過我無睇電視，我返房攞咗本BL書出廳睇
佢哋一路整嘢一路傾計，話最近玩開LOL，又問對方用開邊隻英雄，又話咩中路最多敵人呀
，總之就講埋啲我聽唔明嘅嘢。
餐飯就大概整咗成粒鐘，期間我都有行埋去睇下佢哋做緊乜，到佢哋差唔多整完，我就負責開枱，攞刀刀叉叉果啲啦。
美食當前，兩大男人煮嘅餸，唔好以為只有喺電視劇先會出現，我都估唔到依啲嘢都會喺我身上發生，不過講咩都係假，
最緊要係醫咗個肚先，兼試下阿俊嘅手勢！
－生菜搽牛油落蒜鹽
－黑椒牛仔骨
－番茄豬肉條義大利粉
－薯仔焗bacon+三色椒
款款都食到我津津有味！
俊：『點呀？好食嗎？』
謙：『嗯！幾好食，唔錯！』
俊：『你呢？你好似食到好開心咁喎』
我：『haha，好食吖嘛』
謙：『如果你平時可以多啲令佢開心咪幾好囉』
俊：『huh？』
我聽完之後擘大咗隻眼
佢講完之後突然間成個氣氛好似停咗咁
謙：『啊！我指美食可以令人開心 haha』
俊：『咁又係呀！你見佢開心到要用手食牛仔骨先滿足就知啦haha』
我：『咩喎！唔用手食邊爽架！』
謙：『身為女仔食嘢食到你咁麻甩我都係第一次見咋！』
我：『你理得我！』
我：『陣間食完邊個洗碗呀？』
俊：『猜包剪揼！』
點知....我輸咗！好彩最後阿俊有幫我抹碗
洗完碗，我同阿俊就返番我間房
嗯，都係果啲嘢啦，攬下錫下，之後我哋就坐喺床上，佢攬住我咁傾計
『呀！係喎！上次我咪同你提過我想去長洲嘅，我琴日上網搵咗啲資料呀，有幾間舖頭好出名架，不如我哋搵日去試啦！』
隨即我攞起張枱果張琴日抄底咗嘅notes，諗住比阿俊睇
『下，你講真架，長洲咁遠，又要搭船，我會暈船浪架，唔好去果到啦！不如我哋行番科學園，果度啲風景又靚又靜』
『下....咁好啦....咁我搵我啲friend陪我去長洲喇，科學園我都鍾意嘅，佢夠靜hehe冇乜人』
到咗5點阿俊就要返屋企，佢走咗之後，我就諗住whatsapp我啲friend，問下佢哋去唔去長洲
-----------------喂喂！你哋有冇人想去長洲呀？
阿欣：
我想去！不過近排好忙，要搞莊務啲嘢呀:(
----------------- :( 其他人呢？
阿J：
上個禮拜先去完
I甩：
幾時呀？
----------------下個禮拜六？
I甩：
約咗親戚食飯喎，不如星期日？
阿J：
Family Day！要睇周星馳啲戲呀
-----------------咁算啦，遲啲等大家得閒先再約啦咁 :(
唉...望住張紙，諗起當時我有幾咁興奮一邊take notes一邊上網搵資料，點知最後係無人同我去嘅，
果刻嘅心情當然低落啦！同屋企人去？好無癮啫！
如是者，成晚我帶著失落嘅心情食飯，睇電視，去廁所，連果晚發夢都夢見去咗長洲
（潛意識話俾我聽係長洲，不過夢入面果個地方唔似係，你懂的）
到第二日返學，我已經唔記得想去長洲果件事
不過返到屋企，夜晚做功課時又望到果張紙
即刻冇晒心機做功課，因為我真係好想好想去長洲，自從小學去過果度旅行，我就無再去
應該話，自從我懂事以嚟，都無去過長洲，長洲嘅風土人情，從來只喺電視見過，但無感受過，我卜喺枱面，喺度發吽哣....
突然有人敲門
『咩事呀？』
『嘩，你做咩呀，無晒精神嘅，你病咗呀？』
原來係阿謙...
『唔係啊，搵我做咩呀？』
『冇呀，比番支筆你囉』
『擺低啦』
『做咩呀你，精神啲啦年青人，阿俊又搞到你唔開心呀？』
『咩叫又啊，今次唔關佢事嘅，只係個個都唔得閒陪我去長洲啫，明明一早plan定晒諗住同阿俊去長洲玩架嘛，
點知佢驚暈船浪，我啲friend又唔得閒』我一邊講一邊攞住張紙
『乜你好想去長洲咩？咁啱我依個月底會同我啲friend去喎，你join唔join我哋吖？』
『下... 我都唔識你啲friend....跟埋你去咪好怪囉』
『咪當識多啲friend囉，隨得你啦，又係你話想去長洲嘅』
『下.... 我會好驚㗎喎，佢哋nice唔nice架？』
『nice過你！』 ?????
『月底呀？咁好啦... 不如你同佢哋講咗先，咁到時唔駛咁尷尬嘛』
『ok la，係咁啦，詳細資料遲啲再話你聽』
終於有得去長洲，我當然開心返，我即刻收埋好張紙，費事唔見咗佢
咁多年長洲都變晒樣，係時候去多次，重新認識依個地方
阿謙：
下個星期六，11點中環碼頭等，到時我哋10點出門口
－－－－－－－－－－－－－－ohh ok
我終於明白咩叫現代人嘅溝通方式，明明住埋同一間屋，間房打對面， 都要用電話溝通，不過又真係幾方便嘅，依啲題外話啦，講返正題，
喺出發前一日，執好第二日要嘅嘢擺落背囊，當然唔少得我準備咗好耐嘅果張紙